រាជធានីភ្នំពេញ ៖ បុរសជានិស្សិតម្នាក់ ពេលជិះម៉ូតូចេញពីសាលាត្រឡប់ទៅផ្ទះវិញដល់ពាក់កណ្តាល់ផ្លូវ ក៏ស្រាប់តែទាក់ដៃចង្កូតគ្នាជាមួយនឹងរថយន្តសណ្តោងកុងតឺន័រ បណ្តាលអោយបុរសម្នាក់នោះខ្ទាតចូលក្រោមរថយន្តកិនបែកក្បាលស្លាប់តែម្តង ។ ហេតុការណ៍នេះដែរបានកើតឡើងនៅវេលាម៉ោង៩និង៤៥នាទីយប់ ថ្ងៃទី២៩ ខែវិច្ឆិកា ឆ្នាំ២០១៨ ទល់មុខរោងចក្រ កាត់ដេរសំលៀកបំពាក់ WD ផ្លូវ២១៧ ភូមិឫស្សី ស្ទឹងមានជ័យ៣ ខណ្ឌមានជ័យ ។
ជនរងគ្រោះដែលស្លាប់ឈ្មោះ ម៉េង ឈុនលី ភេទប្រុស អាយុ១៩ឆ្នាំ ជានិស្សិតសាកលវិទ្យាល័យបញ្ញាសាស្ត្រ ស្នាក់នៅជាមួយបងប្អូនក្នុងបុរីពិភពថ្មីចំការដូង សង្កាត់ដង្កោ ខណ្ឌដង្កោ មានស្រុកកំណើតនៅភូមិទួលថ្ម ឃុំថ្មពួក ស្រុកព្រៃឈរ ខេត្តកំពង់ចាម ។ ចំណែកម៉ូតូរបស់ជនរងគ្រោះម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ ១FA-៩៨២២ ។ ចំណែករថយន្តសណ្តោងកុងតឺន័រ ពណ៌ស ពាក់ស្លាកលេខ ភ្នំពេញ ៣E-៣៦៦៧ អ្នកបើកបរមិនត្រូវបានស្គាល់អត្តសញ្ញាណ បានរត់គេចខ្លួនបាត់ស្រមោល។
តាមប្រភព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរសរងគ្រោះខាងលើជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ចេញពីសាលា គោលបំណងត្រឡប់ទៅផ្ទះវិញនៅខណ្ឌដង្កោ ។
ជនរងគ្រោះបានធ្វើដំណើរតាមផ្លូវ២១៧ ក្នុងទិសដៅពីជើងទៅត្បូង លុះមកដល់ចំណុច កើតហេតុ ស្រាប់
តែរថយន្តសណ្តោងកុងតឺន័រដែលធ្វើដំណើរ ក្នុងទិសដៅស្របគ្នា ក្នុងល្បឿនលឿន បានរេចង្កូតជ្រុលទៅបុកទាក់ដៃចង្កូតជាមួយនឹងម៉ូតូរបស់ជនរងគ្រោះ ទើបបណ្ដាលអោយជនរងគ្រោះដួលខ្ទាតចូលក្រោមរថយន្តកិនអូសពីលើប្រហែល៥ម៉ែត្រ បណ្តាលជនរងគ្រោះក្រពឹតក្បាលកៀបជាប់ជាមួយនឹងមួកសុវត្តិភាពហូរឈាមស្លាប់យ៉ាងអាណោចអាធ័ននៅនិងកន្លែងកើតហេតុតែម្តង ។
ភ្លាមៗនោះដែរ រថយន្តបង្កមិនព្រមឈប់ដោះស្រាយនៅនឹងកន្លែងកើតហេតុនោះទេ គឺព្យាយាមបើករថយន្តរត់គេចចូលដល់ទឹកដីខណ្ឌដង្កោ ពេលនោះសមត្ថកិច្ចខណ្ឌដង្កោ ដេញតាមរថយន្តបង្ករហូតដល់ផ្លូវ៥០ម៉ែត្រ ក្នុងសង្កាត់ដង្កោ ខណ្ឌដង្កោ ទើបអ្នកបើកបររថយន្តបង្កបានឈប់អែបកៀនទុករថយន្តចោល ហើយរត់គេចខ្លួនចូលទៅក្នុងព្រៃបាត់ស្រមោល ។
ក្រោយពេលកើតហេតុ ឃើញសមត្ថកិច្ចមូលដ្ឋានបានចុះទៅកន្លែងកើតហេតុ និងបានធ្វើការទំនាក់ទំនងហៅសាច់ញាតិបងប្អូនអោយមកទទួលយកសពជនរងគ្រោះទៅធ្វើបុណ្យនៅស្រុកកំណើតខេត្តកំពង់ចាម ។
ចំណែករថយន្ត និងម៉ូតូត្រូវបានសមត្ថកិច្ចជំនាញក្រុងធ្វើការវាស់វែងយកទៅរក្សារទុកនៅការរិយាល័យចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ