ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា ស្ត្រី គាំងបេះដូងស្លាប់គ្មាននរណាម្នាក់ដឹងទេ រហូតឡើងហើមស្អុយធុំក្លិន ទើបដឹង ក៏នាំគ្នាគាស់ទ្វារចូលមើលបង្កការភ្ញាក់ផ្អើលកាលពីម៉ោង៤ល្ងាច ថ្ងៃទី២៩ ខែវិច្ឆិកា…
ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា ស្ត្រី គាំងបេះដូងស្លាប់គ្មាននរណាម្នាក់ដឹងទេ រហូតឡើងហើមស្អុយធុំក្លិន ទើបដឹង ក៏នាំគ្នាគាស់ទ្វារចូលមើលបង្កការភ្ញាក់ផ្អើលកាលពីម៉ោង៤ល្ងាច ថ្ងៃទី២៩ ខែវិច្ឆិកា ឆ្នាំ២០១៨ នៅបន្ទប់ផ្ទះជួលមួយកន្លែង ស្ថិតក្នុងភូមិកងសៅ ឃុំកំពង់ថ្ម ស្រុកសន្ទុក ខេត្តកំពង់ធំ។
សមត្ថកិច្ចនគរបាលបានឲ្យដឹងថា ជនរងគ្រោះខាងលើឈ្មោះ ប៉ុល ចន្ទ្រា ភេទស្រី អាយុ៧៤ឆ្នាំ មុខរបរកសិករ រស់នៅភូមិកំពង់ថ្ម ឃុំកំពង់ថ្ម ស្រុកសន្ទុក ហើយជនរងគ្រោះជាស្ត្រីគ្មានកូនគ្មានចៅនោះទេ រស់ នៅតែម្នាក់ឯង ថែមទាំងមានជំងឺប្រចាំកាយដូចជា ជំងឺបេះដូង ជំងឺលើសឈាម និងជំងឺទឹកនោមផ្អែម ។ ស្ត្រីរងគ្រោះទើបតែមកជួលផ្ទះខាងលើស្នាក់នៅបានរយៈពេលជាងមួយខែតែប៉ុណ្ណោះ ដោយប្រកបមុខ របរលក់ដូរភេសជ្ជៈបន្តិចបន្តួច។
ចំណែកស្ត្រីឈ្មោះ ប៉ុល ពេជ អាយុ៥៨ឆ្នាំ ត្រូវជាប្អូនបង្កើតរបស់ស្ត្រីរងគ្រោះបានបំភ្លឺថា ជនរងគ្រោះជាបងរបស់គាត់ ហើយរយៈពេលកន្លងមក បងស្រីគាត់មានជំងឺប្រចាំកាយរស់នៅតែម្នាក់ឯង គ្មានអ្នកថែទាំនោះទេ ក៏មិនដឹងថា គាត់ស្លាប់ប៉ុន្មានថ្ងៃហើយនោះដែរ។ រហូតដល់មានក្លិនស្អុយខ្លាំង ទើបសិស្សសាលាដែលជួលបន្ទប់ស្នាក់នៅជាប់គ្នាធុំស្អុយ ចេះតែឆ្ងល់ក៏បានទូរស័ព្ទប្រាប់ម្ចាស់ផ្ទះថា មានក្លិនស្អុយក្នុងបន្ទប់ជួលជាប់បន្ទប់របស់ពួកគេ។
ប្រភពខាងលើបន្តថា ម្ចាស់ផ្ទះក៏ប្រាប់ថាឲ្យនាំគាស់ទ្វារចូលមើល ពេលគាស់ទ្វារចូលក៏ប្រទះឃើញជនរងគ្រោះដេកស្លាប់ក្នុងបន្ទប់ មិនដឹងតាំងពីពេលណានោះទេបង្កឱ្យមានការភ្ញាក់ផ្អើលដល់អ្នកភូមិ ហើយបានប្រាប់ក្រុមគ្រួសារសពមកជួយពិនិត្យមើលសាកសព។
ក្រោយពេលដឹងព័ត៌មានខាងលើនេះ កម្លាំងជំនាញបច្ចេកទេសខេត្ត និងស្រុក ចុះដល់កន្លែងកើតហេតុសហការជាមួយប៉ុស្តិ៍រដ្ឋបាលរដ្ឋ ធ្វើការពិនិត្យនៅកន្លែងកើតហេតុ និងសពស្ត្រីរងគ្រោះ ប៉ុន្តែពុំឃើញមានស្លាកស្នាមអ្វីកត់សម្គាល់នោះទេ ។ ក្រោយពិនិត្យចប់ ក៏សន្និដ្ឋានថា ជនរងគ្រោះ គឺស្លាប់ដោយសារជំងឺគាំងបេះដូង ក៏ប្រគល់សពស្ត្រីរងគ្រោះជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។
ចែករំលែកព័តមាននេះ