រាជធានីភ្នំពេញ ៖ បុរសម្នាក់មិនដឹងថា មានកំហឹងជាមួយអ្នកណានោះទេ បានទាញកាំភ្លើងខ្លីមួយដើម បាញ់មេឃជិត១០គ្រាប់ បង្កការភ្ញាក់ផ្អើលកាលពីវេលាម៉ោង១១ និង១០នាទីយប់ថ្ងៃទី២៩ វិច្ឆិកា ស្ថិត…
រាជធានីភ្នំពេញ ៖ បុរសម្នាក់មិនដឹងថា មានកំហឹងជាមួយអ្នកណានោះទេ បានទាញកាំភ្លើងខ្លីមួយដើម បាញ់មេឃជិត១០គ្រាប់ បង្កការភ្ញាក់ផ្អើលកាលពីវេលាម៉ោង១១ និង១០នាទីយប់ថ្ងៃទី២៩ វិច្ឆិកា ស្ថិត
នៅមុខផ្ទះលេខ១១B ផ្លូវ៦៦៦ ភូមិតាងូវក្រោម សង្កាត់និរោធន៍ ខណ្ឌច្បារអំពៅ ។
ប្រភពបន្តថា បុរសដែលបាញ់បោះសេរីរូបនេះត្រូវសមត្ថកិច្ចឃាត់ខ្លួនបាន តែមិនបានបង្ហាញនិងឱ្យស្គាល់
ពីអត្តសញ្ញាណនោះទេ ។ តែមានការបង្ហើបឱ្យដឹងថា បុគ្គលនោះ គឺជាមន្ត្រីនគរបាលថ្នាក់ឧត្តមសេនីយ៍ត្រីម្នាក់ និងជាអនុប្រធាននាយកដ្ឋានទៀតផង ។
តាមសម្តីបុរសម្នាក់ដែលសុំមិនបញ្ចេញឈ្មោះថា នៅមុនពេលកើតហេតុ រូបគាត់បានចេញពីកម្មវិធីនៅម្តុំទួលក្រសាំង គោលបំណងត្រលប់ទៅផ្ទះវិញនៅក្បែរកន្លែងកើតហេតុ រួចហើយរូបគាត់បានទូរសព្ទឱ្យប្រពន្ធចាំបើកទ្វារផ្ទះ។
តែពេលនោះប្រពន្ធរបស់គាត់បានប្រាប់ថា មានបុរសម្នាក់បានកាន់កាំភ្លើងដើរបាញ់ពេញផ្លូវ ។ ឮដំណឹងបែបនេះ រូបគាត់បើករថយន្តមកដល់ជិតផ្ទះ ក៏បានចេញទៅប្តឹងសមត្ថកិច្ចប៉ុស្តិ៍នគរបាលនិរោធន ពីករណីផ្ទុះអាវុធក្បែរផ្ទះគាត់ តែពេលនោះសមត្ថកិច្ចបានប្រាប់គាត់វិញថា កម្លាំងរបស់គាត់ចុះទៅ២នាក់ហើយ ទើបរូបគាត់បើករថយន្តបត់ចូលផ្លូវទៅផ្ទះ ។
ប្រភពបន្តទៀតថា គាត់បានឃើញបុរសម្នាក់នោះ បានកាន់កាំភ្លើងខ្លី មិនស្គាល់ម៉ាកមកគោះរថយន្តរបស់គាត់សួរថា «ទៅណា?» ដោយសារតែឃើញកាំភ្លើងបែបនេះ គាត់បានបើករថយន្តថយក្រោយវិញទៅប៉ុស្តិសមត្ថកិច្ចនិរោធន៍ម្តងទៀត ទើបសមត្ថកិច្ចមូលដ្ឋានបានចុះទៅកន្លែងកើតហេតុ រួចហើយបានឃាត់ខ្លួនបុរសរូបនោះ យកទៅសាកសួរនៅអធិការដ្ឋាននគរបាលខណ្ឌច្បារអំពៅ ។
នៅក្នុងករណីខាងលើនេះ សមត្ថកិច្ចបានប្រមូលសំបកកាទុស្សចំនួន៨គ្រាប់ ។ ទោះបីជាយ៉ាងណា សមត្ថកិច្ច ហាក់បីដូចជាមានការលាក់បាំង មិនចង់ឱ្យក្រុមអ្នកសារព័ត៌មានថតរូបជនបង្ករនោះទេ ហើយក៏មិនបានប្រាប់ថា ជនបង្កជាអ្នកណាដែរ គឺបិទធ្វើជិតឈឹងតែម្តង ។
បើមានព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ