ខេត្តបាត់ដំបង ៖ យុវជន២នាក់ត្រូវសមត្ថកិច្ចឃាត់ខ្លួន កាលពីវេលាម៉ោង៨ និង៤៥នាទីយប់ថ្ងៃទី២៨ វិច្ឆិកា នៅចំណុចភូមិចំការចេក ឃុំស៊ុង ស្រុកសំឡូត ខណៈដែលយុវជនទាំង២នាក់នេះកំពុងជិះម៉ូតូឌុបគ្នា…
ខេត្តបាត់ដំបង ៖ យុវជន២នាក់ត្រូវសមត្ថកិច្ចឃាត់ខ្លួន កាលពីវេលាម៉ោង៨ និង៤៥នាទីយប់ថ្ងៃទី២៨ វិច្ឆិកា នៅចំណុចភូមិចំការចេក ឃុំស៊ុង ស្រុកសំឡូត ខណៈដែលយុវជនទាំង២នាក់នេះកំពុងជិះម៉ូតូឌុបគ្នា និងដឹកកូនសត្វស្វាព្រៃចំនួន១០ក្បាល បំរុងយកទៅលក់ ។
យុវជនទាំង២នាក់នោះ ម្នាក់ឈ្មោះជួន សេង អាយុ១៩ឆ្នាំ និងម្នាក់ទៀតឈ្មោះសួង សម្បត្តិ អាយុ១៨ឆ្នាំ ពួកគេជាកសិករ រស់នៅក្នុងភូមិតានន ឃុំមានជ័យ ស្រុកសំឡូត ។
បើតាមការបំភ្លឺពីយុវជនទាំង២នាក់បានឲ្យដឹងថា ពួកគេខ្លួនមិនមែនជាអ្នកអាជីព រកស៊ីចាប់សត្វព្រៃលក់
ទេ។ ពួកខ្លួនទើបតែចាប់បានកូនសត្វស្វាទាំងនោះ ដោយសារតែវាពូកែបំផ្លាញដំណាំក្នុងចំការពេក ។ ពួកគេបញ្ជាក់ថា រាល់ថ្ងៃសត្វទាំងហ្វូងៗ បានចុះពីភ្នំមកបំផ្លាញដំណាំ ហើយពួកខ្លួនខឹងពេកក៏នាំគ្នាច្នៃអន្ទាក់ ដើម្បីចាប់សត្វស្វាទាំងនោះ រហូតចាប់កូនស្វាព្រៃនេះចំនួន១០ក្បាល ។ ក្រោយពីចាប់ស្វាព្រៃនេះបាន ពួកខ្លួន ក៏មានបំណងដឹកយកទៅលក់ ដោយមិនបានដឹងថា ជាអំពើខុសច្បាប់ទេ លុះពួកខ្លួនដឹកមកតាមផ្លូវ ក៏ត្រូវសមត្ថកិច្ចស្ទាក់ចាប់តែម្ដង។
បើតាមសមត្ថកិច្ចបានប្រាប់ថា យុវជនទាំង២នាក់នោះ អាចជាប់សង្ស័យពីបទ«ដឹកជញ្ជូនសត្វព្រៃដោយគ្មានការអនុញាត»។ ពេលនេះលោកស្នងការខេត្តបានបញ្ជាឲ្យមន្ត្រីជំនាញបានឃាត់ខ្លួន និងបានបញ្ជូនទាំងមនុស្សទាំងវត្ថុតាងទៅកាន់ស្នងការដ្ឋានខេត្តហើយ ដើម្បីសាកសួរនាំបន្ត។
ជាមួយនឹងការបង្ក្រាបបទល្មើសជំនួញសត្វព្រៃខាងលើនេះ មតិមួយចំនួនបានលើកឡើងថា បើតាមការពិនិត្យជាក់ស្ដែង ជនទាំង២នាក់នេះ ពិតជាបានប្រព្រឹត្តបទល្មើសដឹកជញ្ជូនសត្វព្រៃមែន តែវាមិនមែនជាបទល្មើសព្រហ្មទណ្ឌទេ ។ ពួកគេបានធ្វើដោយអចេតនា ហើយពួកគេក៏មិនមែនជាមុខសញ្ញាអាជីពចាប់សត្វព្រៃលក់ដែរ ។ ដូច្នេះសមត្ថកិច្ច ឬតុលាការ គួរតែដកហូតយកសត្វស្វាព្រៃទាំងនោះ ហើយលែងចូល
ព្រៃវិញ រួចធ្វើការអប់រំយុវជនទាំង២នាក់ និងធ្វើកិច្ចសន្យាឲ្យពួកគេបញ្ឈប់សកម្មភាពចាប់សត្វស្វាទាំងនោះ ប្រសើរជាងដាក់ទោស ឬផាកពិន័យជាប្រាក់ ។ ព្រោះបើតាមពិនិត្យលើបទល្មើសនៅក្នុងស្រុកសំឡូត នៅមានច្រើនណាស់ដែលសមត្ថកិច្ចគួរតែធ្វើការបង្ក្រាប ដូចជាល្បែងស៊ីសង បញ្ហាជូញដូរថ្នាំញៀន និងបទល្មើសព្រៃឈើរ។ល។
ជុំវិញករណីនេះ បើតាមមន្ត្រីមូលដ្ឋានបាននិយាយដែរថា ឪពុកម្ដាយយុវជនទាំង២នាក់នាក់ ក៏បានមកសុំអង្វរធានាកូនៗរបស់ពួកគាត់ឱ្យត្រឡប់ទៅវិញដែរ ជាមួយនឹងការទទូលស្គាល់កំហុស ។ ពួកគាត់បានបញ្ជាក់ដែរថា កូនៗរបស់ពួកគាត់ មិនមែនជាអ្នករកស៊ីចាប់សត្វព្រៃលក់ទេ គឺគ្រាន់តែចាប់សត្វស្វាទាំងនេះ ដោយសារខឹងពួកវាពួកែអុកឡុកនិងបំផ្លាញដំណាំក្នុងចំការពេក ។
មន្ត្រីបានបញ្ជាក់ថា ដោយសារមានបញ្ជាពីលោកស្នងការខេត្ត និងលោកព្រះរាជអាជ្ញារផង ទើបសមត្ថកិច្ចមូលដ្ឋានសម្រេចបញ្ជូនពួកគេទៅកាន់ស្នងការខេត្ត ។ ប៉ុន្តែឪពុកម្ដាយពួកគេ ក៏បានធ្វើដំណើរតាមទៅកាន់ស្នងការខេត្តដែរ ដើម្បីសុំធានាកូនៗត្រឡប់មកផ្ទះវិញ ។
ចែករំលែកព័តមាននេះ