រាជធានីភ្នំពេញ៖ កញ្ញាពៅ លីដា ដែលល្បីថាមានបុរសសុំស្រឡាញ់ច្រើននោះ នៅតែបន្តប្រកាន់ជំហរមិនទោរទន់លើបុរសណាទេ ។ បើទោះបីវ័យកាន់តែច្រើន ហើយម្តាយចង់បានចៅពនឹងគេក្តី ក៏ពៅលីដានៅតែមិនទាន់បើកចិត្តយកស្នេហាឲ្យស្អិតទ្រូង ។ មកទល់ពេលនេះតារាសម្បុរខ្មៅស្រអែមពៅ លីដា នៅតែជាប់ឈ្មោះជាកញ្ញា មិនព្រមឲ្យជាប់ជំពាក់កាយជាមួយបុរសណាម្នាក់ក្រៅពីការព្យាយាមបំពេញកិច្ចការផ្នែកសម្តែង និងនៅជិតម្តាយជាទីស្រឡាញ់ទេ ។
ចំពោះអាជីពសិល្បៈពៅ លីដា នៅតែគ្រងបានតំណែងតួឯក ពិសេសរឿងភាគបែបបុរាណដោយមានមុខមាត់បែបខ្មែរសមលក្ខណៈរឿងបុរាណ ។ ឆ្នាំ២០១៨នេះពៅ លីដាគ្រងបានតួអង្គឯកប្រមាណជា២ទៅ៣រឿង ។
កាលពីពេល ថ្មីៗកន្លងមកពៅ លីដាបានប្រាប់ថាសម្រាប់ឆ្នាំ២០១៨នេះនាងយល់ថាខ្លួនមានស្នាដៃរឿងភាគប្រមាណ៣រឿង គឺយល់ថាល្មមហើយ ។ ឆ្នាំ២០១៩គិតថាខ្លួនយកការសម្តែងក៏ត្រឹម២ ឬ៣រឿងដូចគ្នា ។ បើចង់ក្រសោបឲ្យបានច្រើនជាងនេះ គឺខ្លាចគេថាតួ ដដែលៗ ។ «ខ្ញុំមានការសប្បាយចិត្តដែលទីផ្សារសម្តែងនៅតែទៅមុខ ហើយខិតខំបន្តទៀតដើម្បីសាងស្នាដៃនៅក្នុងសិល្បៈ »។
នៅពេលសួរនាំរឿងស្នេហាមានអ្នកណាស្រឡាញ់ ឬនៅ ? ហើយពេលណាប្រកាសរឿងគូស្រករឲ្យគេស្គាល់ពេញមុខ ? ពៅ លីដាបានត្រឹមតែគ្រវីក្បាលយ៉ាងលឿន ហើយនិយាយថា «រឿងគ្រួសារអត់ដឹងថាពេលណានោះទេ នាងខ្ញុំសុំលាក់មិននិយាយថាជាអ្នកណាដោយអារម្មណ៍ខ្ញុំយល់ថានៅទំនេរសិនជាងធ្វើខ្លួនឲ្យជាប់ទ្រុង ។ និស្ស័យមកដល់គឺនាងខ្ញុំអាចនឹងពិចារណាបុរសមួយនោះ មិនទុកខ្លួនឲ្យនៅយូរទេត្រូវតែមានគូដាច់ខាត…»។
ពៅ លីដាឲ្យដឹងថានាងមានគម្រោងទៅសម្តែងនៅបរទេសម្តងទៀតដើម្បីពង្រីកឈ្មោះដល់ស្រុកក្រៅ ។ ប្រឡូកសិល្បៈបានប៉ុន្មានឆ្នាំនាងធ្លាប់ទៅសម្តែងនៅអាមេរិក អូស្ត្រាលី និងជប៉ុនជាដើម ។ អ្នកគាំទ្រចាំមើលថាតើទៅមុខទៀតពៅ លីដា នឹងបើកបេះដូងយកបុរសរូបណា ហើយបុរសម្នាក់ណាអាចយកឈ្នះចិត្តនាងបាន ៕
ចែករំលែកព័តមាននេះ