រាជធានីភ្នំពេញ ៖ ប្រទេសចំនួន១៨២នៃរដ្ឋជាសមាជិកអង្គការសហប្រជាជាតិរួមមាន មន្ត្រីរដ្ឋាភិបាល ស្ថាប័នសិក្សាស្រាវជ្រាវ វិស័យឯកជន ដៃគូអភិវឌ្ឍន៍ អង្គការជាតិ និងអន្តរជាតិ និងសង្គមស៊ីវិលបានចូលរួមធ្វើសន្និសីទសាកលស្តីពីសេដ្ឋកិច្ចពណ៌ខៀវប្រកបដោយនិរន្តរភាពនៅទីក្រុងណៃរ៉ូប៊ី…
រាជធានីភ្នំពេញ ៖ ប្រទេសចំនួន១៨២នៃរដ្ឋជាសមាជិកអង្គការសហប្រជាជាតិរួមមាន មន្ត្រីរដ្ឋាភិបាល ស្ថាប័នសិក្សាស្រាវជ្រាវ វិស័យឯកជន ដៃគូអភិវឌ្ឍន៍ អង្គការជាតិ និងអន្តរជាតិ និងសង្គមស៊ីវិលបានចូលរួមធ្វើសន្និសីទសាកលស្តីពីសេដ្ឋកិច្ចពណ៌ខៀវប្រកបដោយនិរន្តរភាពនៅទីក្រុងណៃរ៉ូប៊ី ប្រទេសកេនយ៉ា ។
សន្និសីទនេះបានធ្វើឡើងកាលពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០១៨ ដោយផ្តោតការពិភាក្សាយ៉ាងសកម្មទៅលើសរសរស្តម្ភចំនួន២គឺ ១-និរន្តរភាព ការប្រែប្រួលអាកាសធាតុ និងការត្រួតពិនិត្យការបំពុល និង២-ផលិតកម្ម ការពន្លឿនការអភិវឌ្ឍសេដ្ឋកិច្ច ការងារ និងការកាត់បន្ថយភាពក្រីក្រ។
យោងតាមផេករបស់វេទិការអង្គការមិនមែនរដ្ឋាភិបាល ស្តីពីកម្ពុជាបានឲ្យដឹងថា សន្និសីទនេះ ក៏បានផ្តោតការយកចិត្តទុកដាក់លើប្រធានបទរងចំនួន៩ទៀតគឺ ១-មធ្យោបាយដឹកជញ្ជូនប្រកបដោយភាពឆ្លៀតវៃ, ២-ការងារ ការបង្កើតការងារ និងការលុបបំបាត់ភាពក្រីក្រ, ៣-ទីក្រុង ទេសចរណ៍ ហេដ្ឋារចនាសម្ព័ន្ធ និងភាពធន់នៃតំបន់ឆ្នេរ, ៤-និរន្តរភាពថាមពល ធនធានរ៉ែ និងឧស្សាហកម្មប្រកបដោយការច្នៃប្រឌិត, ៥-បញ្ចប់ភាពអត់ឃ្លាន ការធានានូវការ ផ្គត់ផ្គង់ចំណីអាហារ ការលើកម្ពស់សុខភាព និងនិរន្តរភាពជលផល, ៦-ការគ្រប់គ្រង និងនិរន្តរភាពនៃធនធានសមុទ្រ ការអភិរក្ស និងនិរន្តរភាពសកម្មភាពសេដ្ឋកិច្ច, ៧-សកម្មភាពអាកាសធាតុ កសិកម្ម ការគ្រប់គ្រងសំណល់ និងភាពស្អាតនៃសមុទ្រ, ៨-សន្តិសុខសមុទ្រ សុវត្ថិភាព និងការអនុវត្តច្បាប់ និង៩-ប្រជាជន វប្បធម៍ សង្គម និងសហគមន៍ បរិយាប័ននៃសេដ្ឋកិច្ចពណ៍ខៀវ ។
មួយគ្នានេះសន្និសីទក៏បានពិភាក្សាលើប្រធានបទរួមចំនួន៤ទៀតផងដែរគឺ ១-បច្ចេកវិទ្យាថ្មី និងការច្នៃប្រឌិតសម្រាប់ធនធានសមុទ្រ សមុទ្រ បឹង និងទន្លេ, ២-ការប្រឈម កាលានុវត្តភាព អាទិភាព និងភាពជាដៃគូ, ៣-ហិរញ្ញវត្ថុសម្រាប់សេដ្ឋកិច្ចពណ៍ខៀវ និង៤-ស្ត្រីយុវជន និងសេដ្ឋកិច្ចពណ៍ខៀវ ៕
ចែករំលែកព័តមាននេះ