រាជធានីភ្នំពេញ ៖ គ្មានអ្នកណាមិនដឹងនោះទេថា លោក ឈាវ បូរ៉ា គឺជាកីឡាករល្បីល្បាញមួយរូបខាងផ្នែកអុកចត្រង្គ ឬអុកខ្មែរ បន្ទាប់ពីលោកដណ្ដើមបានពានស្ដេចអុក២ឆ្នាំជាប់គ្នាកាលពីប៉ុន្មានឆ្នាំមុនក្នុងព្រឹត្តិការណ៍អង្គរសង្ក្រាន្ត នៅខេត្តសៀមរាប…
រាជធានីភ្នំពេញ ៖ គ្មានអ្នកណាមិនដឹងនោះទេថា លោក ឈាវ បូរ៉ា គឺជាកីឡាករល្បីល្បាញមួយរូបខាងផ្នែកអុកចត្រង្គ ឬអុកខ្មែរ បន្ទាប់ពីលោកដណ្ដើមបានពានស្ដេចអុក២ឆ្នាំជាប់គ្នាកាលពីប៉ុន្មានឆ្នាំមុនក្នុងព្រឹត្តិការណ៍អង្គរសង្ក្រាន្ត នៅខេត្តសៀមរាប ។ យ៉ាងណាក៏ដោយលោកអះអាងថា ខ្លួនមិនទាន់ពេញចិត្តនូវអ្វីដែលលោកកំពុងមាននោះទេ ដោយសារតែលោកនៅមានបំណងចង់ក្លាយជាកីឡាករអុកអន្តរជាតិក្នុងពេលខាងមុខ ប្រសិនបើលោកអាចស្វះស្វែងរកគ្រូមកបង្ហាត់បង្រៀនច្បាស់លាស់ខុសពីក្នុងពេលនេះ ដែលលោកកំពុងស្វែងយល់កីឡាមួយនេះតាមប្រព័ន្ធអីុនធើរណេតប៉ុណ្ណោះ។
ស្ដេចអុក២ជំនាន់ និងជាអគ្គលេខាធិការសហព័ន្ធកីឡាអុកចត្រង្គកម្ពុជាលោក ឈាវ បូរ៉ា បានអះអាងថា នៅក្នុងប្រទេសកម្ពុជាមានការពេញនិយម និងស្គាល់កាន់តែច្បាស់ពីកីឡាអុកចត្រង្គ ឬអុកខ្មែរ ប៉ុន្តែអុកប្រភេទនេះពេញនិយមតែនៅប្រទេសជិតខាងរួមមានថៃ ឡាវ និងវៀតណាមប៉ុណ្ណោះ ចំណែកនៅបណ្ដាប្រទេសជាច្រើនទៀតនៅទូទាំងពិភពលោកគេនិយមលេងអុកអន្តរជាតិ និងអុកចិនច្រើនជាង។
លោកថា អុកចិន និងអុកអន្តរជាតិមានលក្ខណៈខុសគ្នាដាច់ឆ្ងាយពីអុកចត្រង្គរបស់ខ្មែរទាំងពីរបៀបលេង រចនាបថ និងចំណុចពិសេសជាច្រើនទៀត ដែលធ្វើឱ្យអុកទាំង២មិនអាចច្រឡំគ្នាបានទេ បើទោះជាមាន ឈ្មោះថាអុកដូចគ្នាយ៉ាងណាក្ដី ។ អ៊ីចឹងហើយទើបនៅប្រទេសកម្ពុជាត្រូវបានបែងចែកកីឡាអុកជាពីរគឺអុកចត្រង្គ និងអុកអន្តរជាតិ ប៉ុន្តែលោកថា អុកអន្តរជាតិនៅកម្ពុជាមិនសូវដើរទេ ដោយសារតែមនុស្សភាគច្រើននិយមលេងតែអុកខ្មែរ ហើយនៅក្នុងស្រុកក៏មិនសូវមានការប្រកួតអុកអន្តរជាតិផុសផុលនោះដែរ ។
លោកចង់ឱ្យប្រទេសកម្ពុជាមានការរីកចម្រើនលើវិស័យកីឡាអុកអន្តរជាតិច្រើនជាង ឬបានស្មើនឹងអុកចត្រង្គ ដោយសារតែលោកយល់ថា បើកម្ពុជាមានតែអុកខ្មែររីកចម្រើនហើយចូលមិនចុះនឹងអុកអន្តរជាតិ គឺមិនខុសពីល្បីតែក្នុងអណ្ដូង តែលទ្ធផលចុងក្រោយមិនអាចបោះជំហានស្មើមុខស្មើមាត់លើឆាកអន្តរជាតិនោះឡើយ ។ អ៊ីចឹងហើយទើបកីឡាអុកខ្មែរមានការរីកចម្រើនក្នុងប៉ុន្មានឆ្នាំចុងក្រោយ តែនៅពេលមានការអញ្ជើញឱ្យតំណាងកម្ពុជាចេញប្រកួតកីឡាអុកជាមួយនឹងបណ្ដាប្រទេសផ្សេងៗ គឺកម្ពុជាទៅមិនរួច ។ លោកថា ខ្លួនចង់បង្វឹកខ្លួនឯងឱ្យចេះលេងអុកអន្តរជាតិក្នុងពេលខាងមុខ ប៉ុន្តែមកទល់ពេលនេះអុកអន្តរ ជាតិអត់មានអ្នកបង្រៀននៅក្នុងប្រទេសកម្ពុជាទាល់តែសោះ គឺមានតែនៅក្រៅស្រុកទើបលោកមានបំណង ស្នើឱ្យគណៈកម្មាធិការជាតិអូឡាំពិកកម្ពុជាប្រើយុទ្ធសាស្ត្របែបណា ដើម្បីឱ្យកម្ពុជាមានគ្រូបង្វឹកផ្នែកកីឡាអុកអន្តរជាតិ ដើម្បីជាប្រយោជន៍ដល់កីឡាករអុកចត្រង្គដែលចង់ក្លាយខ្លួនជាអ្នកជំនាញអុកអន្តរជាតិដើម្បីបំពេញតម្រូវការក្រៅស្រុក ។
លោកថា លោកចង់ឱ្យអុកអន្តរជាតិមានរូបភាពទូលំទូលាយនៅក្នុងប្រទេស ហើយបើលោកបានទទួលការជ្រោមជ្រែងឱ្យចេញទៅហាត់រៀននៅក្រៅប្រទេស នោះលោកនឹងធ្វើការចាកចេញទៅសិក្សាជំនាញនោះឱ្យបានស្ទាត់ដូចការចង់បាន ដោយសារតែលោកនៅចង់ក្លាយជាអ្នកជំនាញផ្នែកអុកអន្តរជាតិ បើទោះជាលោកគឺជាអគ្គលេខាសហព័ន្ធអុកចត្រង្គដែលមិនអាចទៅធ្វើជាកីឡាករអុកអន្តរជាតិ ដែលជាសហព័ន្ធមួយផ្សេងក្ដី ។
លោកថា ខ្លួនចង់ចេះជំនាញនេះស្ទាត់ ដើម្បីទុកគ្រាន់បង្ហាត់សិស្សផង ឬអាចវិវត្តន៍ខ្លួនក្លាយជាកីឡាករអុកអន្តរជាតិផងនៅពេលណាមួយ ដោយសារតែលោកនៅមានបំណងធំមួយ គឺចង់ឈ្នះពានក្នុងនាមជាម្ចាស់ជើងឯកអុកអន្តរជាតិមួយទៀត បន្ទាប់ពីបានក្លាយជាម្ចាស់ពានជើងឯកអុកខ្មែរច្រើនដងមកហើយ ។ លោកថា ខ្លួនបានត្រឹមតែរៀនលេងអុកអន្តរជាតិតាមបណ្ដាញយូធូបប៉ុណ្ណោះ ដោយគម្រោងបើមានការបង្វឹកពីអ្នកជំនាញគឺលោកនឹងហាត់ឱ្យស្ទាត់ដើម្បីទុកគ្រាន់បង្វឹកសិស្សខ្លួនបន្ថែមពីលើការបង្វឹកឱ្យចេះលេងអុកខ្មែរនាពេលនេះ។
លោកនៅតែអះអាងថា អ្នកចេះលេងអុកខ្មែរនឹងមិនអាចទៅលេងអុកអន្តរជាតិបានទេ ដោយសារតែលក្ខណៈ និងទម្រង់លេងខុសគ្នាដាច់ឆ្ងាយ ដែលលោកបានហៅប្រភេទកីឡាទាំងពីរថា បើទោះជាឈ្មោះអុកដូចគ្នា ប៉ុន្តែទម្រង់ និងរបៀបលេងខុសគ្នា ។ លោកបានបញ្ជាក់ប្រាប់ជាថ្មីថា ពាក់ព័ន្ធនឹងភាពខុសគ្នារវាងអុកខ្មែរ និងអុកអន្តរជាតិថាមានចំណុច៣ដាច់ដោយឡែកពីគ្នាគឺ ក្ដារលេងរបស់អុកខ្មែរមានតែមួយពណ៌ប៉ុណ្ណោះ ដោយអាចជាពណ៌ត្នោត ឬពណ៌ឈើ អាស្រ័យលើការជ្រើសរើស ប៉ុន្តែអុកអន្តរជាតិ គឺមានប្រភេទក្ដារលេងជាពណ៌ខ្លាឃ្លោក ។
ទី២អុកខ្មែរ និងអុកអន្តរជាតិមានរចនាបថកូនអុកខុសគ្នាតែម្ដង ដោយអុកអន្តរជាតិប្រភេទស្ដេច ទូក និងគោលជាដើម គឺមានរចនាបថមិនដូចអុកខ្មែរទេ លើកលែងតែសេះ ដែលនៅមើលទៅដឹងថាសេះ ដែលមានលក្ខណៈស្រដៀងអុកខ្មែរ ។ ដោយឡែកចំណុចទី៣ដែលខុសគ្នា គឺអុកខ្មែរ មានរបៀបដើរផ្សេង ហើយអុកអន្តរជាតិមានរបៀបដើរផ្សេង។ លោកឧទាហរណ៍ថា អុកខ្មែរសម្រាប់កូនអុកដែលមានឈ្មោះថាគោល គឺអាចដើរបាន៥ជំហានប៉ុន្តែសម្រាប់អុកអន្តរជាតិដើរបានតែ៤ជំហានប៉ុណ្ណោះ ហើយបើមានអីបាំងពីមុខក៏មិនអាចនឹងដើរបានដែរ ដែលខុសពីគោលអុកខ្មែរ គឺអាចដើរបាន ។ លោកថា មិនមានការលំបាកណាស់ណានោះទេរវាងប្រភេទអុកទាំងពីរសំខាន់ឱ្យចាំតែក្បួនដើរ និងចាំក្រឡាដើរ គឺអាចលេងបានដូចគ្នា ដែលមិនខុសពីប្រទេសខ្លះបើកបរប្រកាន់ឆ្វេង ហើយប្រទេសខ្លះបើកបរប្រកាន់ស្ដាំនោះឡើយ។
យ៉ាងណាមិញ ប្រសិនបើអ្នកថ្នឹកនឹងរបៀបលេងអុកខ្មែរ គឺអាចនឹងភ្លាត់លេងខុស ឬចាញ់គូប្រកួតដោយងាយផងដែរ ប្រសិនបើទៅលេងអុកអន្តរជាតិ ហើយច្រឡំពីក្បួនដើរ ដែលដូចគ្នានឹងអ្នកពូកែលេងអុកអន្តរជាតិ ហើយមកលេងអុកចត្រង្គរបស់ខ្មែរ ក៏លេងមិនបានល្អ ព្រោះតែក្បួនខុសគ្នា កូនខុសគ្នា ហើយចេះតែភាំងៗ ឬភ្លេចទម្រង់លេង។ មកទល់ពេលនេះ លោកថា កីឡាអុកអន្តរជាតិមានការរីកចម្រើនយ៉ាងខ្លាំងនៅលើពិភពលោក ដោយកម្ពុជាក៏មានសហព័ន្ធកីឡានេះផងដែរ ប៉ុន្តែមិនមានកីឡាករណាដណ្ដើមបានជ័យជម្នះត្រឡប់មកវិញនោះទេ ដោយសារតែកម្ពុជាមិនមានអ្នកជំនាញខាងបង្វឹកនៅឡើយ ក្នុងពេលដែលមហាជនបានទទួលស្គាល់ថា កម្ពុជាមានការរីកចម្រើនផ្នែកកីឡាអុក ៕
ចែករំលែកព័តមាននេះ