រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា និងឡាវ នឹងជួបពិភាក្សាពីបញ្ហាបត្យាប័នអ្នកទោស ការលើកលែងពន្ធត្រួតគ្នា និងបញ្ហាបោះបង្គោលព្រំដែនទ្វេរភាគី ។ នេះបើតាមលោកទូតឡាវថ្មីលើកឡើងក្នុងជំនួបពិភាក្សាទ្វេរភាគីជាមួយសម្តេចប្រធានរដ្ឋសភា ។
លោក កែវ ពិសិដ្ឋ នាយកខុទ្ទកាល័យសម្តេច ហេង សំរិន ប្រធានរដ្ឋសភាបានស្រង់សំដី លោក អាំផាយ ឃិនដាវង្ស ( Amphay KINDAVONG) ឯកអគ្គរដ្ឋទូតឡាវថ្មីប្រចាំនៅកម្ពុជាក្រោយជំនួបពិភាក្សាការជាមួយសម្តេច ហេង សំរិន ប្រធានរដ្ឋសភានាព្រឹកថ្ងៃទី២៩ វិច្ឆិកា នៅវិមានរដ្ឋសភាថា ក្នុងជំនួបពិភាក្សាលោកទូតបានឲ្យដឹងថា នៅក្នុងដំណើរទស្សនកិច្ចផ្លូវការ និងមិត្តភាព របស់សម្តេចតេជោ ហ៊ុន សែន នៅប្រទេសឡាវ នៅដើមខែធ្នូខាងមុខនេះរដ្ឋាភិបាលប្រទេសទាំងពីរនឹងចុះកិច្ចព្រមព្រៀងយោគយល់គ្នាលើវិស័យអប់រំ វប្បធម៌ និងថាមពលអគ្គិសនី ។ ជាមួយគ្នានេះប្រទេសទាំងក៏នឹងពិភាក្សាគ្នាលើបញ្ហាពាណិជ្ជកម្ម ពិសេសសការលើកលែងពន្ធត្រួតគ្នា និងបញ្ហាបត្យាប័នអ្នកទោសផងដែរ ។
លោក អាំផាយ ឃិនដាវង្ស បានអបអរចំពោះលទ្ធផលបោះឆ្នោតជ្រើសតាំង សមាជិក រដ្ឋសភានីតិកាលទី៦ និងបានសាទរយ៉ាងក្រៃលែងចំពោះរដ្ឋសភាកម្ពុជា ដែលផ្តល់សេចក្តីទុកចិត្តជូនសម្តេច ហេង សំរិន បន្តដឹកនាំរដ្ឋសភាក្នុងអាណត្តិថ្មីទៀត ៕
ចែករំលែកព័តមាននេះ