២គ្រឿងពន្លះគ្នាលើផ្លូវជាតិលេខ៦ ក្រឡាប់ចាក់ដំឡូងមីពេញលើថ្នល់
- កំពង់ធំ
ខេត្តកំពង់ធំ ៖ រថយន្តម៉ាកហ៊ីយ៉ាន់ដាយមួយគ្រឿងមានដឹកដំឡូងមីបានបុកគ្នាជាមួយរថយន្តមួយគ្រឿងទៀតម៉ាកសាំយ៉ុងមានដឹកអ្នកដំណើរ បណ្តាលឱ្យអ្នកជិះក្នុងរថយន្តម៉ាកសាំយ៉ុងរងរបួសធ្ងន់ស្រាលចំនួន៤នាក់ ចំណែករថយន្តម៉ាកហ៊ីយ៉ាន់ដាយបានក្រឡាប់ចាក់ដំឡូងមីចោលពេញលើថ្នល់ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង១៩នាទីទៀបភ្លឺថ្ងៃទី២៩ ខែវិច្ឆិកា ឆ្នាំ២០១៨ នៅលើកំណាត់ផ្លូវជាតិលេខ៦…
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង១៩នាទីទៀបភ្លឺថ្ងៃទី២៩ ខែវិច្ឆិកា ឆ្នាំ២០១៨ នៅលើកំណាត់ផ្លូវជាតិលេខ៦ ស្ថិតក្នុងភូមិពុកយុក សង្កាត់ស្រយូវ ក្រុងស្ទឹងសែន ខេត្តកំពង់ធំ ។
នគរបាលបានឲ្យដឹងថា ភាគីខាងរថយន្តម៉ាកហ៊ីយ៉ាន់ដាយ ពណ៌បៃតង ពាក់ស្លាកលេខ ភ្នំពេញ
ចំណែកភាគីរថយន្តមួយគ្រឿងម៉ាករថយន្តសាំងយ៉ុង ពណ៌ស ពាក់ស្លាកលេខ ភ្នំពេញ ២Q-៥៧៧០ មានដឹកអ្នកដំណើរ បើកបរដោយឈ្មោះ ហេង ជ្រុយ ភេទប្រុស អាយុ៥០ឆ្នាំ រស់នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ បានរងរបួសធ្ងន់ និង អ្នករួមដំណើរចំនួន៣នាក់ ១-ឈ្មោះ ទូច ផល្លា ភេទប្រុស អាយុ៤៥ឆ្នាំ នៅភូមិពោធិ៍បាក់ករ សង្កាត់ដំរីជាន់ខ្លា ក្រុងស្ទឹងសែន បានរងរបួសស្រាល ២-ឈ្មោះ ឃុយ ម៉េងស្រៀង ភេទស្រី អាយុ៣២ឆ្នាំ នៅភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន បានរងរបួសស្រាល និង៣-ឈ្មោះ ឈ បៀងគង់ ភេទប្រុស អាយុ៦៥ឆ្នាំ រស់នៅភូមិកំពង់ក្របៅ សង្កាត់កំពង់ក្របៅ ក្រុងស្ទឹងសែន បានរងរបួសស្រាល ។
ប្រភពព័ត៌មានបានឱ្យដឹងថា មុនពេលកើតហេតុ បុរសម្នាក់បានបើកបរថយន្តមួយគ្រឿងម៉ាកហ៊ីយ៉ាន់ដាយ មានដឹកដំឡូងមី បានទៅបុកគូទរថយន្តមួយគ្រឿងពេញទំហឹងម៉ាកសាំងយ៉ុងមានដឹកអ្នកដំណើរដែលកំពុងតែឈប់ចតដាក់ម៉ូយនៅលើទ្រូងផ្លូវ បណ្តាលឱ្យភាគីខាងរថយន្តម៉ាកសាំយ៉ុងរងរបួសធ្ងន់ស្រាល៤នាក់ និងភាគីខាងរថយន្តម៉ាកហ៊ីយ៉ាន់ដាយក្រឡាប់ចាក់ដំឡូងមីចោលពេញលើផ្លូវ រីឯអ្នកបើកបររថយន្តម៉ាកហ៊ីយ៉ាន់ដាយបានរត់គេចខ្លួនបាត់ស្រមោល ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍នេះមូលហេតុបឋមបង្កឡើងដោយអ្នកបើកបររថយន្តម៉ាកសាំងយ៉ុងឈប់លើទ្រូងផ្លូវខ្វះការប្រុងប្រយ័ត្ន រួមផ្សំនឹងអ្នកបើកបររថយន្តម៉ាកហ៊ីយ៉ាន់ដាយមានដឹកដំឡូងមីបើកបរខ្វះការប្រុងប្រយ័ត្ន ។
បន្ទាប់ពីធ្វើការវាស់វែងរួច រថយន្តទាំង២គ្រឿងត្រូវបានសមត្ថកិច្ចយកមករក្សាទុកនៅប៉ុស្តិ៍នគរបាលរដ្ឋបាលស្រយូវដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ