ខេត្តបាត់ដំបង ៖ បុរសចំណាស់ម្នាក់បានយកប្រេងសាំងចាក់ស្រោចដុតសម្លាប់ខ្លួនធ្វើអត្តឃាត ហើយឆេះទាំងផ្ទះអស់គ្មានសល់ កាលពីវេលាម៉ោងជាង១២ថ្ងៃត្រង់ថ្ងៃទី២៧ ខែវិច្ឆិកា នៅភូមិបរិបូណ៌ ឃុំស្ដៅ ស្រុករតនមណ្ឌល ដែលគេសង្ស័យថាបណ្ដាលមកពីការប្រចណ្ឌប្រពន្ឌដោយគ្មានហេតុផល ។
សមត្ថកិច្ចបានឲ្យដឹងថា បុរសរូបនេះឈ្មោះ ចាន់ ចៀន អាយុ៦៨ឆ្នាំ មានប្រពន្ធឈ្មោះ ជា សារឿយ អាយុ៥៧ឆ្នាំ ជាកសិករ រស់នៅក្នុងភូមិ ឃុំ ខាងលើ បានយកសាំងចាក់ស្រោចលើខ្លួនដុតបណ្ដាលឲ្យឆេះស្លាប់ទាំងខ្លួនឯងនិងឆេះអស់ទាំងផ្ទះទៀត ។
បើតាមការសួរនាំខ្លះៗអំពីមូលហេតុនៃការដុតខ្លួននេះ គឺបុរសរូបនេះតែងតែផឹកស៊ីស្រវឹង រួចបង្កជម្លោះជាមួយប្រពន្ធនិងអ្នកក្បែរខាងស្ទើររាល់ថ្ងៃ ។ មិនតែប៉ុណ្ណោះ បុរសចំណាស់ខាងលើកើតរោគប្រចណ្ឌប្រពន្ធទៀតផង ទើបជ្រើសរើសយកផ្លូវធ្វើអត្តឃាត ដើម្បីបញ្ចប់បញ្ហាគ្រប់យ៉ាង ដែលអ្នកខ្លះថាជាការជ្រើសរើសបែបល្ងង់ខ្លៅ រកលេខដាក់គ្មាន ។
បើតាមអ្នករស់នៅក្បែរនោះនិយាយថា មានពេលតិចតួចណាស់ដែលថាជននេះមិនផឹកស្រវឹង ហើយពេលស្រវឹងម្ដងៗ តែងតែបង្កជម្លោះជាមួយប្រពន្ធគ្រប់ពេល មិនដឹងមកពីមូលហេតុអ្វីឲ្យប្រាកដនោះទេ តែបើតាមការសង្កេតនិងតាមការបំភ្លឺរបស់ប្រពន្ធផង គឺជននេះកើតរោគប្រចណ្ឌដែលគ្មានហេតុផល ។
តាមការស្រង់សម្តីប្រពន្ធឈ្មោះ ជា សារឿយក៏បាននិយាយដែរថា មុនកើតហេតុរូបគាត់និងប្ដីបានជិះម៉ូតូឌុបគ្នាមកពីស៊ីឈ្នូលបេះសណ្ដែកឲ្យគេ លុះមកដល់ផ្ទះស្រាប់តែលោកប្ដីចាប់ផ្ដើមបង្កជម្លោះដូចសព្វដងទៀត ។ ពេលនោះដោយសារធុញទ្រាន់នឹងជម្លោះនេះពេក គាត់ក៏ដើរចេញពីផ្ទះឲ្យផុតពីមុខដើម្បីចៀសវាងកុំឲ្យមានបញ្ហាច្រើន ។ ប៉ុន្តែក្រោយពីគាត់ដើរចេញផុត ស្រាប់តែបន្តិចក្រោយមកប្ដីរបស់គាត់ចាក់សាំងដុតខ្លួនឯងស្លាប់ ហើយឆេះទាំងផ្ទះអស់ទៀត ទើបមានការផ្អើលឆោឡោតែម្ដង ។
សមត្ថកិច្ចដែលបានចុះអន្តរាគមន៍ក្នុងហេតុការណ៍ខាងលើនិយាយថា មុនពេលធ្វើអត្តឃាតបុរសរូបនេះក៏បានបង្កជម្លោះជាមួយអ្នកជិតខាងដូចសព្វដងដែរ ។ ប៉ុន្តែទំនងដោយសារខឹងប្រពន្ធដើរចេញពីផ្ទះបាត់ ហើយថែមទាំងរោគប្រចណ្ឌរើឡើងកាន់តែខ្លាំងទៀត ទើបសម្រេចបញ្ចប់បញ្ហាប្រចាំជីវិតចុងក្រោយតាមរយៈការធ្វើអត្តឃាត និងបំផ្លាញទាំងទ្រព្យ ស្លាប់ទាំងខ្លួនតែម្ដង ។
ទោះជាយ៉ាងណា សមត្ថកិច្ចមិនទាន់ឲ្យដឹងអំពីទំហំនៃការខាតបង់ដោយសារអគ្គិភ័យនេះនៅឡើយទេ តែបានប្រាប់ថាក្រៅពីស្លាប់មនុស្សម្នាក់ទ្រព្យសម្បត្តិទាំងអស់ នៅក្នុងផ្ទះក៏បានក្លាយជាផេះដែរ ៕
ចែករំលែកព័តមាននេះ