ប្រទេសអារ៉ាប៊ីសាអ៊ូឌីត ៖ ព្រះអង្គម្ចាស់រជ្ជទាយាទអារ៉ាប៊ីសាអ៊ូឌីត MOHAMMED BEN SALMANE ជាបុរសខ្លាំងរបស់ប្រទេស បានទៅដល់ទីក្រុងទុយនីសប្រទេសទុយនីសីុ កាលពីយប់ថ្ងៃទី២៧ វិច្ឆិកា ហើយជួបប្រទះ នឹងបាតុកម្មប្រឆាំងទស្សនកិច្ចនេះរបស់ទ្រង់ ។
ពួកបាតុករប្រឆាំងចំពោះតួនាទីរបស់អារ៉ាប៊ីសាអ៊ូឌីត ក្នុងសង្គ្រាមនៅយេម៉ែន និងការបង្ក្រាបនានាដែលកើតមានក្នុងប្រទេសនេះ ។ ការធ្វើឃាតអ្នកកាសែតប្រឆាំងលោក JAMAL KHASHOGGI ក៏ជាចំណុចសំខាន់មួយនៃការប្រឆាំងដែរ ។
រជ្ជទាយាទអង្គនោះដែលជួបជាមួយប្រធានាធិបតីទុយនីសីុ លោក BEJI CAID ESSEBSI រួមជាមួយគណៈប្រតិភូធំមួយ គឹជាសមាជិករាជវង្សអារ៉ាប៊ីសាអ៊ូឌីតដំបូងគេ ដែលមកកាន់ទុយនីសីុ ចាប់តាំងពីបដិវត្តន៍ពណ៌ឆ្នាំ២០១១មក ។
ទុយនីសីុជាប្រទេសតែមួយគត់ដែលប្រកាន់យកមាគ៌ានៃលទ្ធិប្រជាធិបតេយ្យ ក្រោយបដិវត្តន៍ពណ៌ឆ្នាំ២០១១ ។ ប្រទេសនេះជាប្រទេសអារ៉ាប់មួយកម្រមាន ដែលអនុញ្ញាតឲ្យពួកបាតុករអាចសម្ដែងជំហររិះគន់ ចំពោះមេដឹកនាំអារ៉ាប៊ីសាអ៊ូឌីត ។
នោះជាទស្សនកិច្ចរយៈពេលខ្លីបំផុតមួយរបស់បុរសខ្លាំងអារ៉ាប៊ីសាអ៊ូឌីត នៅឯបរទេសចាប់តាំងពីមានការសម្លាប់អ្នកកាសែតលោក KHASHOGGI មក ។ ការធ្វើឃាតនេះធ្វើឲ្យខូចមុខមាត់លើឆាកអន្តរជាតិ របស់រជ្ជទាយាទអង្គនោះ ដែលបណ្ដាអ្នកទទួលខុសត្រូវតួកគីនិងអាមេរិក ចោទថាគឺរូបទ្រង់ជាអ្នកបញ្ជាពីក្រោយ ។
ថ្ងៃទី២៧ វិច្ឆិកា នៅទីក្រុងទុយនីស ពួកបាតុករបានលើករណារនានា ដែលចង់សំដៅលើការការធ្វើឃាតអ្នកកាសែតប្រឆាំង ព្រមទាំងលើកទង់ជាតិយេម៉ែន ជាកន្លែងដែលអារ៉ាប៊ីសាអ៊ូឌីតជួយធ្វើសង្គ្រាមប្រឆាំងពួកឧទ្ទាមហ៊ូធី បណ្ដាលឲ្យជនសីុវិលច្រើនពាន់នាក់ត្រូវស្លាប់ ៕
ចែករំលែកព័តមាននេះ