ប្រទេសអ៊ុយក្រែន-រុស្សុី ៖ ប្រធានាធិបតីអ៊ុយក្រែន លោកប៉េត្រូប៉ូរ៉ូឆេនកូកាលពីថ្ងៃទី២៧ វិច្ឆិកា បានលើកពីការគំរាមធ្វើសង្គ្រាមទាំងស្រុងមួយជាមួយរុស្សុី ដែលលោកថាបង្កើនវត្តមានយោធារបស់ខ្លួននៅតាមព្រំដែន ដែលធ្វើឲ្យភាពតានតឹងកាន់តែធ្ងន់ធ្ងរថែមទៀត ចាប់តាំងពីការចាប់នាវាចម្បាំងអ៊ុយក្រែន៣គ្រឿងនៅសមុទ្រខ្មៅមក ។
បន្តឹងសំឡេងចំពោះលោក វ្ល៉ាឌីមៀរ ពូទីន ប្រធានាធិបតីអាមេរិកលោក ដូណាល់ ត្រាំ ក៏គំរាម
លុបចោលការជួបគ្នារបស់លោក ជាមួយលោក ពូទីន ដែលគ្រោងនាដំណាច់សប្ដាហ៍នេះក្នុងឱកាសនៃកិច្ចប្រជុំកំពូលរបស់ G20 នៅអាហ្សង់ទីន ។
ក្នុងបទសម្ភាសន៍មួយជាមួយកាសែតវ៉ាសិុនតោនប៉ុស្តិ៍ ប្រធានាធិបតីអាមេរិកថ្លែងថា របាយការណ៍ស្ដីពីសភាពការណ៍ ដែលបណ្ដាទីប្រឹក្សាសន្តិសុខជាតិរបស់លោក ត្រូវប្រគល់នាពេលខាងមុខនេះ នឹងជាកត្តាកំណត់មួយ ។ វាអាចដែលខ្ញុំនឹងពុំជួបជាមួយប្រមុខវិមានក្រឹមឡាំង ខណៈសេតវិមានទើបតែអះអាងពីការជួបគ្នានោះ ។ លោកបន្តថា ខ្ញុំពុំចូលចិត្តការឈ្លានពាននេះឡើយ ។ ខ្ញុំពុំចង់បានការឈ្លានពានទេ ។
អ៊ុយក្រែន និងរុស្សុី បានប្រឈមមុខដាក់គ្នាជាច្រើនឆ្នាំមកហើយ រួចការចាប់នាវាយោធាអ៊ុយក្រែន៣គ្រឿង ដោយកងឆ្មាំឆ្នេរសមុទ្ររុស្សុី ក្នុងដែនទឹកតំបន់គ្រីមេជាឧប្បត្តិហេតុធ្ងន់ធ្ងរមួយពុំធ្លាប់មានពីមុនមក ។
តាមទូរទស្សន៍អ៊ុយក្រែន៣ លោកប៉ូរ៉ូឆេនកូអះអាងថា មនុស្សមួយចំនួនគិតថានោះជាល្បែងក្មេងលេងមួយ ប៉ុន្តែអ៊ុយក្រែនត្រូវប្រឈមមុខនឹងការគំរាមកំហែងនៃសង្គ្រាម ទាំងស្រុងមួយជាមួយសហព័ន្ធរុស្សុី ។ លោកថា ចំនួនរថក្រោះក្នុងបណ្ដាមូលដ្ឋានយោធារុស្សុីនៅតាមបណ្ដោយព្រំដែន ត្រូវបានបង្កើនដល់៣ដង ហើយចំនួនកងទាហានក៏បង្កើនយ៉ាងខ្លាំងដែរ ។
ប្រមុខរដ្ឋអ៊ុយក្រែនក៏រៀបរាប់ដែរពីការបង្កើនចំនួននាវាចម្បាំងរុស្សុី ក្នុងសមុទ្រAZOV និងពីការពង្រឹងវត្តមានយោធារុស្សុីនៅគ្រីមេ ជាឧបទ្វីបអ៊ុយក្រែនត្រូវក្រុងមូស្គូបញ្ចូលក្នុងដែនដីខ្លួនចាប់តាំងពី៤ឆ្នាំមកហើយ ។
នេះជាការប្រឈមមុខគ្នាខាងយោធាដោយចំហលើកដំបូង រវាងក្រុងមូស្គូនិងក្រុងកៀវចាប់តាំងពីរុស្សុីចាប់យកគ្រីមេ និងតាំងពីចាប់ផ្ដើមជម្លោះដោយអាវុធ នៅភាគខាងកើតអ៊ុយក្រែន រវាងកងទ័ពប្រទេសនេះ និងពួកបំបែកខ្លួនស្និទ្ធរុស្សុី បណ្ដាលឲ្យមនុស្សស្លាប់ជាង១០.០០០នាក់រួចហើយមក ។
ជាប់ចោទថាលួចឆ្លងកាត់ព្រំដែនរុស្សុីដោយខុសច្បាប់ នាវិកអ៊ុយក្រែន១២នាក់ ក្នុងចំណោមនាវិកទាំង២៤នាក់ដែលចាប់កាលពីថ្ងៃទី២៥ វិច្ឆិកា នាថ្ងៃទី២៧ វិច្ឆិកា ត្រូវឃុំឃាំងបណ្ដោះអាសន្នរហូតដល់ថ្ងៃទី២៥ មករា ស្របតាមការសម្រេចរបស់តុលាការក្រុង SIMFEROPOL
ទីប្រជុំជននៃតំបន់គ្រីមេ ៕
ចុចអាន ៖ ផ្ទុះភាពតានតឹងកាន់តែខ្លាំង ! អ៊ុយក្រែន ប្រើច្បាប់អាជ្ញាសឹករបស់ខ្លួនក្រោយរុស្ស៊ីចាប់នាវា៣គ្រឿង
ចែករំលែកព័តមាននេះ