ខេត្តស្ទឹងត្រែង ៖ ជនជាប់សង្ស័យម្នាក់ដែលត្រូវសមត្ថកិច្ចចាប់ខ្លួន តាមដីកាបញ្ជាឲ្យចូលរបស់អយ្យការ អមសាលាដំបូងរាជធានីភ្នំពេញ ពាក់ព័ន្ធអំពើឃាតកម្ម កាលពីវេលាម៉ោង១ រំលងអាធ្រាត្រត ថ្ងៃទី២៨ វិច្ឆិកា បានចងកធ្វើអត្តឃាតនៅក្នុងបន្ទប់ឃុំខ្លួនបណ្តោះអាសន្ន នៃស្នងការដ្ឋាននគរបាលខេត្តស្ទឹងត្រែង។ គួរបញ្ជាក់ថា កាលពីវេលាម៉ោង៥ និង២៥នាទីរសៀល ថ្ងៃទី២៧ វិច្ឆិកា នគរបាលព្រហ្មទណ្ឌខេត្តស្ទឹងត្រែង សហការជាមួយនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ និងនគរបាលមូលដ្ឋានប៉ុស្តិ៍រដ្ឋបាលស្រែឫស្សី បានធ្វើការចាប់ខ្លួនជនសង្ស័យម្នាក់ ជាឃាតកសម្លាប់មនុស្សនៅរាជធានីភ្នំពេញ ដែលគេចខ្លួនទៅខេត្ត ស្ទឹងត្រែងនោះ។
ការចាប់ខ្លួនជនសង្ស័យជាឃាតកនោះ សមត្ថកិច្ចបានអនុវត្តតាមដីកាបញ្ជាឲ្យចូលខ្លួនលេខ ៣២៦ ចុះថ្ងៃទី ១៦ វិច្ឆិកា ២០១៨ របស់លោក ស្រី ម៉ាកនី ព្រះរាជអាជ្ញារងអមសាលាដំបូងរាជធានីភ្នំពេញ។ តាមដីកាបញ្ជាឲ្យចូលខ្លួនលើជនសង្ស័យឈ្មោះ ជឹង ប៊ុននីន ហៅ ជឹង នីន ភេទប្រុស អាយុ៣៤ឆ្នាំ មុខរបរ មិនពិតប្រាកដ មានទីលំនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ពាក់ព័ន្ធប្រព្រឹត្តបទល្មើសក្នុងអំពើឃាតកម្ម។ ជនសង្ស័យត្រូវបានសមតត្ថកិច្ច កំពុងធ្វើការសាកសួរនៅ ស្នងការដ្ឋាននគរបាលខេត្តស្ទឹងត្រែង ហើយអាចនឹងប្រគល់ជូនទៅកម្លាំងនាយកដ្ឋាននគរបាលព្រហ្មទ ណ្ឌក្រសួងមហាផ្ទៃ ដើម្បីបន្តនីតិវិធី។
គួរបញ្ជាក់ថា ក្រោយពេលសាកសួរនៅដំណាក់កាល សមត្ថកិច្ចនគរបាលខេត្តស្ទឹងត្រែងចប់សព្វគ្រប់ហើយ ជនសង្ស័យត្រូវបានកម្លាំងនាយកដ្ឋានព្រហ្មទណ្ឌផ្ញើទុកនៅ ទីនោះមួយយប់ និងមានគម្រោងនាព្រឹកថ្ងៃទី២៨ វិច្ឆិកា ត្រូវនាំជនសង្ស័យមកកាន់សាលាដំបូងរាជធានីភ្នំពេញ ដើម្បីប្រគល់ជូនលោក ស្រី ម៉ាកនី ព្រះរាជអាជ្ញារងដែលកាន់សំណុំរឿងនេះ ស្រាប់តែយប់នោះជនសង្ស័យចងកសម្លាប់ខ្លួនតែម្ដង៕
ចែករំលែកព័តមាននេះ