ខេត្តមណ្ឌលគិរី ៖ មន្ត្រីនៅដែនជម្រកការពារសត្វព្រៃកែវសីមារងនឹងការមន្ទិលសង្ស័យថា កំពុងបានទទួលផលពីបទល្មើសព្រៃឈើ ដោយសារតែការអនុញ្ញាតឲ្យមានការកាប់ និងដឹកជញ្ជូនឈើចេញពីដែនគ្រប់គ្រងរបស់ខ្លួន តាមម៉ូតូរាប់សិបគ្រឿងក្នុងមួយថ្ងៃៗដូចស្រមោចពាំស្ករ ។
បើតាមសេចក្តីរាយការណ៍ដែលកោះសន្តិភាពទទួលបានជុំវិញការបែកធ្លាយនេះនៅល្ងាចថ្ងៃទី២៥ វិច្ឆិកា ហើយទុកចិត្តបំផុតនោះឲ្យដឹងថា«ឈើទាំងអស់(ដូចក្នុងរូបភាព)ដឹកចេញពីម្រេចដូង រ៉ាង ដែលជាតំបន់ស្ថិតក្នុងការគ្រប់គ្រងរបស់ស្នាក់ការពូគង់របស់ដែនជម្រកការពារសត្វព្រៃកែវសីមា ។ ប្រភពថា បានជួបក្បួនម៉ូតូកែច្នៃទាំងនេះនៅក្នុងចំការកៅស៊ូក្រោយតំបន់កាបី» ។
សេចក្តីរាយការណ៍បន្តថា«ឈើទាំងអស់ត្រូវគេកាត់រំលំនៅចំណុច ដែលគេមានផែនការទន្ទ្រានយកដី ហើយមានម៉ូតូចូលទៅដឹកមិនតិចជាង៣០គ្រឿងទេ…ដោយបានបង់ប្រាក់ឲ្យមន្ត្រីនៅស្នាក់ការពូគង់ និងប៉េអឹមដោយមិនមានមន្ត្រីស្នាក់ការណាមួយចុះទៅធ្វើការរឿងនេះឡើយ ។ប្រភពថា ក្រុមមន្ត្រីទាំងនោះក៏បើកដៃឲ្យដាក់ម៉ាស៊ីនចូលអារជាច្រើនគ្រឿង នៅចំណុចខាងលើនិងនៅត្រពាំងញាប់ ត្រពាំងខ្លុង និងស្រែអំពុយសម្រាប់កាត់ឈើ» ។
ប្រភពក្រៅផ្លូវការបានបង្ហើបថា មន្ត្រីយោធាមានឋានៈជាមេបញ្ជាការរងកងអនុសេនាធំលេខ៣ ចំណុះឲ្យវរៈកាពារព្រំដែនគោកលេខ២០៤ ខេត្តក្រចេះ ឈ្មោះតូង ជាអ្នកញុះញង់ឲ្យមានការកាប់បំផ្លាញព្រៃឈើនៅចំណុចទឹកដីឃុំស្រែឈូក ស្រុកកែវសីមា ខេត្តមណ្ឌលគិរីក្នុងរយៈពេលប៉ុន្មានសប្តាហ៍កន្លងទៅនេះ» ។
សេចក្តីរាយការណ៍ថា ឈ្មោះនេះជាអ្នកនៅពីក្រោយខ្នងក្បួនរថយន្តសាំយ៉ុងដឹកឈើហុបជ្រុង ចេញពីតំបន់ស្រែឈូក ឡើងលើផ្លូវជាតិលេខ៧៦ ចំណុចកែងក្រុមហ៊ុន ប៊ិញហ្វឿក(កែង១០៧) ឆ្ពោះទៅច្រកវ៉ាលឺ ឬច្រកត្រពាំងស្រែស្រុកស្នួល ទម្លាក់ឲ្យឧកញ៉ាម្នាក់ ក្នុងមួយយប់ៗជាច្រើនគ្រឿង ។ មួយផ្នែកទៀតគឺខាងស្រែថ្មី និងស្រែអណ្តោល ក៏មានក្បួនរថយន្តឈ្មោះនោះ លបលួចដឹកឈើលក់ឲ្យឧកញ៉ាមេឈ្មួញដុះស្លែនេះផងដែរសម្រាប់ដឹកចេញទៅស្រុកយួន ។
ប្រភពថាឈ្មោះ តូង នេះជាមុខសញ្ញាមេឈ្មួញគ្រាក់ ដែលឈរជើងក្នុងតំបន់ព្រំប្រទល់ខេត្តក្រចេះនិងមណ្ឌលគិរីយូរឆ្នាំមកហើយ ។ ដោយសារតែសំណែនដុល្លាក្រាស់ខ្មឹក ឈ្មោះនេះ ត្រូវមេកើយខាងយោធភូមិភាគ២ តែងតាំងជាមេបញ្ជាការរងកងអនុសេនាធំលេខ៣ ដែលគៀកកិតនិងតំបន់ស្រែឈូក ងាយស្រួលរូបគេបង្កើតបទល្មើសព្រៃឈើបែបនេះ ។លោក ជីប តារា ហៅតូង ដែលរងការចោទប្រកាន់កន្លងមកធ្លាប់បានប្រតិកម្មជាមួយអ្នកកាសែតថា«លោកពុំបានដឹងរឿងអ្វីនោះទេ អ្នកដែលខ្សឹបប្រាប់នោះទំនងជាអ្នករកស៊ីខ្លួនឯង ហើយទម្លាក់កំហុសដាក់រូបលោក» ។
សូមបញ្ជាក់ថា ដែនជម្រកការពារសត្វព្រៃកែវសីមា មានវិសាលភាពព្រៃឈើជាង៣០ម៉ឺនហិកតា គ្រប ដណ្តប់លើស្រុកកែវសីមា ស្រុកអូររាំង ក្រុងសែនមនោរម្យ ខេត្តមណ្ឌលគិរី នឹងមួយផ្នែកជាប់ជាមួយស្រុកស្នួល ខេត្តក្រចេះ ។ បច្ចុប្បន្នដែនជម្រកការពារសត្វព្រៃកែវសីមា ស្ថិតក្រោមការគ្រប់គ្រងរបស់លោក ព្រំ វណ្ណា ជានាយកដែនជម្រកក៏ល្បីពីការទទួលផលពេញបន្ទុកដែរ ទើបបទល្មើសកើតមានពេញបន្ទុកក្នុងតំបន់ដែលគាត់គ្រប់គ្រងបែរជាត្រជាក់ពងល្ហឹមទៅវិញ ៕
ចែករំលែកព័តមាននេះ