រាជធានីភ្នំពេញ៖ កាលពីមួយរយៈមុន លេចឮថា ចំណងស្នេហ៍រវាងតារាសម្ដែងកញ្ញា ណាតាហ្សា និងកីឡាករបាល់ទាត់ជនជាតិអាហ្វ្រិកខាងត្បូង លោកប៊យសេន បានប្រេះឆាទៅហើយ ដោយសារតែគូស្នេហ៍នាងជម្នះឲ្យនាងបោះបង់សិល្បៈ និងចង់ឲ្យនាងទៅរស់នៅជាមួយខ្លួននៅប្រទេសកំណើត…
រាជធានីភ្នំពេញ៖ កាលពីមួយរយៈមុន លេចឮថា ចំណងស្នេហ៍រវាងតារាសម្ដែងកញ្ញា ណាតាហ្សា និងកីឡាករបាល់ទាត់ជនជាតិអាហ្វ្រិកខាងត្បូង លោកប៊យសេន បានប្រេះឆាទៅហើយ ដោយសារតែគូស្នេហ៍នាងជម្នះឲ្យនាងបោះបង់សិល្បៈ និងចង់ឲ្យនាងទៅរស់នៅជាមួយខ្លួននៅប្រទេសកំណើត តែនាងបដិសេធ។ តើពួកគេបែកបាក់គ្នាមែនឬ ?
ម្នាក់ៗសម្ដែងការភ្ញាក់ផ្អើល នៅពេលដែលណាតាហ្សា បណ្ដើរគូស្នេហ៍យ៉ាងស្និទ្ធស្នាលក្នុងពិធីសម្ពោធរឿង«ឃ្លាតទៅសែនឆ្ងាយ»កាលពីថ្ងៃទី១៩ វិច្ឆិកា ២០១៨ ។ អ្នកទាំងពីរមិនត្រឹមតែផ្អែមល្ហែមមិនខុសគ្នាកាលពីមិនទាន់មានព័ត៌មានប្រេះឆាប៉ុណ្ណោះទេ ប៉ុន្តែបានពញ្ញាក់អារម្មណ៍អ្នកសង្ស័យថាចំណងស្នេហ៍របស់នាង និងគូស្នេហ៍មានរឿងល្អក់កករ ។ រូបភាពនោះបង្ហាញឲ្យឃើញថា អ្នកទាំងពីរត្រលប់មកត្រូវគ្នាវិញហើយ បន្ទាប់ពីមួយរយៈហាក់មានគំនិតមិនត្រូវគ្នា ហើយលោកប៊យសេន មិនក៏មិនសូវតាមនាងស្អិតដូចមុន ។
តារាសម្ដែងណាតាហ្សា និយាយថា រវាងនាង និងសង្សារ សោះអង្គើយដាក់គ្នាមួយរយៈធំមកហើយ ជាពិសេសនៅពេលដែលលោកទាមទារឲ្យនាងដើរឆ្ងាយពីសិល្បៈដែលនាងប្រកាសថាមិនអាចធ្វើតាមបាន។ ចំណងស្នេហ៍របស់នាង និងគូស្នេហ៍ត្រលប់មកល្អូកល្អិន ដោយនាង និងលោកបានបណ្ដើរគ្នា ហើយហ៊ានបង្ហាញភាពស្និទ្ធស្នាលក្នុងពិធីបង្ហាញខ្លួននោះ។
ទោះជាយ៉ាងណាមិញ នាងថាមិនទាន់គិតពីគម្រោងរៀបការនៅឡើយទេ ដោយសារតែខ្លាចស្ថានភាពស្នេហាលេងឫកដាក់គ្នាទៅវិញទៅមក ហើយធ្វើឲ្យមានរឿងប្រេះឆា ឬខ្វែងគំនិតគ្នាជាថ្មី ។ ណាតាហ្សានិយាយថា មកពីលោកប៊យសេន ស្រឡាញ់ពេញចិត្តចំពោះនាងខ្លាំងពេកនោះហើយ ទើបធ្វើឲ្យភាពល្អប្រសើរកន្លងមកមានរឿងរកាំរកូស ព្រោះតែការប្រច័ណ្ឌ និងហួងហែង ។
ណាតាហ្សារំពឹងថាស្ថានភាពដូចដើមនៃស្នេហារបស់នាងនឹងកាន់តែធ្វើឲ្យនាង និងសង្សារយល់ចិត្តថ្លើមគ្នា ដោយសារតែក្នុងពេលនេះលោកហាក់យល់ពីការចង់បានរបស់នាងច្រើនខុសពីមុន ដោយការប្រច័ណ្ឌហួងហែង និងមិនចង់ឲ្យប្រឡូកក្នុងសិល្បៈក៏មិនមានដូចមុន ។
ណាតាហ្សានិយាយថា«យើងទាំង២នឹងបន្តសាងស្នេហ៍មួយនេះឲ្យបានរឹងមាំដើម្បីកុំឲ្យមានគេចាំចំអក ហើយសង្ឃឹមថាយើងស្រឡាញ់គ្នារៀងរហូត ។ នាងខ្ញុំមិនចង់ក្លាយជានារីប្តូរស្នេហ៍ច្រើននោះទេគឺចង់បានស្នេហ៍មួយទល់មួយប៉ុណ្ណោះ»៕
ចែករំលែកព័តមាននេះ