ទីក្រុងសេអ៊ូល ៖ វិទ្យាស្ថានសេដ្ឋកិច្ច និងពាណិជ្ជកម្មឧស្សាហកម្មកូរ៉េ (KIET) ដែលជាក្រុមជំនាញមួយបាននិយាយកាលពីថ្ងៃចន្ទមកថា សេដ្ឋកិច្ចរបស់ប្រទេសកូរ៉េខាងត្បូងនឹងលូតលាស់បាន២,៦%នៅឆ្នាំ២០១៩ ព្រោះតែការអន់ថយនៃការនាំចេញ និងការធ្លាក់ចុះនៃតម្រូវការក្នុងស្រុកជាដើម ។
វិទ្យាស្ថានខាងលើក៏បានបន្ទាបការព្យាករលើផលិតផលក្នុងស្រុកសរុប(GDP)ពី៣%មកស្មើនឹង២,៧%ផងដែរកាលពីខែមិថុនា ។ វិទ្យាស្ថាននេះបានឲ្យដឹងថា ពួកគេបានបន្ទាប់ការព្យាករនេះ ព្រោះតែភាពតានតឹងផ្នែកពាណិជ្ជកម្មជុំវិញពិភពលោក ការរឹតបន្តឹងផ្នែករូបិយប័ណ្ណក្នុងប្រទេសធំៗ និងភាពមិនប្រាកដប្រជាក្នុងទីផ្សារសំខាន់ៗថ្មីៗ ។
KIET បាននិយាយក្នុងរបាយការណ៍ទស្សនវិស័យសេដ្ឋកិច្ចឆ្នាំ២០១៩របស់ខ្លួនថា ៖« សេដ្ឋកិច្ចរបស់កូរ៉េខាងត្បូងអាចនឹងលូតលាស់ក្នុងអត្រាទាបជាងមុននៅឆ្នាំ២០១៩ ដោយស្របទៅនឹងការអន់ថយនៃការនាំចេញ និងការធ្លាក់ចុះនៃការវិនិយោគ រួមជាមួយនឹងតម្រូវការក្នុងស្រុកដែលនៅមានកម្រិតជាដើម »។
ក្រុមជំនាញនេះបាននិយាយថា សេដ្ឋកិច្ចរបសកូរ៉េនឹងជួបបរិស្ថានអាជីវកម្មមិនល្អ ខណៈដែលជួបនឹងកំណើនគោលនយោបាយការពារនិយម ការអន់ថយនៃសេដ្ឋកិច្ចចិន និងកំណើនការឡើងចុះផ្នែកហិរញ្ញវត្ថុក្នុងសេដ្ឋកិច្ចសំខាន់ៗថ្មីៗ ។
ក្នុងប្រទេសវិញ ការបង្កើនអត្រាការប្រាក់ដោយធនាគារជាតិកូរ៉េ ទីផ្សារការងារដែលតូចចង្អៀត និងការអន់ថយនៃការវិនិយោគដោយក្រុមហ៊ុនក្នុងស្រុកគឺជាហានិភ័យដែលអាចប៉ះពាល់ដល់ការលូតលាស់ ។
វិទ្យាស្ថាននេះព្យាករណ៍ទៀតថា ប្រទេសកូរ៉េខាងត្បូងនឹងនាំចេញបានច្រើនជាងឆ្នាំនេះ ៣,៧% នៅឆ្នាំ២០១៩មកស្មើ៦៣៣ប៊ីលានដុល្លារ ខណៈដែលការនាំចូលអាចនឹងកើនឡើង ៤,៥% មកស្មើ៥៥៩ប៊ីលានដុល្លារផងដែរ ៕
ចែករំលែកព័តមាននេះ