ខេត្តស្វាយរៀង ៖ សមត្ថកិច្ចកងរាជអាវុធហត្ថចុះបង្ក្រាបក្រុមជនសង្ស័យលួច និងឆក់ចំនួន១១នាក់ដែលធ្វើសកម្មភាពលួច និងឆក់យ៉ាងសកម្មនៅក្នុងខេត្តស្វាយរៀងត្រូវបានបង្ក្រាប និងធ្វើការបង្ហាញមុខក្រុមជនសង្ស័យទាំង១១នាក់នៅព្រឹកថ្ងៃទី២៨ ខែវិច្ឆិកា ឆ្នាំ២០១៨នេះ នៅទីបញ្ជាការដ្ឋានកងរាជអាវុធហត្ថខេត្តស្វាយរៀងដើម្បីកសាងសំណុំរឿងបញ្ជូនទៅតុលាការខេត្តស្វាយរៀងចាត់ការតាមនីតិវិធី។
បើតាមលោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្តស្វាយរៀងបានដឹងថា យោងតាមពាក្យបណ្តឹងរបស់ជនរងគ្រោះឈ្មោះឡុង ហ្គីម ភេទប្រុស អាយុ៣០ឆ្នាំ ជាជនជាតិវៀតណាម ស្នាក់នៅបន្ទប់ជួលលេខ៨ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត បានឲ្យដឹងថា នៅវេលាម៉ោង៩និង៣០នាទីយប់ថ្ងៃទី២៣ ខែវិច្ឆិកា ឆ្នាំ០១៨ មានជនក្រុមសង្ស័យ ឈ្មោះហេង ឈ្មោះត្រា ឈ្មោះចន្តា និងបក្ខពួកមួយចំនួនទៀតបានធ្វើសកម្មភាពឆក់កាបូបរបស់ខ្លួននៅក្រុងបាវិត។
ក្រោយពីទទួលបានព័ត៌មាន និងពាក្យបណ្តឹងភ្លាមខាងលលើ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានដាក់បទបញ្ជាយ៉ាងម៉ឺងម៉ាត់ទៅកម្លាំងមន្ទីរយុត្តិធម៌សហការជាមួយកម្លាំងមូលដ្ឋានកងរាជអាវុធហត្ថក្រុងបាវិតដឹកនាំដោយលោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្តព្រមទាំងមានការសម្របសម្រួលពីលោកគង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀងចុះស្រាវជ្រាវបង្ក្រាប និងឃាត់ខ្លួនក្រុមជនសង្ស័យលួច និងឆក់ជាបន្តបន្ទាប់ រួមនឹងអ្នកទទួលទិញផលចោរកម្មកាលពីវេលាម៉ោង២និង១០នាទីរសៀលថ្ងៃទី២៥ វិច្ឆិកា ឆ្នាំ២០១៨ ឃាត់ខ្លួនបានចំនួន១១នាក់។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ