តម្លៃប្រេងបន្ដធ្លាក់ចុះ ខណៈមានកង្វល់ពីការផ្គត់ផ្គង់លើស
ទីក្រុងវ៉ាស៊ីនតោន ៖ តម្លៃប្រេងបានធ្លាក់ចុះសាជាថ្មីម្តងទៀត បន្ទាប់ពីបានធ្លាក់ចុះអស់៦សប្តាហ៍កន្លងមកនេះ ។ តម្លៃប្រេងរបស់ក្រុមហ៊ុន West Texas Intermediate (WTI)…
ទីក្រុងវ៉ាស៊ីនតោន ៖ តម្លៃប្រេងបានធ្លាក់ចុះសាជាថ្មីម្តងទៀត បន្ទាប់ពីបានធ្លាក់ចុះអស់៦សប្តាហ៍កន្លងមកនេះ ។ តម្លៃប្រេងរបស់ក្រុមហ៊ុន West Texas Intermediate (WTI) និងតម្លៃប្រេងរបស់ Brent បានធ្លាក់ចុះអស់១០,៧% និង១១,៩%ទៅហើយកាលពីសប្តាហ៍មុន ។ នៅសប្តាហ៍មុនមួយទៀត តម្លៃប្រេងរបស់ WTI និង Brent បានធ្លាក់ចុះអស់៦,២% និង៤,៩% ស្មើ៥៦,៤៦ដុល្លារក្នុង១ធុង និង ៦៦,៧៦ដុល្លារក្នុង១ធុង រៀងគ្នា ។
កាលពីថ្ងៃចន្ទដើមសប្ដាហ៍នេះ តម្លៃប្រេងបានកើនឡើងបន្តិច ខណៈដែលចំនួនប្រេងស្តុកទុកបានធ្លាក់ចុះ និងសហភាពអឺរ៉ុបគាំទ្រការសម្រេចចិត្តរបស់ប្រទេសបារាំងក្នុងការដាក់ទណ្ឌកម្មសេដ្ឋកិច្ចលើប្រទេសអុីរ៉ង់ ។
ប៉ុន្តែនៅថ្ងៃអង្គារម្សិលមិញ តម្លៃប្រេងបែរជាធា្លក់ចុះវិញ ព្រោះលោកប្រធានាធិបតីដូណាល់ ត្រាំ (Donald Trump) បញ្ជាក់ថា អារ៉ាប៊ីសាអូឌីត គឺជាសម្ព័ន្ធមិត្តដ៏សំខាន់ និងផ្តល់សញ្ញាថា នឹងមិនផ្តន្ទាទោសព្រះរាជបុត្ររបស់ប្រទេសនេះទាក់ទិននឹងឃាតកម្មអ្នកសារព័ត៌មាន Jama Khashoggi ឡើយ ។
យោងតាមរដ្ឋបាលព័ត៌មានថាមពលអាមេរិកដែលបាននិយាយក្នុងរបាយការណ៍មួយកាលពីថ្ងៃពុធសប្ដាហ៍មុន បានឲ្យដឹងថា ចំនួនប្រេងស្តុកទុកសម្រាប់លក់របស់សហរដ្ឋអាមេរិកបានកើនឡើង៤,៩លានធុងផងដែរ ។
រដ្ឋបាលខាងលើបានព្យាករណ៍ដែរថា ផលិតកម្មប្រេងក្នុងសហរដ្ឋអាមេរិកកាលពីពីរសប្តាហ៍មុនស្មើ១១,៧លានធុងក្នុង១ថ្ងៃ និងបានឲ្យដឹងទៀតថា តម្លៃប្រេងឥន្ធនៈជាមធ្យមក្នុងប្រទេសនេះនាពេលបុណ្យ Thanksgiving បានកើនដល់កម្រិតខ្ពស់ជាងគេក្នុងពេល៣ឆ្នាំមកនេះ ។
របាយការណ៍ខាងលើក៏បានឲ្យដឹងថា ស្ថានការណ៍បច្ចុប្បន្នកាន់តែធ្ងន់ធ្ងរឡើងទៅទៀតព្រោះចំនួនប្រេងស្តុកទុករបស់អាមេរិកបានកើនឡើងសាជាថ្មីដល់សប្តាហ៍ទី៩ជាប់ៗគ្នាមកហើយ ។
ទីផ្សារបន្តតាមដានតម្លៃប្រេងអាមេរិកព្រោះតែមានកង្វល់ថាការផ្គត់ផ្គង់លើសលប់នឹងធ្វើឲ្យតម្លៃភាគហ៊ុនក្រុមហ៊ុនប្រេងធ្លាក់ចុះ ។ ជាមួយគ្នានេះផងដែរ OPEC នឹងពិភាក្សាពីការកាត់បន្ថយទិន្នផលប្រេង បន្ទាប់ពីកិច្ចប្រជុំនៅថ្ងៃទី៦ខែធ្នូខាងមុខនេះ ៕
ចែករំលែកព័តមាននេះ