តាមលោកគ្រូហុងស៊ុយបានណែនាំថា ការតាំងតម្កល់ព្រះភូមិឬរានទេវតាជាជំនឿមួយមានតាំងពីបុរមបុរាណមកម្ល៉េះ ។ ព្រះភូមិនេះគេនិយមដំឡើងទុកនៅជ្រុងណាមួយនៃបរិវេណទីធ្លាខាងមុខផ្ទះ ដើម្បីជាទីសណ្ឋិតនៃវត្ថុស័ក្តិសិទ្ធិ ឬបារមីណាមួយដែលគេជឿថា ជាអ្នកឃ្លាំចាំថែរក្សាគ្រួសារ និងនាំលាភ នាំទ្រព្យចូលផ្ទះ ។ ប៉ុន្តែការតាំងព្រះភូមិទុកនៅទីណាមួយនោះមានចំណុច គួរប្រុងប្រយ័ត្នដូចតទៅ៖
១-រានទេវតាមិនត្រូវដំឡើងចំថ្ងៃមិនល្អនៃរាសីម្ចាស់ផ្ទះនោះទេ តាមធម្មតាឆ្នាំនីមួយៗតែងមានថ្ងៃហុងស៊ុយរបស់ខ្លួន ឧទាហរណ៍ៈ ឆ្នាំជូត ហុងស៊ុយចំថ្ងៃពុធ ដូច្នេះការធ្វើពិធីផ្សេងៗដែលទាក់ទងទៅនឹងរាសី ត្រូវជ្រើសរើសយកថ្ងៃនេះជារឿងប្រសើរបំផុត ព្រោះតាមជំនឿគេឱ្យជ្រើសយកថ្ងៃលាភ ថ្ងៃជ័យ ថ្ងៃនៃសេចក្តីសុខក្នុងរាសីរបស់ម្ចាស់ផ្ទះទើបក្រោយពេលដំឡើងរានទេវតារួចរកស៊ីមានបានសមទៅតាមបំណងប្រាថ្នា ។
២-នៅមុខរានទេវតាហាមបែរមកចំទល់មុខគ្នានឹងតួផ្ទះ ព្រោះនឹងនាំមកនូវវិបត្តិឱ្យខ្មោចនាំចង្រៃចូលផ្ទះសម្បែងរស់នៅចេះតែមានរឿងរកាំរកូស ឬរកស៊ីមិនឡើង ។
៣-ហាមមិនឱ្យ ស្រមោលរានទេវតាសង្កត់លើផ្ទះ ឬស្រមោលផ្ទះសង្កត់លើរានទេវតា បើតាមជំនឿថា នឹងធ្វើឱ្យក្នុងផ្ទះទាំងមូលនេះមានវិញ្ញាណពួកអមនុស្សជ្រៀតចូល ជាហេតុនាំឱ្យជីវិតជួបតែបញ្ហាទុក្ខព្រួយស្ទើរមិនលស់ថ្ងៃ ។
សូមបញ្ជាក់ផងដែរថា នៅពេលដំឡើងព្រះភូមិគួរម្ចាស់ផ្ទះរកតាអាចារ្យ ដើម្បីប្រារឰពិធីអញ្ជើញបារមី អញ្ជើញវិញ្ញាណមកសណ្ឋិតគ្រប់គ្រងនៅទីនោះ។ គួររៀបចំលើកឱ្យមានកម្ពស់ខ្ពស់ជាងក្បាលបន្តិចទើបល្អ ដែលការធ្វើពិធីអញ្ជើញវិញ្ញាណឱ្យមកសណ្ឋិតនៅក្នុងរានទេវតា នេះចាត់ទុកថា ជាការហៅបារមីដែលត្រឹមត្រូវ អញ្ជើញវិញ្ញាណដែលល្អឱ្យមកជួយថែរក្សាម្ចាស់ផ្ទះឱ្យបានសុខសប្បាយ រកទទួលទានមានបាន នាំលាភ នាំទ្រព្យចូលផ្ទះសម្បែងហូរហៀរ ។
ចែករំលែកព័តមាននេះ