ខេត្តកំពត ៖ ស្ត្រីម្នាក់ជួបគ្រោះអកុសលស្លាប់យ៉ាងអាណោចអាធម័នៅក្នុងបន្ទប់ទឹកដោយឆក់ខ្សែភ្លើង បណ្តាលឱ្យស្លាប់ដោយគ្មានអ្នកណាដឹង កាលពីវេលាម៉ោង៩និង១៥នាទីព្រឹកថ្ងៃទី២៧ ខែវិច្ឆិកា ឆ្នាំ២០១៨ ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ។
ជនរងគ្រោះដែលស្លាប់ឈ្មោះស៊ឹម ទី ភេទស្រី អាយុ៤២ឆ្នាំ មុខរបរមេផ្ទះ មានទីលំនៅក្នុងភូមិ-ឃុំកើតហេតុខាងលើ ។
ស្ត្រីរងគ្រោះមានកូននៅក្នុងបន្ទុកចំនួន២នាក់ កូនប្រុសច្បងមានអាយុ១៩ឆ្នាំ រៀនបរិញ្ញាប័ត្រនៅរាជធានីភ្នំពេញ និងកូនស្រីប្អូនមានអាយុ១ខួបកន្លះ ចំណែកប្តីមានអាយុ៤៥ឆ្នាំ ជាមន្ត្រីធ្វើការនៅមន្ទីរអភិវឌ្ឍន៍ជនបទខេត្តកំពត។
យោងតាមប្រភពពត៌មានពីបុរសម្នាក់ជាបងថ្លៃបានឲ្យដឹងថា ស្ត្រីរងគ្រោះគឺជាប្អូនថ្លៃរបស់គាត់ដែលជួបគ្រោះអកុសលហើយបានស្លាប់តែម្នាក់ឯងគ្មានអ្នកណាដឹង ។
បើតាមសមត្ថកិច្ចជំនាញដែលចុះទៅពិនិត្យធ្វើកោសល្យវិច្ច័យបានឲ្យដឹងថា ពេលប្តីចេញទៅធ្វើការបានបន្តិច ស្ត្រីរងគ្រោះបានចូលបន្ទប់ទឹក ទំនងជាងងឹតមុខចង់ដួល រួចដៃស្រវ៉ាចាប់ជញ្ជាំងក៏ប៉ះចំខ្សែ ហើយក៏ដាច់ខ្សែភ្លើងនោះ រួចឆក់បណ្តាលឱ្យស្លាប់តែម្នាក់ឯងនៅនឹងមាត់ទ្វារបន្ទប់ទឹកដោយគ្មានអ្នកដឹង។
លុះម៉ោង៩និង១៥ ព្រឹកថ្ងៃដដែល ទើបប្អូនស្រីជីដូនមួយដែលផ្ទះនៅជិតគ្នាដើរមកផ្ទះបងស្រី តែមិនឃើញបងស្រីនៅក្នុងផ្ទះក៏ដើរមកបន្ទប់ទឹកស្រាប់តែឃើញបងស្រីដេកស្លាប់នៅក្នុងបន្ទប់ទឹកដោយមានទាំងខ្សែភ្លើងដែលដាច់នៅជាប់នឹងខ្លួនទៀតផង ទើបស្រែកឆោឡោបង្កឱ្យមានការភ្ញាក់ផ្អើល ហៅអ្នកជិតខាងឲ្យមកជួយសង្គ្រោះ ។
ពេលនោះបងប្អូនជិតខាង និងក្រុមគ្រួសារមិនអស់ចិត្តបានដឹកស្ត្រីរងគ្រោះមកកាន់មន្ទីរពេទ្យដើម្បីជួយសង្គ្រោះដែរ ប៉ុន្តែចូលដល់មន្ទីរពេទ្យត្រូវបានក្រុមគ្រូពេទ្យប្រាប់ថា ជនរងគ្រោះបានស្លាប់តាំងពីនៅកន្លែងកើតហេតុមកម្ល៉េះ។
រួចហើយក៏ដឹកសពស្ត្រីរងគ្រោះមកលំនៅដ្ឋានរបស់បងថ្លៃជីដូនមួយដើម្បីរៀបចំធ្វើបុណ្យតាមប្រពៃណី។
ទិដ្ឋភាពនៅក្នុងលំនៅឋាននៃសព គេឮសូរសំឡេងស្រែកទ្រហ៊ោយំសោកស្តាយស្ត្រីរងគ្រោះពីសំណាក់
ក្រុមគ្រួសារ និងសាច់ញាតិគួរឲ្យសង្វែគជាពន់ពេកណាស់ ៕
ចែករំលែកព័តមាននេះ