ខេត្តតាកែវ ៖ យ៉ាងហោចណាស់ ជនជាតិចិនប្រុស-ស្រីចំនួន២៣៥នាក់ ត្រូវបានឃាត់ខ្លួននៅ៤កន្លែងខុសៗគ្នា គឺនៅស្រុកត្រាំកក់២កន្លែង និងស្រុកបាទី២កន្លែង កាលពីវេលាម៉ោង៩និង៣០នាទីព្រឹកថ្ងៃទី២៦ វិច្ឆិកាកន្លងទៅ ។…
ខេត្តតាកែវ ៖ យ៉ាងហោចណាស់ ជនជាតិចិនប្រុស-ស្រីចំនួន២៣៥នាក់ ត្រូវបានឃាត់ខ្លួននៅ៤កន្លែងខុសៗគ្នា គឺនៅស្រុកត្រាំកក់២កន្លែង និងស្រុកបាទី២កន្លែង កាលពីវេលាម៉ោង៩និង៣០នាទីព្រឹកថ្ងៃទី២៦ វិច្ឆិកាកន្លងទៅ ។ ការចាប់ខ្លួនជនជាតិចិននេះ ធ្វើឡើងក្រោមកិច្ចសហប្រតិបត្តិការរវាងក្រុមកងសន្តិសុខរបស់ចិន ជាមួយកងកម្លាំងនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិ ដឹកនាំដោយលោកឧត្តមសេនីយ៍ឯក អុី សុខឃី និងមានការចូលរួមពីនគរបាលនៃស្នងការដ្ឋានខេត្ត ។
នេះគឺជាប្រតិបត្តិការទ្រង់ទ្រាយធំមួយ ដោយបានប្រើប្រាស់កងកម្លាំងនគរបាលរាប់សិបនាក់ និងមានការចូលរួមសម្របសម្រួលនីតិវិធីដោយលោក ទេព មុនិន ព្រះរាជអាជ្ញារង និងលោក ឃុន ភឿន ព្រះរាជអាជ្ញាអមសាលាដំបូងខេត្ត ។ ក្រុមជនជាតិចិនទាំងនេះ ត្រូវបានចោទប្រកាន់ពីបទលួចចូលមកធ្វើសកម្មភាពជំរិតទារប្រាក់តាមប្រព័ន្ធអុីនធើរណេត ។
លោកឧត្តមសេនីយ៍ទោ សុខ សំណាង ស្នងការនគរបាលខេត្ត បានឱ្យដឹងថា ការឡោមព័ទ្ធចាប់ជនជាតិចិនជំរិតទារប្រាក់ តាមប្រព័ន្ធអុីនធើរណេតក្នុងពេលនេះ គឺជាប្រតិបត្តិការធំមួយមិនធ្លាប់មានក្នុងភូមិសាស្ត្រខេត្តតាកែវ ដោយធ្វើលើគោលដៅចំនួន៤ ក្នុងស្រុក២នាពេលតែមួយ និងបានឃាត់ខ្លួនជនជាតិចិនសរុបចំនួន២៣៥នាក់ ក្នុងនោះស្រី៣៦នាក់ ។
ទីកន្លែងទាំង៤ដែលសមត្ថកិច្ចធ្វើការបង្ក្រាបមាន ៖ ទី១-នៅភូមិបុស្សតាផង់ ឃុំត្រពាំងគ្រញូងស្រុកត្រាំកក់ ឃាត់ខ្លួនជនជាតិចិនចំនួន៦៣នាក់(ស្រី៧នាក់) ។ ទី២-នៅភូមិបុស្សតាផង់ដែរតែផ្ទះខុសគ្នា ឃុំត្រពាំងគ្រញូង ស្រុកត្រាំកក់ ឃាត់ខ្លួនជនជាតិចិនចំនួន១២នាក់(ប្រុសទាំងអស់) ។ ទី៣-នៅភូមិតាំងដូង ឃុំតាំងដូង ស្រុកបាទី ឃាត់ខ្លួនជនជាតិចិនចំនួន៧០នាក់(ស្រី២៤នាក់) ។ ទី៤-នៅភូមិព្រៃក្រាយ ឃុំតាំងដូង ស្រុកបាទី
ឃាត់ខ្លួនជនជាតិចិនចំនួន៩០នាក់(ស្រី៥នាក់) ។
ជាមួយនឹងការឃាត់ខ្លួននេះ សមត្ថកិច្ចក៏បានដកហូតសម្ភារសម្រាប់ធ្វើសកម្មភាពមួយចំនួន ដើម្បីកសាងសំណុំរឿងតាមនីតិវិធី ។ ចំណែកជនជាតិចិនទាំង២៣៥នាក់ ត្រូវបានបញ្ជូនទៅកាន់នាយកដ្ឋានអន្តោប្រវេសន៍ ក្រសួងមហាផ្ទៃ ។
បើតាមសមត្ថកិច្ចឱ្យដឹងថា ការជំរិតទារ ប្រាក់តាមប្រព័ន្ធអុីនធើរណេតរបស់ក្រុមសង្គមងងឹតជនជាតិចិនទាំងនេះ គឺធ្វើតាមប្រព័ន្ធវីអូអាយភី(VOIP) ទៅប្រទេសចិនវិញ ដែលបទល្មើសបែបនេះតែងកើតមានកន្លងមក និងមានការចាប់ខ្លួនជាច្រើនរយនាក់ផងដែរ តាមរយៈសមត្ថកិច្ចចិនស្រាវជ្រាវតាមចាប់ដល់ប្រទេសកម្ពុជា ដែលពួកគេមកសម្ងំធ្វើសកម្មភាពដោយសហការជាមួយអាជ្ញាធរកម្ពុជាយើង ៕
ចែករំលែកព័តមាននេះ