រាជធានីភ្នំពេញ ៖ កាលពីព្រឹកថ្ងៃទី២៦ ខែវិច្ឆិកា មានហេតុការណ៍ភ្ញាក់ផ្អើលមួយបានកើតឡើង ដោយមានចោរមួយក្រុមធ្វើសកម្មភាពលួចយកទូដែកមួយ ដែលនៅក្នុងនោះមានរបស់មានតម្លៃជាច្រើន បើគិតជាទឹកប្រាក់សរុបប្រមាណជាង៣០ម៉ឺនដុល្លារពីក្នុងផ្ទះវីឡាមួយលេខD២៩ ផ្លូវD ក្នុងបុរីចំការមន…
រាជធានីភ្នំពេញ ៖ កាលពីព្រឹកថ្ងៃទី២៦ ខែវិច្ឆិកា មានហេតុការណ៍ភ្ញាក់ផ្អើលមួយបានកើតឡើង ដោយមានចោរមួយក្រុមធ្វើសកម្មភាពលួចយកទូដែកមួយ ដែលនៅក្នុងនោះមានរបស់មានតម្លៃជាច្រើន បើគិតជាទឹកប្រាក់សរុបប្រមាណជាង៣០ម៉ឺនដុល្លារពីក្នុងផ្ទះវីឡាមួយលេខD២៩ ផ្លូវD ក្នុងបុរីចំការមន ស្ថិតនៅតាមមហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន ។
សកម្មភាពចោរកម្មនេះ បានកើតឡើងខណៈបុរសជាម្ចាស់វីឡាដែលជាជនជាតិចិន បាននាំក្រុមគ្រួសារទៅដើរលេងនៅក្រៅប្រទេស ដោយទុកឱ្យស្ត្រីជាអ្នកបម្រើការងារក្នុងផ្ទះម្នាក់នៅចាំផ្ទះ តែនាងអ្នកបម្រើនោះក៏បានចាក់សោផ្ទះរួចចេញទៅបាត់ដែរ ។
ប្រភពព័ត៌មានពីសមត្ថកិច្ចបានឱ្យដឹងថា ម្ចាស់វីឡានេះឈ្មោះ លី ថាវ ភេទប្រុស អាយុ៤១ឆ្នាំ ជាពាណិជ្ជ
ករ ។ កាលពីព្រឹកថ្ងៃទី២១ ខែវិច្ឆិកា ដែលជាថ្ងៃទី១នៃពិធីបុណ្យអុំទូក បុរសរូបនេះបាននាំប្រពន្ធកូនធ្វើដំណើរទៅដើរលេងនៅខេត្តកោះកុង និងបន្តទៅលេងនៅប្រទេសថៃទៀត រយៈពេលជាច្រើនថ្ងៃ ដោយទុកឲ្យស្ត្រីជាអ្នកបម្រើការងារក្នុងផ្ទះម្នាក់ឈ្មោះ ដា ធារី អាយុ៣០ឆ្នាំ នៅចាំផ្ទះម្នាក់ឯង ។ លុះនៅវេលាម៉ោងជាង១២ថ្ងៃត្រង់ថ្ងៃដដែលនោះ ក្រោយពីធ្វើការបោសសម្អាតផ្ទះរួចរាល់ហើយ ស្ត្រីបម្រើរូបនេះក៏
បានចាក់សោទ្វារផ្ទះ ទ្វាររបង រួចចេញទៅលេងផ្ទះរបស់នាងនៅឯស្រុកកៀនស្វាយ ខេត្តកណ្តាល តាមក្រោយដែរ ។
តាមប្រភពដដែលបន្តទៀតថា ក្រោយពីពិធីបុណ្យអុំទូកបញ្ចប់ នៅថ្ងៃទី២៤ ខែវិច្ឆិកា ស្ត្រីជាអ្នកបម្រើការងារផ្ទះរូបនោះត្រឡប់មកវិញ ស្រាប់តែប្រទះឃើញសោវីឡា កូនសោរបងឃើញនៅលើកៅអីខាង ក្រៅ និងទ្វារផ្ទះ គ្រាន់តែបិទមិនចាក់សោនោះទេ ។ លុះនាងរត់ឡើងទៅលើផ្ទះឃើញបាត់ទូដែកពីក្នុងបន្ទប់ ទើបទូរស័ព្ទទៅប្រាប់អ្នកបកប្រែម្នាក់ឱ្យទូរស័ព្ទទៅប្រាប់បុរសជនជាតិចិនជាម្ចាស់ផ្ទះឱ្យបានដឹងពីរឿងនេះ និងរាយការណ៍ទៅកម្លាំងមានសមត្ថកិច្ចមូលដ្ឋានផងដែរ ។
នៅព្រឹកថ្ងៃទី២៦ ខែវិច្ឆិកា កម្លាំងសមត្ថកិច្ចមូលដ្ឋានបានទៅដល់វីឡាដែលចោរចូលលួចទូដែកនោះ ដើម្បីសាកសួរ និងត្រួតពិនិត្យកន្លែងកើតហេតុ ព្រមទាំងទទួលពាក្យបណ្តឹងពីបុរសជនជាតិចិនដែលជាម្ចាស់ផ្ទះខាងលើនេះ ។
ប្រភពដដែលបានបញ្ជាក់់ឱ្យដឹងថា ទ្រព្យសម្បត្តិជាច្រើននៅក្នុងទូដែកដែលបាត់បង់នោះរួមមានចិញ្ចៀនពេជ្រមួយវង់មានតម្លៃ១៥.០០០ដុល្លារ កងដៃពេជ្រតម្លៃ១ម៉ឺនដុល្លារចំនួន១ ក្រវិលដាំត្បូង១គូតម្លៃ៣ម៉ឺនដុល្លារ ចិញ្ចៀនខ្សែក ធ្វើពីលោហធាតុពណ៌.សមួយចំនួនមានតម្លៃ១ម៉ឺនដុល្លារ នាឡិកាដៃ៤គ្រឿងតម្លៃសរុប១៦ម៉ឺនដុល្លារ បង្កាន់ដៃអចលនទ្រព្យជាច្រើនសន្លឹក រួមទាំងវត្ថុមានតម្លៃផ្សេងៗជាច្រើនទៀតដែលមានតម្លៃសរុបប្រមាណរហូតដល់ជាង៣០ម៉ឺនដុល្លារត្រូវបានចោរលួចយកទៅបាត់ ។
ក្រោយពីទទួលបានពាក្យបណ្តឹងពីសំណាក់បុរសជនជាតិចិន ជាម្ចាស់ផ្ទះវីឡាខាងលើ កាលពីព្រឹកថ្ងៃទី២៦ ខែវិច្ឆិការួចហើយ នៅព្រឹកថ្ងៃទី២៧ ខែវិច្ឆិកា គណៈកម្មការចម្រុះមួយក្រុម ក៏បានចុះទៅផ្ទះកើតហេតុខាងលើនេះ ដើម្បីធ្វើការត្រួតពិនិត្យ និងស្រាវជ្រាវតាមចាប់ខ្លូនក្រុមជនសង្ស័យ ដែលបានធ្វើសកម្មភាពលួចយកទូដែកមានទម្ងន់ជាង៥០គីឡូក្រាមពីក្នុងវីឡាខាងលើ ។
សមត្ថកិច្ចមិនទាន់ធ្វើការសន្និដ្ឋានបែបណាមួយនៅឡើយទេ តែអ្នកតាមដានជុំវិញសំណុំរឿងចោរលួចទូដែកនេះបានដាក់ជាចម្ងល់ថា ចោរទាំងនោះអាចកំណត់មុខសញ្ញាអ្វីក៏ច្បាស់ម្ល៉េះ គឺលួចតែទូដែកគ្រប់
គ្រាន់ មិនចាំបាច់យករបស់របរផ្សេងនោះ?
ចែករំលែកព័តមាននេះ