លោក ហ៊ុន ម៉ានី បង្ហាញពីមោទភាពចំពោះសមិទ្ធផល(ស.ស.យ.ក) ទទួលបានក្នុងរយៈពេល៤ឆ្នាំ
- ភ្នំពេញ
រាជធានីភ្នំពេញ ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ណនៅថ្ងៃទី២៧ ខែវិច្ឆិកា ២០១៨ លោក…
រាជធានីភ្នំពេញ ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ណនៅថ្ងៃទី២៧ ខែវិច្ឆិកា ២០១៨ លោក ហ៊ុន ម៉ានី បង្ហាញមោទនភាពចំពោះសមទ្ធផល ស.ស.យ.ក បំបែកកំណត់ត្រា ពិភពលោក ខណៈមានគេរិះគន់ពីសកម្មជនអតីតគណបក្សប្រឆាំង និងការបូកសរុបការងាររបស់ ស.ស.យ.ក ឆ្នាំ(២០១២.២០១៨) ដើម្បីលើកទិសដៅការងារបន្តឆ្នាំ២០១៨-២០២៣។ ការលើកឡើងរបស់លោកប្រធាន ស.ស.យ.ក នៅក្នុងសន្និបាទលើកទី៤ តំណាងទូទាំងប្រទេសនៅ សណ្ឋាគារ សុខាជ្រោយចង្វា។ លោក ហ៊ុន ម៉ានី បានបង្ហាញពីមោទនភាព ក្នុងនាមជាអ្នកដឹកនាំអស់ រយៈពេល៤ឆ្នាំ ដែលបានបង្កើតព្រឹត្តិការណ៍ និងសមិទ្ធផលធំៗចំនួន៤ សម្រាប់បំបែកកំណត់ត្រា ពិភពលោក ដើម្បីឲ្យទង់ជាតិកម្ពុជាគ្រវីនៅលើពិភពលោក។
ដូច្នេះមានតែទង់ជាតិកម្ពុជាមួយគត់គ្រវី នៅលើពិភពលោក ខណៈអ្នកវិភាគនយោបាយ ដែលកំពុងគេចខ្លួននៅក្រៅ បានរិះគន់ចំពោះ ស.ស.យ.ក ដែលបង្កើតព្រឹត្តិការណ៍ទាំងនេះនាំឲ្យខ្ជះខ្ជាយថវិកាអត់ប្រយោជន៍។ លោកលើកឡើងថា ព្រឹត្តិការណ៍ធំៗចំនួន៤ ដែលបំបែកកំណត់ត្រាពិភពលោក រួមមាន៖ ទី១-ទូកងវែងគេក្នុងពិភពលោក មានប្រវែងជិត១០០ម៉ែត្រ,ទី២-ក្រមាវែងជាងគេជាង១ពាន់ម៉ែត្រ, ទី៣-រាំចង្វាក់ម៉ាឌីហ្សុន មានអ្នកចូលរួមជាង២ពាន់នាក់ និងទី៤-វេចនំអន្សមយក្សទម្ងន់រហូតដល់ទៅជាង៤តោន។ ការថ្លែងរបស់លោកនេះ បន្ទាប់ពីវិទ្យុអាស៊ីសេរី កាលពីថ្ងៃទី២៦ វិច្ឆិកា បានចេញផ្សាយថា៖
“អ្នកវិភាគនយោបាយលោក គឹម សុខ យល់ថា ការបំបែកឯតទគ្គៈកម្មនេះទាំងអស់ របស់ ស.ស.យ.ក ដែលគ្រប់គ្រងដោយលោក ហ៊ុន ម៉ានី បានត្រឹមតែធ្វើឲ្យកម្ពុជាបាត់បង់ ឬខ្ជះខ្ជាយថវិកា ពេលវេលា និងធនធានមនុស្ស ហើយថែមទាំងធ្វើឲ្យយុវជន អាចសប្បាយភ្លេចខ្លួនទៀតផង”។ លោក គឹម សុខ បន្តថា តាមពិតទៅប្រសិនបើកម្ពុជាមានឱកាស និងមានការដឹកនាំត្រឹមត្រូវនោះ គឺពលរដ្ឋកម្ពុជាអាច មានសមត្ថភាព បញ្ចេញស្នាដៃបំបែកឯតទគ្គៈកម្មពិភពលោក ផ្នែកដទៃទៀតជាច្រើន ដូចជាងខាងវិទ្យាសាស្ត្រ សំណង់ ស្ថាបត្យកម្មជាដើម មិនមែនត្រឹមតែធ្វើទូកវែង ក្រមាវែង វេចនំអន្យមធំ និងកេណ្ឌមនុស្សច្រើនរាំបទម៉ាឌីហ្សុននោះទេ។ ឆ្លើយតបក្នុងមហាសន្និបាត តំណាងទូទាំងប្រទេសលើក ទី៤ របស់ ស.ស.យ.ក នៅថ្ងៃទី២៧ វិច្ឆិកា លោក ហ៊ុន ម៉ានី មានប្រសាសន៍ថា “គេថា ធ្វើទូកវែងជាងគេលើពិភពលោក តើអាចធ្វើផ្លូវវែងជាងគេ នៅលើពិភពលោកបានអត់?
កាលធ្វើអន្សមយក្ស ៤ពាន់៤០គីឡូ គេសួរថា ចាយលុយខ្ជះខ្ជាយ ការរាំចង្វាក់ម៉ាឌីហ្សុន ២ពាន់១៥នាក់ដូចគ្នាដែរ ទាំងអន្សមយក្ស ទាំងម៉ាឌីហ្សុន ទាំងក្រមា និងទូកវែងជាងគេ លើពិភពលោក សុទ្ធមានការលើកឡើងថា ចាយលុយខ្ជះខ្ជាយ ហើយបានធ្វើអី។ តែយើងធ្វើដើម្បីអី ដើម្បីទង់ជាតិមួយហ្នឹងហើយ គ្រវីនៅលើពិភពលោក ហើយទង់ជាតិហ្នឹង មានតែមួយគត់ គឺទង់ជាតិកម្ពុជា”។ លោកបញ្ជាក់ថា ស.ស.យ.ក មិនអាចទិញកិត្តិយស ជូនប្រទេសជាតិបានឡើយ ដូច្នេះអ្វីដែល ស.ស.យ.ក បានចំណាយនេះ មានការថ្លឹងថ្លែងយ៉ាងច្បាស់។ លោកក៏បានឆ្លៀតយក ឱកាសនេះ សំណូមពរឲ្យប្រជាពលរខ្មែរចង់ចាំពី “នយោបាយ ឈ្នះ-ឈ្នះ” របស់រាជរដ្ឋាភិបាកម្ពុជាផងដែរ។ លោក ហ៊ុន ម៉ានី ក៏បានអំពាវនាវសមាជិក ស.ស.យ.ក បន្ដផ្សព្វផ្សាយស្មារតី២ធ្នូ និងបន្ដចូលរួមថែរក្សាទាំងអស់គ្នា ដើម្បីសម្រេចបានផលប្រយោជន៍ និងស្នាដៃមួយដើម្បីសង្គមជាតិរបស់កម្ពុជា។ លោកបញ្ជាក់ថា ស្មារតី២ធ្នូនេះហើយ ដែលអាចឲ្យរណៈសិរ្សសាមគ្គីសង្គ្រោះជាតិកម្ពុជា ជាពិសេសសម្តេចទាំងបី គឺសម្តេច ហេង សំរិន សម្តេច ជា ស៊ីម និងសម្តេចតេជោ ហ៊ុន សែន ព្រមទាំងកងកម្លាំងប្រដាប់អាវុធ សាមគ្គីសង្គ្រោះជាតិកម្ពុជា អាចរំដោះកម្ពុជា ចេញពីរបបប្រល័យពូជសាសន៍ ប៉ុល ពត ខ្មែរក្រហមបាន។
សហភាពសហព័ន្ធយុវជន កម្ពុជា នៅថ្ងៃទី២៦ ខែវិច្ឆិកា ឆ្នាំ២០១៨នេះ បានបើកសន្និបាតទូទាំងប្រទេសលើកទី៤ និងខួបលើកទី៤០ របស់ខ្លួនដើម្បីបូកសរុបការងារឆ្នាំ២០១២-២០១៨ របស់ខ្លួននឹងលើកទឹសដៅការងារសម្រាប់ឆ្នាំ ២០១៨-២០២៣ នៃការប្រមូលផ្តុំយុវជនគ្រប់ទិសទីជាមហាកម្លាំងសាមគ្គីក្នុងការកសាងបន្ថែម និងលើកកម្ពស់ ប្រទេសកម្ពុជាជាមួយ ឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។ យោងតាមសេចក្តីប្រកាសព័ត៌មានរបស់ (ស.ស.យ.ក) បានអះអាងថា ព្រឹត្តការណ៍មហាសន្និបាតនេះ តំណាងទូទាំងប្រទេសប្រព្រឹត្តទៅលើកទី៤ ដែលប្រព្រឹត្តទៅរយៈពេលពីរថ្ងៃ ចាប់ពីថ្ងៃទី២៦ដល់ទី២៧ ខែវិច្ឆិកា ឆ្នាំ២០១៨ នៅសណ្ឋាគារសុខាភ្នំពេញនឹងផ្តោតលើការយកចិត្តទុកដាក់លើការបូកសរុបការងារ ឆ្នាំ២០១២.២០១៨ និងការងារឆ្នាំ២០១៨-២០២៣ ។
ព្រមទាំងបោះឆ្នោតជ្រើសតាំងសមាជិក គណៈកម្មាធិការកណ្តាល ជាមួយកិច្ចពិភាក្សា និងការអនុម័តការកែប្រែលក្ខន្តិកៈនៃ (ស.ស.យ.ក)។ ស.ស.យ.ក បានលើកឡើងថា មហាសន្និបាតតំណាងទូទាំងប្រទេសលើកទី៤នេះ ពិធីបើកប្រព្រឹត្តទៅ ក្រោមអធិបតីភាពរបស់សម្តេចវិបុលភក្តី សាយ ឈុំ ប្រធានព្រឹទ្ធសភា និងពិធីបិទនឹងប្រព្រឹត្តទៅក្រោម អធិបតីភាព សម្តេចតេជោ ហ៊ុន សែន នាយករដ្ឋមន្ត្រី និងសម្តេចកត្តិបណ្ទិតប៊ុន រ៉ានី ហ៊ុនសែន។ ស.ស.យ.ក ជារណសិរ្សទូលំទូលាយនៃយុវជនកម្ពុជាដែលបដិសន្ធិនៅថ្ងៃទី២ ខែធ្នូ ឆ្នាំ១៩៧៨ ក្នុងគោលដៅសំខាន់បំផុតក្នុងការប្រមូលផ្តុំយុវជនគ្រប់ទិសទីជាមហាកម្លាំងសាមគ្គីក្នុងការកងសាងប្រទេសកម្ពុជាជាមួយឯករាជ្យ សន្តិភាព សេរីភាព និងអភិវឌ្ឍសង្គម៕
ចែករំលែកព័តមាននេះ