ខេត្តកំពត ៖ យុវជនជាជនសង្ស័យម្នាក់ត្រូវបានការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ពីបទចាប់រំលោភសេពសន្ថវៈយុវតីម្នាក់មានអាយុ១៨ឆ្នាំ នៅក្នុងបន្ទប់ទឹករហូតបានសម្រេច កាលពីថ្ងៃទី២៤ ខែវិច្ឆិកា ឆ្នាំ២០១៨…
ខេត្តកំពត ៖ យុវជនជាជនសង្ស័យម្នាក់ត្រូវបានការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ពីបទចាប់រំលោភសេពសន្ថវៈយុវតីម្នាក់មានអាយុ១៨ឆ្នាំ នៅក្នុងបន្ទប់ទឹករហូតបានសម្រេច កាលពីថ្ងៃទី២៤ ខែវិច្ឆិកា ឆ្នាំ២០១៨ ស្ថិតក្នុងភូមិដំណាក់ត្រាច ឃុំកណ្តោល ស្រុកទឹកឈូ ខេត្តកំពត។ តាមប្រភពព័ត៌មានពីការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានឲ្យដឹងថា តាមចម្លើយសារភាពរបស់ជនសង្ស័យបានសារភាពប្រាប់សមត្ថកិច្ចថា ក្រោយពីជួបជុំគ្នាជាមួយមិត្តភក្តិ ចំនួន៥នាក់ ទាំងយុវតីរងគ្រោះផងដែរបានផឹកស្រាសអស់ចំនួន១លីត្រនៅផ្ទះយុវតីរងគ្រោះ ហើយពេលនោះបានស្រវឹងគ្រប់គ្នា ហើយមិត្តភក្តិ២នាក់ ក៏បានទៅលេងបាល់ និងម្នាក់បានចូលទៅដេកក្នុងបន្ទប់។
ដោយឃើញឱកាសស្ងាត់នៅតែ២នាក់យុវតីរងគ្រោះ ហើយយុវតីរងគ្រោះក៏ស្រវឹងផងដែរនោះ ខ្លួនជាជនសង្ស័យមានអារម្មណ៍ចង់រួមភេទក៏ចាប់ឱបថើប រួចហើយក៏បីយុវតីរងគ្រោះចូលទៅក្នុងបន្ទប់ទឹករួចធ្វើសកម្មភាពរំលោភសេពសន្ថវៈរហូតបានសម្រេច រួចយុវតីរងគ្រោះនៅលង់លក់មិនដឹងខ្លួនក៏នៅដេកក្នុងបន្ទប់ទឹកនោះ រួចជនសង្សយ័ដើរមកដេកជាមួយ មិត្តភក្តិធ្វើមិនដឹង។ ក្រោយមកក៏ស្រាប់តែឃើញនគរបាលប៉ុស្តិ៍មកនាំខ្លួនទៅកាន់ប៉ុស្តិ៍ ដើម្បីសាកសួរតែម្តង។ ប្រភពដដែលឲ្យដឹងថា ក្រោយពីជនសង្ស័យធ្វើសកម្មភាពរំលោភយុវតីរងគ្រោះ បានសម្រេចហើយមានពាក្យបណ្តឹងពីឈ្មោះ ញ៉េប ញ៉ាស (ជីដូនជនរងគ្រោះ) ទើបសមត្ថកិច្ចទៅដល់ កន្លែងកើតហេតុ ហើយឃាត់ខ្លួនជនសង្ស័យរួមនឹងមិត្តភក្តិដែលនៅដេកជាមួយគ្នាទៅសាកសួរ។ ក្រោយពេលសាកសួរជនសង្ស័យបានសារភាពប្រាប់សមត្ថកិច្ចរួចមក សមត្ថកិច្ចបានដោះលែង ម្នាក់ដែលជាមិត្តភក្តិមិនពាក់ព័ន្ធឲ្យត្រឡប់ទៅផ្ទះវិញ។
ចំណែកជនដែលប្រព្រឹត្ត សមត្ថកិច្ចបានកសាង សំណុំរឿងទៅតុលាការដើម្បីចាត់ការតាមផ្លូវច្បាប់។ ជនសង្ស័យមានឈ្មោះ តេង សំណាង ហៅទូច ភេទប្រុស អាយុ១៨ឆ្នាំ មានទីលំនៅភូមិដំណាក់ត្រាច ឃុំកណ្តោល ស្រុកទឹកឈូ ខេត្តកំពត។ ចំណែកយុវតីរងគ្រោះមានអាយុ១៧ឆ្នាំ រស់នៅភូមិឃុំជាមួយគ្នា។ ជុំវិញករណីរឿងរំលោភសេពសន្ថវៈ ខាងលើ ក្រោយពីបញ្ជូនជនសង្ស័យចូលទៅឲ្យតុលាការសាកសួរហើយ មានព័ត៌មានមិនផ្លូវការណ៍មួយ បានលេចឮថា អាណាព្យាបាលទាំងសងខាងបានប្តូរចិត្តបែរមកសម្របសម្រួលគ្នា ចង់ឲ្យអ្នកទាំងពីរផ្សំផ្គុំគ្នាជាប្តីប្រពន្ធវិញ។ ប៉ុន្តែតុលាការមិនទទួលយកការសម្របសម្រួលនោះទេ ពីព្រោះបទល្មើសដែលប្តឹងចូលដល់តុលាការ ហើយទោះស្ថិតក្នុងកាលៈទេសៈណាក៏ត្រូវតែអនុវត្តន៍ ទៅតាមនីតិវិធីច្បាប់សិនដែរ៕
ចែករំលែកព័តមាននេះ