សហរដ្ឋអាមេរិក ៖ យានINSIGHTរបស់អង្គការNASA បានចុះចតហើយដូចការគ្រោងទុក កាលពីថ្ងៃទី២៦វិច្ឆិកាលើដែនដីនៃភពព្រះអង្គារ បន្ទាប់ពីការងារមួយដែលមានរយៈពេល៧ឆ្នាំ និងការហោះហើរអស់ពេល៧ខែក្នុងទីអវកាស ព្រមទាំងការប្រើពេលជិត៧នាទីសម្រាប់ការចុះមក។ នៅឯមជ្ឈមណ្ឌលត្រួតពិនិត្យបេសកកម្មរបស់យាននេះ ស្ថិតនៅJET…
សហរដ្ឋអាមេរិក ៖ យានINSIGHTរបស់អង្គការNASA បានចុះចតហើយដូចការគ្រោងទុក កាលពីថ្ងៃទី២៦វិច្ឆិកាលើដែនដីនៃភពព្រះអង្គារ បន្ទាប់ពីការងារមួយដែលមានរយៈពេល៧ឆ្នាំ និងការហោះហើរអស់ពេល៧ខែក្នុងទីអវកាស ព្រមទាំងការប្រើពេលជិត៧នាទីសម្រាប់ការចុះមក។
នៅឯមជ្ឈមណ្ឌលត្រួតពិនិត្យបេសកកម្មរបស់យាននេះ ស្ថិតនៅJET PROPULSION LABORATORYនាទីក្រុងPASADENAរដ្ឋកាលីហ្វ័រនីញ៉ា បណ្ដាអ្នកធ្វើការនៅទីនោះក្រោយយាននេះចុះដោយជោគជ័យ បានសម្ដែងក្ដីរីករាយខ្លាំងណាស់ ដោយចាប់អោបគ្នានិងហ៊ោកញ្ច្រៀវ។ ពួកគេទះដៃអបអរសាទរ ហើយនៅឯស្ថានីយអវកាសអន្តរជាតិISS ពួកអ្នកប្រចាំការនៅទីនោះ ដែលតាមដានការចុះរបស់យាននោះ ក៏ផ្ទុះក្ដីរីករាយខ្លាំងដែរដែលឃើញយានដំបូង ចាប់តាំងពិី៦ឆ្នាំមកហើយចុះលើភពព្រះអង្គារបាន។
២ម៉ោងប៉ុណ្ណោះមុនពេលហោះចូលទៅក្នុងបរិយាកាសនៃភពព្រះអង្គារ យានINSIGHTស្ថិតនៅចម្ងាយដល់ទៅជាង២៥.០០០គីឡូម៉ែត្រពិភពក្រហម ហើយពេលនោះបណ្ដាវិស្វកររបស់NASA ពុំអាចធ្វើអ្វីបានក្រៅពីអោបដៃចាំមើលនោះឡើយ រួចហាក់ដូចជាអស់សង្ឃឹម។ ការហោះចូលបរិយាកាសភពព្រះអង្គារដែលពោរពេញដោយព្យុះធូុលី រហូតដល់ពេលចុះដល់ដីភពនេះ សុទ្ធតែមានការរៀបចំកម្មវិធីទុកមុន។
ប៉ុន្មាននាទីក្រោយការចុះចត យានINSIGHTបានបញ្ជូនរូបភាពដំបូងរបស់វា។ នោះជារូបភាពនៃកន្លែងមួយដែលគេពុំធ្លាប់ឃើញទល់តែសោះ។ បន្ទាប់ពីហោះចូលក្នុងបរិយាកាសភពព្រះអង្គារបានបន្តិច ការកកិតធ្វើឲ្យសីតុណ្ហភាពរបស់យាននោះឡើងដល់១៥០០អង្សាសេ ប៉ុន្តែយាននោះនៅតែទ្រាំទ្របានមកពីប្រព័ន្ធការពារកម្ដៅ។
ពេលចូលក្នុងបរិយាកាសភពព្រះអង្គារយានINSIGHT ហោះហើរ ក្នុងល្បឿនដល់ទៅប្រមាណជា២០.០០០គីឡូម៉ែត្រក្នុង១ម៉ោង គឺ៣ទៅ៤ដងលឿនជាងល្បឿនគ្រាប់កាំភ្លើង ក្រោយពិីវាហោះហើរក្នុងចម្ងាយផ្លូវ ប្រមាណជា៤៨០លានគីឡូម៉ែត្រមក។ ខណៈនៅសល់១០០គីឡូម៉ែត្រពីដែនដីភពព្រះអង្គារ ឆ័ត្រយោងយក្សបានបើកដោយស្វ័យប្រវត្តិ ទប់ល្បឿនបន្ទាប់មកយានបានបញ្ចេញជើង៣ ហើយឆ័ត្របានផ្ដាច់៕ វីដេអូដកស្រង់ចេញពី ៖ SciNews
ចែករំលែកព័តមាននេះ