ខេត្តកណ្តាល ៖ បន្ទាប់ពីទំនេរពីមុខរបរធ្វើស្រែចម្ការបន្តិចបន្តួច ប្រជាពលរដ្ធរស់នៅក្នុងភូមិរាំងជូ ឃុំក្អមសំណ ស្រុកលើកដែក ខេត្តកណ្តាល បាននាំគ្នាទៅរាវលៀស នៅតាមបឹង ព្រែក ដើម្បីយកមកលក់បានលុយជួយទ្រទ្រង់ដល់ជីវភាពក្នុងគ្រួសារបន្ថែម ។
តាមប្រជាពលរដ្ធរស់នៅក្នុងភូមិ-ឃុំខាងលើបានលើកឡើងថា ជារៀងរាល់ឆ្នាំឲ្យតែដល់រដូវទឹកសម្រក ពួកគាត់ក្រោយពីទំនេរនូវមុខរបរធ្វើស្រែចម្ការបន្តិចបន្តួចគ្រាន់បានទុកហូបខ្លួនឯងផងក៏ឆ្លៀតពេលនាំគ្នាទៅរាវលៀស ដើម្បីយកមកលក់បានលុយជួយផ្គត់ផ្គង់ដល់ជីវភាពក្នុងគ្រួសារបន្ថែម ព្រោះការធ្វើស្រែចម្ការវាមិនទៀងទេ ជួនខាត ជួនចំណេញក៏មាន ។ ពលរដ្ឋបន្តទៀតថា ការទៅរាវលៀសនេះ គឺពួកគាត់បានបើកទូកកាណូតទៅរាវលៀស នៅតាមបឹង ព្រែក នានាខាងក្រោយភូមិដែលមានចម្ងាយដីប្រហែលជា៣-៤គីឡូម៉ែត្រឯណោះ ហើយចេញទៅរក គឺចាប់ពីវេលាម៉ោង៥ -៦ព្រឹករហូតដល់ម៉ោង៤-៥ល្ងាច ទើបត្រឡប់មកផ្ទះវិញ ។
ពលរដ្ឋបញ្ជាក់បន្ថែមថា ក្នុងមួយថ្ងៃពួកគាត់អាចរាវលៀសបានខ្លះជាង១០០គីឡូ ២០០គីឡូទៅ៣០០គីឡូក្រាមក៏មាន យកបោះថ្លឹងលក់ឲ្យឈ្មួញអ្នកភ្នំពេញ បើកឡានចូលមកទិញដល់ចំណតទូក ដោយក្នុងមួយគីឡូក្រាមលៀសលេខធំលេខ១បានតម្លៃ១៨០០រៀលទៅ២០០០រៀល ។ លៀសលេខ២បានតម្លៃមួយគីឡូក្រាម១៥០០រៀល ។ លៀសលេខ៣បានតម្លៃមួយគីឡូក្រាម៨០០រៀលទៅ១០០០រៀល ។
ពលរដ្ឋបញ្ជាក់បន្ថែមទៀតថា ក្នុងមួយថ្ងៃកាត់ថ្លៃស៊ី កាត់ថ្លៃប្រេងសាំងរួចរាល់ នៅសល់ម្នាក់១០ម៉ឺនរៀល ទៅជាង១០ម៉ឺនរៀលដែរ គ្រាន់បានយកមកប្រើប្រាស់ទិញជី ទិញថ្នាំថែទាំស្រែចម្ការ និងសល់នៅខ្លះគ្រាន់ដោះស្រាយចាយវាយផ្គត់ផ្គង់ក្នុងគ្រួសារ និងជួយឲ្យកូនបានទៅរៀនសូត្រផងដែរ ៕
ចែករំលែកព័តមាននេះ