រឿងជំនឿទោះជាស្ថិតក្នុងរូបីក្តី អរូបីក្តី មិនមែនលោកហាមមិនឱ្យជឿទេ ជឿក៏ជឿចុះ តែត្រូវមានហេតុផល និងប្រកបដោយបញ្ញាផងដើម្បីកុំឱ្យខូចប្រយោជន៍ ។
ខាងក្រោមនេះសូមលើកយកជំនឿដែលមនុស្សពីមួយជំនាន់ទៅមួយជំនាន់ តែងនិយាយតៗគ្នាថា អ្នកមានគូស្នេហ៍ត្រូវបានចាស់ៗហាមប្រាមមិនឱ្យទៅលេងវត្តភ្នំទេ ព្រោះខ្លាចលោកយាយពេញច្រណែនធ្វើឱ្យបែកបាក់គ្នា ។
តើជំនឿបែបនេះអាចយកជាការណ៍បានទេ?
មានយុវវ័យច្រើនណាស់ដែលនៅតែមិនអស់មិនហើយចំពោះរឿងនេះ ដោយអ្នកខ្លះថាពិតជាអញ្ចឹងមែន អ្នកខ្លះថាមិនជឿទេគឺគ្មានអ្នកណាមកបញ្ចូលចិត្តយើងឱ្យបែកគ្នានោះឡើយ ឯអ្នកខ្លះទៀតហាក់ដូចទ្រឹងមិនហ៊ាននិយាយថា ជឿ ឬមិនជឿ ។
ដើម្បីស្រាយបំភ្លឺឱ្យអស់ចម្ងល់តទៅទៀត ព្រឹទ្ធាចារ្យមួយរូបសុំមិនបញ្ចេញឈ្មោះ ជាអ្នកមើលថែរក្សានៅរមណីយដ្ឋានវត្តភ្នំបានបញ្ជាក់ឱ្យ ដឹងថា អបិយជំនឿបែបគ្មានហេតុផលនេះមិនអាចទទួលយកបានទេ។
តាមពិតទៅយាយពេញឯណាដាច់ចិត្តពង្រាត់បង្រាសកូនចៅឱ្យព្រាត់គ្នានោះ មានតែលោកយាយជួយថែរក្សា ជួយបន់ស្រន់សុំឱ្យគូស្នេហ៍ស្រឡាញ់គ្នាបានយូរអង្វែង ជួបជាគូគាប់អស់មួយជីវិត ។
លោកព្រឹទ្ធាចារ្យបានអះអាងថា បារមីលោកយាយពេញតែងជួយថែរក្សាកូនចៅឱ្យបានសុខចម្រើន សម្បូរសប្បាយ ដូច្នេះសម្តីទាំងអស់នេះគ្រាន់តែជាពាក្យចចាមអារ៉ាមគ្មានការពិតអ្វីទាំងអស់ ចាប់ពីពេលនេះទៅសូមអស់ឆ្ងល់ ។
ចែករំលែកព័តមាននេះ