រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គជប) បានប្រកាសបិទផ្សាយបញ្ជីឈ្មោះបោះឆ្នោតលើកដំបូង ឆ្នាំ២០១៨ ខណៈលុបឈ្មោះចេញជាង៥ម៉ឺននាក់ និងកែតម្រូវឈ្មោះជាង១ពាន់នាក់ ។
លោក មាន សទិ សមាជិកគ.ជ.ប បានលើកឡើងថា កិច្ចប្រជុំជាមួយភាគីពាក់ព័ន្ធស្តីពីការបិទផ្សាយបញ្ជីបោះឆ្នោតដំបូងការដាក់ការទទួល និងការដោះស្រាយបណ្តឹងទាក់ទង និងការបិទផ្សាយបញ្ជីបោះឆ្នោតដំបូង កាលពីថ្ងៃទី២៦ វិច្ឆិកានេះ នៅទីស្តីការ គ.ជ.ប ថា បញ្ជីបោះឆ្នោត ដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោតតាមឃុំ សង្កាត់ ត្រូវបានបិទផ្សាយនៅតាមសាលាឃុំ សង្កាត់ និងនៅតាមទីសាធារណៈមួយក្នុងឃុំសង្កាត់ព្រមៗ គ្នាទូទាំងប្រទេសនៅថ្ងៃនេះ ។
ជាមួយគ្នានោះដែរលោក មាន សទិ បានលើកឡើងទៀតនៅនៅពេលបិទផ្សាយបញ្ជីបោះឆ្នោតដំបូងនេះ មានខេត្តចំនួន៥មានភ្លៀងធ្លាប់ខ្លាំង (ខេត្តត្បូងឃ្មុំ ខេត្តកំពង់ចាម ខេត្តតា កែវ ខេត្តកំពង់ឆ្នាំង និងខេត្តពោធិសាត់) ប៉ុន្តែមិនបានធ្វើឲ្យប៉ះពាល់ដល់ដំណើរការបិទផ្សាយបញ្ជីបោះឆ្នោតដំបូងនោះទេ ។ យ៉ាងណាក្តីបើតាមការអះអាងរបស់សមាជិក គ.ជ.ប បានលើកឡើងថា អ្នកដែលទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួនវិញមិនទាន់មានច្រើននៅឡើយទេ ក្រៅពីអ្នកដែលមានទីលំនៅជិតសាលាឃុំ សង្កាត់ ។ លោក មាន សទិ បានបន្ថែមថា ការបិទផ្សាយបញ្ជីឈ្មោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោតតាមឃុំ សង្កាត់ មានរយៈពេល៥ថ្ងៃ ចាប់ពីថ្ងៃទី២៦ វិច្ឆិកានេះ ។
ការបិទផ្សាយបញ្ជីទាំងពីរនេះ គឺបើកផ្លូវឲ្យប្រជាពលរដ្ឋមានសិទ្ធិប្តឹងតវ៉ា ឬនឹងប្តឹងជំទាស់ជាលាយលក្ខណ៍អក្សរនៅក្រុមប្រឹក្សាឃុំសង្កាត់ ក្នុងរយៈពេលយ៉ាងយូរ៥ថ្ងៃ (ចាប់ពីថ្ងៃ២៧ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៨) បន្ទាប់ពីថ្ងៃបិទផ្សាយបញ្ជីបោះឆ្នោតដំបូង ។ ក្នុងករណីអ្នកប្តឹងតវ៉ា ឬអ្នកប្តឹងជំទាស់មិនពេញចិត្ត និងសេចក្តីសម្រេចរបស់ក្រុមប្រឹក្សាឃុំ សង្កាត់អាចប្តឹងទីគ.ជ.ប និងក្រុមប្រឹក្សាធម្មនុញ្ញតាមច្បាប់កំណត់ ។
សមាជិក គ.ជ.ប បានលើកឡើងទៀតថា លទ្ធផលបណ្តោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោតបង្ហាញថា អ្នកមកចុះឈ្មោះថ្មីមានចំនួន១៩៥,៣៨៥ នាក់ ហើយអ្នកដែលបានលុបចេញពីបញ្ជីឈ្មោះបោះឆ្នោតមានចំនួន៥៦,៩៤១នាក់ និងអ្នកដែលបានកែតម្រូវទិន្នន័យមានចំនួន១,៥៥៣នាក់ ។ ជាមួយគ្នានោះដែរ លោក មាន សទិ បានអំពាវនាវឲ្យប្រជាពលរដ្ឋដែលបានចុះឈ្មោះបោះឆ្នោតរួចហើយអញ្ជើញទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួននៅលើបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវនឹងលុបចេញពីបញ្ជីបោះឆ្នោតឲ្យបានគ្រប់គ្នា ៕
ចែករំលែកព័តមាននេះ