រាជធានីភ្នំពេញ ៖ ជាងជួសជុលម៉ូតូម្នាក់រួមជាមួយបក្សពួកម្នាក់ទៀតបានធ្វើសកម្មភាពបោកយកម៉ូតូ១គ្រឿងពីបុរសម្នាក់ដោយខ្ចីជិះទៅទិញទឹកសុទ្ធ និងប្រាប់ថា តែមួយភ្លែតប៉ុណ្ណោះ ។ លុះពេលម្ចាស់ឲ្យខ្ចីជាងម៉ូតូខាងលើបានឲ្យមិត្តភក្ដិជិះគេចខ្លួនបាត់ស្រមោល បន្ទាប់មកម្ចាស់ម៉ូតូបានប្រាប់ឲ្យជាងនោះតាមយកម៉ូតូពីមិត្តភក្ដិមកឲ្យខ្លួនវិញមិនព្រម និងឆ្លើយថាមិនដឹងទើបប្ដឹងឲ្យនគរបាលចាប់ខ្លួនតែម្ដង ។
ហេតុការណ៍ឆបោកខាងលើនោះបានកើតឡើងតាំងពីថ្ងៃទី១៧ ខែវិច្ឆិកា ឆ្នាំ២០១៨ នៅចំណុចបន្ទប់ជួលភូមិ ចោមចៅទី៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ លុះដល់ថ្ងៃទី២៧ ខែវិច្ឆិកា ១០ថ្ងៃក្រោយទើបត្រូវនគរបាលចាប់ខ្លួននៅចំណុចផ្ទះខាងលើតាមពាក្យបណ្ដឹងជនរងគ្រោះ ។
ជនសង្ស័យដែលត្រូវចាប់ខ្លួននោះឈ្មោះ ប៉ុន កែវឯក អាយុ៣៨ឆ្នាំ មុខរបរជាងជុសម៉ូតូ ស្នាក់នៅកន្លែងកើតហេតុខាងលើ រីឯបក្សពួកដែលគេចខ្លួនបាត់ឈ្មោះ ធី ។ ដោយឡែកបុរសរងគ្រោះឈ្មោះ មាស ភាព អាយុ៣៨ឆ្នាំ មុខរបរត់ម៉ូតូឌុបស្នាក់នៅក្នុងសង្កាត់ចោមចៅទី២ ខណ្ឌពោធិ៍សែនជ័យ និងមានស្រុកកំណើតនៅក្នុងខេត្តតាកែវ ។
មុនពេលកើតហេតុគាត់បានជិះម៉ូតូម៉ាកស៊ុយហ្សូគីស្មាស់ ពណ៍ខ្មៅ ពាក់ផ្លាកលេខ ភ្នំពេញ 1AN-2557 ។ បុរសម្ចាស់ម៉ូតូបាននិយាយថា អំឡុងមុនថ្ងៃបុណ្យអុំទូកឈ្មោះ ធី បានហៅឲ្យគាត់ឌុបទៅកាន់បន្ទប់ជួលរបស់ឈ្មោះ ប៉ុន កែវឯក ដែលជាជាងជួសជុលម៉ូតូ ។
លុះពេលទៅដល់ជនសង្ស័យទាំង២នាក់បានខ្ចីម៉ូតូជិះដោយប្រាប់ថា ជិះទៅទិញទឹកតែមួយភ្លែតប៉ុណ្ណោះ ខណៈនោះដោយសារតែស្គាល់គ្នាគាត់ក៏បានឲ្យខ្ចីជិះ ។ មួយសន្ទុះក្រោយមកក៏ស្រាប់តែឃើញឈ្មោះ ប៉ុន កែវឯក ដើរត្រឡប់ទៅផ្ទះជួលម្នាក់ឯង ចំណែកបក្សពួកម្នាក់ទៀតឈ្មោះ ធី និងម៉ូតូដែលខ្ចីគាត់ជិះនោះបានបាត់មិនឃើញឡើយ ។
ប្រភពដដែលបានបន្តថា ពេលឃើញបែបនេះគាត់បានសួរនាំរកម៉ូតូហើយជនសង្ស័យឈ្មោះ ប៉ុន កែវឯក ឆ្លើយដោយគ្មានការទទួលខុសត្រូវថា ឈ្មោះ ធី គឺជាអ្នកជិះមិនដឹងថា ជិះទៅណានោះទេ ។ បន្ទាប់មកគាត់ក៏បានដាក់ពាក្យបណ្តឹងនៅប៉ុស្តិ៍នគរបាលចោមចៅ២ដើម្បីឲ្យនគរបាលជួយអន្តរាគមន៍ និងអង្វរឲ្យឈ្មោះ ប៉ុន កែវឯក យកម៉ូតូពីឈ្មោះ ធី មកប្រគល់ឲ្យគាត់វិញប៉ុន្តែមិនព្រមទើបគាត់ស្នើរសុំឲ្យនគរបាលចាប់ខ្លួនដើម្បីសួរនាំ និងចាត់ការតាមច្បាប់ ៕
ចែករំលែកព័តមាននេះ