ខេត្តកំពង់ឆ្នាំង ៖ រថយន្តមួយគ្រឿងជាប្រភេទរថយន្តដឹកអ្នកដំណើររបស់ក្រុមហ៊ុនខេមបូត្រា អ៊ិចប្រេស្ស បានបុកម៉ូតូមួយគ្រឿងពេញទំហឹងប៉ើងធ្លាក់ផ្លូវ បណ្តាលឱ្យអ្នកបើកបរម៉ូតូស្លាប់ភ្លាមៗនឹងកន្លែងកើតហេតុ ។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី២៦ ខែវិច្ឆិកា ឆ្នាំ២០១៨ នៅលើកំណាត់ផ្លូវជាតិលេខ៥ ក្បែរសាខាគយខេត្តកំពង់ឆ្នាំង ស្ថិតនៅ ឃុំស្រែថ្មី ស្រុករលាប្អៀរ ខេត្តកំពង់ឆ្នាំងជាប់ព្រំប្រទល់ក្រុងកំពង់ឆ្នាំង ។
សមត្ថកិច្ចដែលទៅពិនិត្យកន្លែងកើតហេតុបានអោយដឹងថា ជនរងគ្រោះដែលស្លាប់ឈ្មោះ វិន ភេទប្រុស អាយុ៤០ឆ្នាំ ជាមន្ត្រីបម្រើការងារនៅសាខាគយខេត្តកំពង់ឆ្នាំង រស់នៅស្រុកកំពង់ត្រឡាច ខេត្តកំពង់ឆ្នាំង ។
ប្រភពដដែលបានបន្តថា នៅមុនពេលកើតហេតុ ជនងគ្រោះបានជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពាក់ស្លាកលេខ កំពង់ឆ្នាំង ១H-៩១៩៩ ធ្វើដំណើរក្នុងទិសដៅពីកើតទៅលិច ។
លុះពេលមកដល់ចំណុចកើតហេតុ ជនរងគ្រោះបានបើកឆ្លងផ្លូវចូលកន្លែងធ្វើការ ស្រាប់តែមានរថយន្តមួយគ្រឿងជាប្រភេទរថយន្តដឹកអ្នកដំណើរ វីអាយភី របស់ក្រុមហ៊ុនក្រុមហ៊ុនខេមបូត្រា អ៊ិចប្រេស្ស ពាក់ស្លាកលេខ ភ្នំពេញ ២Z-៤៦៥៩ បើកបរយ៉ាងលឿន ហើយបានវ៉ាជែង ក៏ជ្រុលទៅបុកម៉ូតូពេញទំហឹងតែម្តង បណ្តាលអោយម៉ូតូនិងជនរងគ្រោះខ្ទាតធ្លាក់ពីលើផ្លូវ ស្លាប់ភ្លាមៗនៅនឹងកន្លែងតែម្តង ។
ក្រោយពេលកើតហេតុ អ្នកបើកបររថយន្តចុះពីលើរថយន្តរត់គេចបាត់ស្រមោល ចំណែករថយន្តខាងលើត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកខេត្តកំពង់ឆ្នាំង ដើម្បីកសាងសំណុំរឿងអនុវត្តតាមនីតិវិធីច្បាប់ ។ ដោយឡែកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ