ខេត្តបាត់ដំបង ៖ ពិធីផ្សព្វផ្សាយស្តីពីនយោបាយឈ្នះ-ឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលប្រព្រឹត្តទៅវេលាព្រឹក ថ្ងៃទី ២៦ ខែវិច្ឆិកា ឆ្នាំ២០១៨ នៅបញ្ជាការដ្ឋានយោធភូមិភាគទី៥ ។
ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ដោយមានការចូលរួមពីលោកអនុប្រធានក្រុមស្រាវជ្រាវប្រវត្តិសាស្ត្រយោធាអគ្គបញ្ជាការ និងមេបញ្ជាការរង នាយសេនាធិការរង នាយការិយាល័យយោធភូមិភាគទី៥ មេបញ្ជាការកងពលទាំង៣ តំបន់ប្រតិបត្តិការសឹករងទាំង៤ខេត្តបាត់ដំបង ពោធិសាត់ ប៉ៃលិន និងបន្ទាយមានជ័យ កងព្រំដែនទាំង៤ ព្រមទាំងនាយទាហានជាគ្រូបង្គាល នាយទាហាន នាយទាហានរង ពលទាហាន ចំណុះយោធភូមិភាគទី៥ សរុប២៨៥នាក់នៅសាលប្រជុំធំយោធភូមិភាគទី៥ ។
ថ្លែងក្នុងឱកាសបើកយុទ្ធនាការផ្សព្វផ្សាយស្តីពីនយោបាយឈ្នះ-ឈ្នះនេះ លោកឧត្តមសេនីយ៍ឯក ប៊ុន សេង បានលើកឡើងពីគោលបំណងសំខាន់ៗរបស់នយោបាយឈ្នះ-ឈ្នះនេះ ១-ចង់ឲ្យនាយទាហាន ពលទាហាន ឲ្យយល់ច្បាស់ពីតម្លៃនៃសន្តិភាព ។ ២- មើលឲ្យឃើញច្បាស់ អំពីវីរភាពរបស់សម្តេចតេជោ ដែលជាស្ថាបនិកជាអគ្គមគ្គទេសដ៏ឆ្នើមផ្តើមនូវនយោបាយ ឈ្នះ-ឈ្នះ ។ សរុបមកវិញសូមឲ្យនាំគ្នាថែរក្សា និងការពារឲ្យបានសុខសន្តិភាព ទោះស្ថិតក្នុងតម្លៃណាក្នុងកាលៈទេសៈណាក៏ដោយ មានសន្តិភាព គឺមានអ្វីៗទាំងអស់ មានសន្តិភាពទើបមានការអភិវឌ្ឍ ។
លោកឧត្តមសេនីយ៍ឯកប៊ុន សេង បានបន្តទៀតថា ពេលនេះជាលើកទី៣ ក្នុងការបាញ់គ្រាប់ពិតដែលយោធភូមិភាគទី៥ តែងតែមានលំហាត់ជារៀងរាល់ឆ្នាំបានធ្វើមកតាំងពីឆ្នាំ២០១៦ ដល់២០១៧ ក្រោមអធិបតីភាព អតីតលោកនាយឧត្តមសេនីយ៍ មាស សុភា និងនាយឧត្តមសេនីយ៍ ប៉ុល សារឿន និងបានបើកសម្ភោធឲ្យប្រើប្រាស់ដោយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី តំណាងសម្តេចតេជោហ៊ុន សែន ជានាយករដ្ឋមន្ត្រី ហើយលើកនេះឆ្នាំ២០១៨ មានលោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកបានមកចូលរួម ដើម្បីបិទវគ្គហ្វឹកហ្វឺនសិក្ខាកាមទាំងអស់នេះផង នៅថ្ងៃទី២៩ ខែវិច្ឆិកា ឆ្នាំ២០១៨ខាងមុខនេះ ។
លោកឧត្តមសេនីយ៍ឯក ប៊ុន សេង បានបន្ថែមទៀតថា គោលបំណងរបស់យោធភូមិភាគទី៥ ក្នុងការហ្វឹកហាត់បាញ់គ្រាប់ពិតនេះសំខាន់ គឺផ្តោតលើអត្ថន័យ៦ចំណុចដែលមាន១- បូកសរុបនៃការហ្វឹកហ្វឺនទូទាំងយោធភូមិភាគទី៥ ដែលធ្លាប់បានទទួលស្នាដៃលេខ១ចំនួន៥ឆ្នាំកន្លងមកហើយនេះក្នុងប្រទេសកម្ពុជា ។ ២- រំលឹកខួប៣០ឆ្នាំនៃការកើតឡើងរបស់អង្គភាពយោធភូមិភាគទី៥ ដែលបានធ្វើក្បួនព្យុះហយាត្រាឡើងល្បីពេញពិភពលោក អំពីគុណភាពកងទ័ពរួចពេលថ្មីៗនេះ ។ ៣- ខួបលើកទី៤០ឆ្នាំនៃថ្ងៃ២ធ្នូ ជាថ្ងៃបង្កើតរណៈសិរ្សសាមគ្គីរំដោះជាតិ ។ ៤- អបអរសាទរថ្ងៃ៧មករា បានរំដោះប្រទេស និងប្រជាជនកម្ពុជាទាំងមូល ឲ្យរួចចាកផុតពីសម័យប្រល័យពូជសាសន៍នៃរបបប៉ុល ពត ។ ៥- ខួប២០ឆ្នាំនៃនយោបាយឈ្នះ -ឈ្នះ (១៩៩៨-២០១៨) បានឯកភាពរួបរួមគ្នាពីគ្រប់គណបក្សនយោបាយទាំងអស់ឲ្យមករួមរស់នៅជាមួយគ្នារហូតដល់សព្វថ្ងៃនេះ ។ ៦- ខួបលើកទី៦៥ នៃថ្ងៃ៩ វិច្ឆិកា ឆ្នាំ១៩៥៣ ជាថ្ងៃកំណើតរបស់កងយោធពលខេមរភូមិន្ទដែលបានកកើតមកឆ្លងកាត់សង្គ្រាមរាប់មិនអស់ទើបតែមានសុខសន្តិភាពពេញលេញ និងការអភិវឌ្ឍរហូតដល់ពេលនេះ ។
បន្ទាប់មកលោកឧត្តមសេនីយ៍ទោ សរ គឹមប៉ាក់ មេបញ្ជាការរងយោធភូមិភាគទី៥ បានធ្វើបទបង្ហាញស្តីពីការបង្កើតនូវវិមានឈ្នះ-ឈ្នះ នៅតំបន់អភិវឌ្ឍន៍លីយ៉ុងផាត់ សង្កាត់បាក់ខែង ខណ្ឌជ្រោយចង្វា រាជធានីភ្នំពេញ ។ លោកឧត្តមសេនីយ៍ត្រី ទេព សារ៉េត នាយសេនាធិការរងយោធភូមិភាគទី៥ បានធ្វើបាឋកថាជាប្រវត្តិសាស្ត្រ ស្តីពីទិវាចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍របស់សមមិត្ត ហ៊ុន សែន ចាប់ផ្តើមពីកោះថ្ម ឃុំទន្លូង ស្រុកមេមត់ ខេត្តកំពង់ចាម (បច្ចុប្បន្នខេត្តត្បូងឃ្មុំ) ហើយបានកសាងវិមាន ឈ្នះ-ឈ្នះ នៃការបញ្ចប់សង្គ្រាមស៊ីវិលដែលបានកើតមានឡើងនៅក្នុងប្រទេសកម្ពុជារហូតសព្វថ្ងៃ ៕
ចែករំលែកព័តមាននេះ