អភិបាលរងខេត្តបាត់ដំបង សង្ស័យក្លែងឯកសារស៊ីដាច់ទាំងដី ស៊ីដាច់ទាំងលុយ…?
- បាត់ដំបង
ខេត្តបាត់ដំបង ៖ យោងលើឯកសារនានា និងតាមការបំភ្លឺដោយផ្ទាល់ពីដើមបណ្ដឹងផង បានទម្លាយឲ្យ ដឹងថា លោក ស៊ូ អារ៉ាហ្វាត់ អភិបាលរងខេត្តបាត់ដំបង…
ខេត្តបាត់ដំបង ៖ យោងលើឯកសារនានា និងតាមការបំភ្លឺដោយផ្ទាល់ពីដើមបណ្ដឹងផង បានទម្លាយឲ្យ
ដឹងថា លោក ស៊ូ អារ៉ាហ្វាត់ អភិបាលរងខេត្តបាត់ដំបង ទំនងបានក្លែងឯកសារ និងបញ្ចុះបញ្ចូលឲ្យលោក
ច័ន្ទ សុផល អតីតអភិបាលខេត្តយល់ព្រមចុះហត្ថលេខាគោរពជូនសម្ដេចក្រឡាហោម ស ខេង ដើម្បីសុំគោលការកាត់ដីចំនួន២.៥០០ហិកតា ពីលោកឧកញ៉ាម្នាក់លើសពីចំនួនដែលលោកឧកញ៉ារូបនេះ បានធ្វើលិខិតសុំប្រគល់ដីដោយស្មោះជូនសម្ដេចក្រឡាហោម ត្រឹមតែ៧០០ហិកតា ដើម្បីប្រើប្រាស់ជាប្រយោជន៍រួម និងបែងចែកជូនប្រជាពលរដ្ឋជិត២០០គ្រួសារ ដែលមានជម្លោះដីធ្លីតំបន់នោះ ។
លោកឧកញ៉ា សង ថន ដែលជាម្ចាស់ដី និងជាដើមបណ្ដឹងផង បានប្រាប់កោះសន្តិភាពកាលពីពេលថ្មីៗកន្លងទៅនេះថា លោក ស៊ូ អារ៉ាហ្វាត់ អភិបាលរងខេត្ត មិនត្រឹមតែផ្ដើមគំនិតក្លែងឯកសារដាក់ជូនសម្ដេចក្រឡាហោមក្នុងគោលបំណងបន្លំស៊ីដាច់ដីរបស់លោកជិត២.០០០ហិកតាប៉ុណ្ណោះទេ ថែមទាំងបានស៊ីដាច់ប្រាក់របស់លោកចំនួន២៥.០០០ដុល្លារទៀត ជាថ្នូរនឹងការសន្យាថា យកទៅរត់ការធ្វើប្លង់ដីឲ្យលោក តែរហូតមកដល់ពេលនេះស្ងាត់ឈឹងតែម្ដង ហើយចង់ស៊ីដាច់ទាំងដីទៀត ។
លោកឧកញ៉ា សង ថន បានថ្លែងថា ដោយសារតែលោកចង់បញ្ចប់វិវាទដីធ្លីជាមួយពលរដ្ឋជិត២០០គ្រួសារដែលទន្ទ្រានយកដីរបស់លោកនៅតំបន់នោះ លោកក៏បានសម្រេចធ្វើលិខិតជាផ្លូវការសុំប្រគល់ដី ជូនសម្ដេចក្រឡាហោម ស ខេង ចំនួន៧០០ហិកតា នៅស្រុកគាស់ក្រឡ ដើម្បីសុំឲ្យសម្ដេចជួយបែងចែងជូនពលរដ្ឋទាំងនោះនិងសល់ប៉ុន្មានទុកប្រើប្រាស់ជាប្រយោជន៍រួម ។
ប៉ុន្តែបែរជាលោក ស៊ូ អារ៉ាហ្វាត់ ដែលទទូលបន្ទុកដោះស្រាយវិវាទដីធ្លីនៅស្រុកគាស់ក្រឡក្លែងឯកសារផ្ទុយពីលិខិតដើម របស់លោកដាក់ជួនសម្ដេចក្រឡាហោម សុំគោលការកាត់យកដីពីលោក រហូតដល់ទៅចំនួន២.៥០០ហិកតា លើសពីចំនួនដីដែលលោកបានប្រគល់ជួនសម្ដេចទៅវិញ ។ លោកថាបានដឹងរឿងនេះ បន្ទាប់ពីក្រសួងមហាផ្ទៃចេញសេចក្ដីជូនដំណឹងឆ្លើយតបមកលោកវិញអំពីរឿងប្រគល់ដីនេះ ។
យោងតាមលិខិតមួយច្បាប់របស់លោកឧកញ៉ា សង ថន ដែលគោរពជូនសម្ដេចក្រឡាហោម ស ខេង ចុះថ្ងៃទី៦ កញ្ញា ២០១៦ តាមរយៈអភិបាលស្រុកគាស់ក្រឡ និង អភិបាលខេត្តបាត់ដំបងដែលកម្មវត្ថុនៃលិខិតនេះ លោក សង ថន បានសុំប្រគល់ដីជួនសម្ដេចក្រឡហោម ចំនួន៧០០ហិកតាដែលស្ថិតក្នុងស្រុកគាស់ក្រឡ ។ នៅក្នុងលិខិតនោះ លោក សង ថន បានរៀបរាប់ថា លោកមានដីចំនួន៥.១៤៤ហិកតា ស្ថិតនៅក្នុងឃុំឆ្នាល់មាន់ ឃុំព្រះផុស និងឃុំដូនបា ស្រុកគាស់ក្រឡ ។
លោកបានចំណាយប្រាក់ផ្ទាល់ខ្លួនទិញដីនោះពីរបបគោលនយោបាយយោធាតំបន់អភិវឌ្ឍន៍ភូមិភាគទី៥ និងមន្ត្រីរាជការនានា កាលពីអំឡុងឆ្នាំ២០០០ ហើយបានអាស្រ័យផលរហូតមក ។ ប៉ុន្តែមិនទាន់មានប័ណ្ណកម្មសិទ្ធិកាន់កាប់នៅឡើយទេ តែមានលិខិតលក់ទិញដែលទទូលស្គាល់ដោយអាជ្ញាធរមូលដ្ឋានត្រឹមត្រូវទាំងអស់ ។ លុះប៉ុន្មានឆ្នាំក្រោយមកក៏មានពលរដ្ឋនិងគ្រួសារយោធាមួយចំនួនផង សរុបប្រមាណជិត២០០គ្រួសារ បានចូលទន្ទ្រានកាន់កាប់ដីរបស់លោកអស់មួយចំនួន បង្កជាជម្លោះរ៉ាំរ៉ៃរហូតមកដល់ពេលនេះ ។
ប៉ុន្តែជាមួយនឹងការប្រគល់ដីចំនួន៧០០ហិកតាជូនសម្ដេចក្រឡាហោម ដើម្បីជួយដោះស្រាយបញ្ចប់ជម្លោះនេះ លោក សង ថន បានស្នើសុំឲ្យសម្ដេច ជួយអន្តរាគមន៍ទៅគណៈកម្មការដោះស្រាយវិវាទដីធ្លីខេត្តឲ្យប្រគល់ដីទំហំជាង៨៩៣ហិកតា ដែលបានដកហូតបណ្ដោះអាសន្នកន្លងទៅមកឲ្យលោកវិញ និងស្នើសុំសម្ដេចជួយដោះស្រាយដល់មន្ទីររៀបចំដែនដីនគររូបនីយកម្មសំណង់ និងសុរិយោដីខេត្ត រួមទាំងអាជ្ញា
ធរគ្រប់ជាន់ថ្នាក់ផង ជួយធ្វើប័ណ្ណសម្គាល់សិទ្ធិកាន់កាប់ដីធ្លីលើផ្ទៃដីចំនួន៤.៤៤៤ហិកតា ដែលសេសសល់ពីការវាស់វែងជាក់ស្ដែងរបស់គណៈកម្មការ ដើម្បីលោកបានប្រើប្រាស់ ។
ជាមួយនឹងលិខិតប្រគល់ដីរបស់លោក សង ថន ខាងលើនេះ កាលនោះគេមិនដឹងថា លោកផេងសិទ្ធី បានបញ្ជូនលិខិតនេះទៅលោកអភិបាលខេត្ត ដើម្បីពិនិត្យដែរឬយ៉ាងណានោះទេ ស្រាប់តែនៅថ្ងៃទី៨ ឧសភា២០១៧ រដ្ឋបាលខេត្ត បានចេញលិខិតមួយច្បាប់ ដែលមានបោះត្រានិងចុះហត្ថលេខាដោយលោក ច័ន្ទ សុផល អភិបាលខេត្ត (បច្ចុប្បន្នចូលនិវត្តន៍) គោរពជួនសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងកម្មវត្ថុ៖ សំណើសុំគោលការកាត់ដីលោកសង ថន ចំនួន២.៥០០ហិកតា ដែលស្ថិតក្នុងឃុំចំនួន៣ ក្នុងស្រុកគាស់ក្រឡ ។
កម្មវត្ថុនៃលិខិតនេះ រដ្ឋបាលខេត្ត បានយោងលើកំណត់ហេតុ នៃកិច្ចប្រជុំរបស់គណៈកម្មការដោះស្រាយទំនាស់ដីធ្លីខេត្តនៅថ្ងៃទី២ ឧសភា ២០១៧ ដែលបានពិភាក្សាសម្រេចកាត់ដីលោក សង ថន ចំនួន២.៥០០ហិកតា លើផ្ទៃដីសរុបចំនួន៥.១៤៤ហិកតា ដែលស្ថិតនៅ ក្នុងស្រុកគាស់ក្រឡ ជូនសម្ដេចក្រឡាហោមសម្រាប់ចែកជួនពលរដ្ឋនៅទីនោះជាក់ស្ដែង ។
ប៉ុន្តែលោកឧកញ៉ា សង ថន បានជំទាស់ទៅនិងលិខិតរបស់សាលាខេត្តនេះក្រោយពីបែកធ្លាយ ។ ពេលផ្ដល់បទសម្ភាសន៍ជាមួយកោះសន្តិភាព លោកឧកញ៉ា សង ថន បានចង្អុលមុខចំៗទៅលើលោក ស៊ូ អារ៉ាហ្វាត់ អភិបាលរងខេត្តថា «ជាអ្នករៀបចំលិខិតនេះ រួចបញ្ចុះបញ្ជូលឲ្យលោក ច័ន្ទ សុផល ដែលកាលនោះលោកជាអភិបាលខេត្ត ចុះហត្ថលេខា ដើម្បីគោរពជូនសម្ដេចក្រឡាហោម សុំកាត់ដីលោកចំនួន២.៥០០ហិកតា
ព្រោះលោក ស៊ូ រ៉ាហ្វាត់ ទទូលបន្ទុកដោះស្រាយវិវាទដីធ្លីនៅស្រុកគាស់ក្រឡ ហើយបានកាន់សំណុំរឿងដីធ្លីរបស់ខ្ញុំផ្ទាល់» ។
ជុំវិញការចោទប្រកាន់ទៅលើលោក ស៊ូ អារ៉ាហ្វាត់ អំពីការក្លែងឯកសារ ជូនសម្ដេចក្រឡាហោម ក្នុងចេតនាបន្លំយកដី និងស៊ីដាច់ប្រាក់ចំនួន២៥.០០០ដុល្លារ ជាថ្នូរនឹងការរត់ការធ្វើប្លង់ដីឲ្យលោក សង ថន ខាងលើនេះ ។ លោក ស៊ូ អារ៉ាហ្វាត់ អភិបាលរងខេត្ត មិនបានបំភ្លឺលម្អិតទៅនឹងការចោទប្រកាន់នេះទេ ។ លោកបានឆ្លើយសរុបយ៉ាងខ្លីប្រាប់ «កោះសន្តិភាព»តាមទូរស័ព្ទថា «រឿងនេះបើតាមខ្ញុំដឹង គឺលោក សង ថន បានប្ដឹងទៅតុលាការហើយ…ហើយតុលាការកំពុងចាត់ការលើរឿងនេះ» ។
ពាក់ព័ន្ធនឹងបញ្ហានេះបើតាមលោក សង ថន បានប្រាប់ថា ក្រោយពីលោកបានទទួលស.ជ.ណនេះ ប៉ុន្មានថ្ងៃក្រោយលោកក៏បានឡើងទៅក្រសួងមហាផ្ទៃដើម្បីសួរនាំអំពីលិខិតប្រគល់ដីចំនួន៧០០ហិកតា របស់លោកជូនសម្ដេចក្រឡាហោម តែខាងក្រសួងមិនបានឃើញរដ្ឋបាលខេត្តបញ្ជូនលិខិតនោះទៅទេ ឃើញតែលិខិតរដ្ឋបាលខេត្ត ដែលស្នើសុំកាត់ដីរបស់លោកចំនួន២.៥០០ហិកតាតែប៉ុណ្ណោះ ។ លោកបានបញ្ជាក់ដែរថា ជុំវិញករណីនេះ លោកបានដាក់ពាក្យបណ្ដឹងរួចហើយអំពីបញ្ហានេះ ដើម្បីទាមទារយកដីមកវិញជាបណ្ដោះអាសន្នសិន និងទាមទារឲ្យលោកស៊ូ អារ៉ាហ្វាត់ សងប្រាក់ចំនួន២៥.០០០ដុល្លារនោះ មកឲ្យលោកវិញទៀតផង ៕
ចែករំលែកព័តមាននេះ