ចិន ៖ តាមប្រភពព័ត៌មាន Shanghaiist បានឲ្យដឹងថា ក្រុមហ៊ុនលក់គ្រឿងសង្ហារឹម និងឧបករណ៍ផ្សេងៗនៅក្នុងផ្ទះ IKEA ត្រូវសងសំណងជាទឹកប្រាក់៥៧០០ដុល្លារ ដើម្បីជាសំណងដល់ស្ត្រីម្នាក់នៅទីក្រុងប៉េកាំង ដែលត្រូវបែកមាត់ដោយសារតែពែងរបស់ក្រុមហ៊ុននេះ។
រឿងហេតុបែកពែងត្រូវមាត់ រហែកដេរនៅពេទ្យ កើតឡើងតាំងពីថ្ងៃទី២០ ខែឧសភា ឆ្នាំ២០១៧ តែទើបតែត្រូវតុលាការសម្រេចក្តីកាលពីថ្ងៃទី២៩ ខែតុលា កន្លងផុតទៅថ្មីៗនេះ។ ស្ត្រីត្រកូល Wang បានដាក់ទឹកក្តៅនៅក្នុងពែងរបស់នាង ដែលមានម៉ាក IKEA ហើយប្រុងនឹងផឹក។ តែពែងនោះស្រាប់តែផ្ទុះបែក ត្រូវមាត់របស់នាង បណ្តាលឲ្យរហែកស្បែកហូរឈាម និងបាក់ធ្មេញខាងមុខ។ នាងត្រូវទៅពេទ្យ ដើម្បីដេរភ្ជាប់ និង ត្រូវទៅពិនិត្យឡើងវិញចុះឡើងរហូតដល់១២ដង។
នាងថា នាងមិនត្រឹមតែត្រូវរបួសខាងផ្លូវកាយប៉ុណ្ណោះទេ តែផ្លូវចិត្តរបស់នាងគឺរងគ្រោះខ្លាំងបំផុត។ នាងថា នាងតែងតែភ័យញ័រទ្រូងពេលលឺសម្លេងខ្លាំងៗ ហើយមិនអាចដេកទៅវិញបានពេលលឺសម្លេងទាំងនោះនៅពេលយប់។ អ្វីដែលសំខាន់ គឺវាប៉ះពាល់ដល់ការងាររបស់នាង។
នៅខែមីនាឆ្នាំនេះ នាងបានដាក់ពាក្យបណ្តឹងទាមទារសំណងពីក្រុមហ៊ុន IKEA ដល់ទៅ ១៥៨.០០០ដុល្លារ សម្រាប់ការផលិតផលិតផលមិនល្អ។ តែខាងក្រុមហ៊ុន បានធ្វើតេស្តបង្ហាញដល់តុលាការឲ្យឃើញពីគុណភាពរបស់ផលិតផលខ្លួន។ គេក៏ឃើញថា គ្មានបញ្ហាអ្វីឡើយ។ នៅខែកក្កដា តុលាការបានសម្រេចឲ្យ IKEA បង់ប្រាក់សំណង ៥.៧០០ដុល្លារ បូកនឹងថ្លៃពែងដែលបែក៥កាក់ថែមទៀត។
នៅពេលថ្ងៃទី២៩ ខែមុន តុលាការក៏សម្រេចក្តីជាលើកចុងក្រោយ ដើម្បីឲ្យភាគីទាំងពីរសុខចិត្តរៀងៗខ្លួន៕
ចែករំលែកព័តមាននេះ