ប្រទេសស៊ីរី-រុស្ស៊ី ៖ រដ្ឋអំណាចស៊ីរីបានចោទប្រកាន់បណ្ដាក្រុមភេរវករថា វាយប្រហារដោយអាវុធគីមីក្នុងទីក្រុងអាឡែប ជាសោកនាដកម្មមួយដែលបណ្ដាលឲ្យមនុស្ស ប្រមាណជា១០០នាក់រងការបំពុលដោយសារធាតុក្លូរ ហើយជម្រុញ ឲ្យមានការវាយប្រហារតាមអាកាសសងសឹក កាលពីថ្ងៃទី២៥ វិច្ឆិកា…
ប្រទេសស៊ីរី-រុស្ស៊ី ៖ រដ្ឋអំណាចស៊ីរីបានចោទប្រកាន់បណ្ដាក្រុមភេរវករថា វាយប្រហារដោយអាវុធគីមីក្នុងទីក្រុងអាឡែប ជាសោកនាដកម្មមួយដែលបណ្ដាលឲ្យមនុស្ស ប្រមាណជា១០០នាក់រងការបំពុលដោយសារធាតុក្លូរ ហើយជម្រុញ ឲ្យមានការវាយប្រហារតាមអាកាសសងសឹក កាលពីថ្ងៃទី២៥ វិច្ឆិកា ពីសំណាក់កងយន្តហោះរុស្ស៊ីជាសម្ព័ន្ធមិត្ត។
ក្រុមចម្រុះឧទ្ទាមសំខាន់មួយបានបដិសេធរាល់ការចូលរួមរបស់ខ្លួន ក្នុងការវាយប្រហារនេះកាលពីយប់ថ្ងៃទី២៤វិច្ឆិកា ប្រឆាំងក្រុងអាឡែបភាគខាងជើងស៊ីរី កាន់កាប់ដោយរបបក្រុងដាម៉ាស់។ អាជ្ញាធរស៊ីរីនិងសម្ព័ន្ធមិត្តរុស្ស៊ីលើកពីលទ្ធភាពនៃការប្រើឧស្ម័នក្លូរ។
ក្នុងប្រទេសមួយដែលខ្ទេចខ្ទាំដោយសង្គ្រាមចាប់តាំងពីឆ្នាំ២០១១មក បណ្ដាលឲ្យមនុស្សស្លាប់ជាង៣៦០.០០០នាក់រួចហើយ រដ្ឋអំណាចស៊ីរីជាញឹកញាប់រងការចោទប្រកាន់ថា ប្រើប្រាស់អាវុធគីមី នាឱកាសនៃការវាយប្រហារយ៉ាងបង្ហូរឈាមនានា។ ប៉ុន្តែកាលពីថ្ងៃទី២៤ វិច្ឆិកា អាជ្ញាធរស៊ីរីបានចោទប្រកាន់បណ្ដាក្រុមឧទ្ទាមថា វាយប្រហារដោយអាវុធគីមីប្រឆាំងក្រុងអាឡែប។
យោងតាមអ្នកកាសែតម្នាក់របស់AFPថាបានឃើញមនុស្សជាច្រើនសិបនាក់ ក្នុងនោះមាននារីនិងកុមារ ត្រូវបានបញ្ជូននាយប់ថ្ងៃទី២៤ទៅ២៥ វិច្ឆិកា ទៅកាន់មន្ទីរពេទ្យមួយនៃក្រុងអាឡែប មួយចំនួនដេកលើប្រង់កាហើយពាក់ប្រដាប់ជំនួយក្នុងការដកដង្ហើម។ ចំណែកទីភ្នាក់ងារព័ត៌មានស៊ីរី SANA រៀបរាប់ពីមនុស្ស១០៧នាក់រងការបំពុល ដោយសារធាតុក្លូរ។ អង្គការសិទ្ធិមនុស្សស៊ីរី OSDH រៀបរាប់ពីអ្នកពុល៩៤នាក់ ហើយពួកគេភាគច្រើនអាចចាកចេញពីមន្ទីរពេទ្យក្រោយទទួលការព្យាបាល។
យោងតាមក្រសួងការពារប្រទេសរុស្ស៊ីថា ជាការសងសឹកកងយន្តហោះរុស្ស៊ីបានវាយប្រហារ ទីតាំងទាំងឡាយរបស់ពួកភេរវករ ហើយបណ្ដាគោលដៅត្រូវបានកម្ទេច។ ប្រមុខប៉ូលិសក្រុងអាឡែប បានចោទប្រកាន់បណ្ដាក្រុមភេរវករថា ប្រើប្រាស់គ្រាប់រ៉ុក្កែតនានាផ្ទុកឧស្មន់ពុល។ នៅក្រុងមូស្គូក្រសួងការពារប្រទេសរុស្ស៊ីនិយាយពីការវាយប្រហារដោយគ្រាប់ផ្លោងទំហំ១២០មីលីម៉ែត្រដែលផ្ទុកសារធាតុក្លូរ។
យោងតាម OSDH ថា ការវាយប្រហារតាមអាកាសដែលជាលើកដំបូង រយៈពេលជាង២ខែមកហើយ សំដៅលើបណ្ដាដែនដីត្រួតត្រាដោយពួកជីហាដនិងពួកឧទ្ទាម នៅជិតទីក្រុងអាឡែប។ ចាប់តាំងពីដំណាច់ឆ្នាំ២០១៦មក ក្រុងអាឡែបស្ថិតក្រោមការត្រួតត្រារបស់របបស៊ីរី ប៉ុន្តែបណ្ដាតំបន់នៅជាយក្រុងភាគខាងលិចនៃក្រុងនេះ កាន់កាប់ដោយបណ្ដាក្រុមឧទ្ទាមនិងពួកជីហាដ។ពួកឧទ្ទាមនិងពួកជីហាដត្រួតត្រាផ្នែកមួយយ៉ាងធំនៃខេត្តអីុតលីប៕
ចែករំលែកព័តមាននេះ