រាជធានីភ្នំពេញ ៖ ក្នុងអំឡុងពេលចូលរួមសន្និបាតការិយាល័យពិព័រណ៍អន្តរជាតិ នៅប្រទេសបារាំង លោករដ្ឋមន្ត្រីក្រសួងពាណិជ្ជកម្មកម្ពុជាបានស្នើឲ្យប្រទេសធំៗចំនួន៣មកវិនិយោគលើវិស័យសំខាន់ៗមួយចំនួនដែលកំពុងមានសក្ដានុពល និងមានតម្រូវការខ្ពស់លើទីផ្សារអន្តរជាតិ ។ លោក ប៉ាន សូរស័ក្តិ…
រាជធានីភ្នំពេញ ៖ ក្នុងអំឡុងពេលចូលរួមសន្និបាតការិយាល័យពិព័រណ៍អន្តរជាតិ នៅប្រទេសបារាំង លោករដ្ឋមន្ត្រីក្រសួងពាណិជ្ជកម្មកម្ពុជាបានស្នើឲ្យប្រទេសធំៗចំនួន៣មកវិនិយោគលើវិស័យសំខាន់ៗមួយចំនួនដែលកំពុងមានសក្ដានុពល និងមានតម្រូវការខ្ពស់លើទីផ្សារអន្តរជាតិ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជំរុញឱ្យវិស័យឯកជនប្រទេសបារាំងធ្វើការវិនិយោគលើវិស័យអាទិភាពចំនួន៤នៅកម្ពុជា រួមមាន វាយនភ័ណ្ឌ, កសិកម្ម, ម្ហូបអាហារកែច្នៃ និងទេសចរណ៍ ដើម្បីធ្វើពិពិធកម្ម ឱកាសការងារជូនប្រជាជន និងជំរុញការអភិវឌ្ឍកំណើនសេដ្ឋកិច្ចកម្ពុជា ។
នៅក្នុងជំនួបជាមួយ លោក ហ្សង់ព្យែរវ៉ាហ្វារាំង (Jean-Pierre Raffarin) ប្រធានមូលនិធិ FPI និងជាអតីតនាយករដ្ឋមន្ត្រីបារាំង និងបច្ចុប្បន្នជាសមាជិកសភាកិត្តិយសនៃប្រទេសបារាំង លោករដ្ឋមន្ត្រី ប៉ាន សូរស័ក្តិ បានជម្រាបជូនអំពីកំណើនសេដ្ឋកិច្ចដ៏រឹងមាំរបស់កម្ពុជា គោលនយោបាយវិនិយោគ និងយុទ្ធសាស្ត្រចតុកោណថ្មី ដែលផ្តោតសំខាន់លើការធ្វើឱ្យប្រសើរឡើងថែមទៀត នូវអភិបាលកិច្ចល្អ ដើម្បីពង្រឹងកំណើន ការងារ សមធម៌ និងប្រសិទ្ធភាព សំដៅឆ្លើយតបនឹងបំណងប្រាថ្នាដ៏ពិសិដ្ឋរបស់ប្រជាជន ។ លោកបានស្នើរដ្ឋាភិបាលបារាំងឱ្យបន្តពង្រឹងកិច្ចសហប្រតិបត្តិការជាមួយកម្ពុជា ដើម្បីអភិវឌ្ឍន៍វិស័យអាទិភាព និងបានលើកឡើងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការសម្រួលគម្រោងវិនិយោគនានា ក៏ដូចជាការបន្តលើកកម្ពស់បរិយាកាសធុរកិច្ច និងកិច្ចសម្រួលពាណិជ្ជកម្ម ដើម្បីធានាដល់ការលូតលាស់នៃវិស័យឯកជននៅក្នុងប្រទេស ។
នៅក្នុងពេលជាមួយគ្នានោះដែរ រដ្ឋមន្ត្រីក្រសួងពាណិជ្ជកម្ម ក៏បានស្នើនិងជំរុញប្រទេសជប៉ុន និងកូរ៉េ មកវិនិយោគលើការអភិវឌ្ឍខ្សែសង្វាក់តម្លៃដំណាំដំឡូងមី និងកសិផលផ្សេងទៀត មានដូចជា ស្រូវ ពោត សណ្តែក និងឈើហូបផ្លែ ដើម្បីពង្រីកវត្តមានផលិតផលខ្មែរនៅលើទីផ្សារ និងជំរុញការនាំចេញរបស់កម្ពុជា ទៅកាន់ទីផ្សារអន្តរជាតិឱ្យបានអតិបរមា ។ លោកបានបង្ហាញ ពីអត្ថប្រយោជន៍នៃគោលនយោបាយគាំពារវិនិយាគរបស់កម្ពុជា និងការលើកទឹកចិត្តផ្សេងៗរបស់រាជរដ្ឋាភិបាល ដូចជាការលើកលែងពន្ធលើប្រាក់ចំណេញ និងពន្ធលើការនាំចូលសម្ភារ និងឧបករណ៍កសិកម្ម ក៏ដូចជាសក្តានុពលនៃវិស័យវប្បធម៌ និងទេសចរណ៍ធម្មជាតិ ។
លោក ហ្សង់ ព្យែររ៉ាហ្វារាំង ប្រធានមូលនិធិ FPI និងជាអតីតនាយករដ្ឋមន្ត្រីបារាំង បានមានប្រសាសន៍ថា ចំពោះការស្នើឲ្យវិនិយោគិនបារាំង វិនិយោគនៅកម្ពុជា លោកនឹងជម្រាបទៅកាន់រដ្ឋាភិបាលបារាំងឲ្យគិតគូរ និងជួយគៀងគរវិនិយោគិនបារាំង ចូលបណ្ដាក់ទុនវិនិយោគលើវិស័យអាទិភាពមួយចំនួននៅកម្ពុជា ដើម្បីបង្កើនទំហំពាណិជ្ជកម្ម និងដើម្បីពង្រឹង ពង្រីកកិច្ចសហប្រតិបត្តិការសេដ្ឋកិច្ចនៃប្រទេសទាំង
ពីរ ។ លោកសន្យាថា នឹងដឹកនាំប្រតិភូវិនិយោគិនបារាំង មករៀបចំវេទិកាជំនួបធុរកិច្ច នៅក្នុងប្រទេសកម្ពុជា នារដូវក្តៅឆ្នាំ២០១៩ ខាងមុខ អមជាមួយព្រឹត្តិការណ៍ជំរុញពាណិជ្ជកម្មផ្សេងៗ ឱ្យបានយ៉ាងតិចមួយដងក្នុង១ឆ្នាំ ៕
ចែករំលែកព័តមាននេះ