ខេត្តព្រះវិហារ ៖ ក្នុងឱកាសនៃព្រះរាជពិធីបុណ្យអុំទូកបណ្តែតប្រទីបសំពះព្រះខែ និង អកអំបុកឃើញថា ភ្ញៀវទេសចជាតិ និងអន្តរជាតិដែលបានធ្វើដំណើរមកពីគ្រប់ទិសទីបានចូលមកលេងកម្សាន្តនៅតាមបណ្តារមណីយដ្ឋាននានាក្នុងព្រះវិហារប្រមាណជាង២ម៉ឺននាក់ ចំនួននេះមានការកើនឡើង ៤.៣៧% បើធៀបនឹងឆ្នាំមុន ។
ថ្លែងប្រាប់អ្នកសារព័ត៌មានលោក គង់ វិបុល ប្រធានមន្ទីរទេសចរណ៍ខេត្តព្រះវិហារបានឲ្យដឹងថា ក្នុងឱកាសព្រះរាជពិធីបុណ្យអុំទូកបណ្តែតប្រទីបសំពះព្រះខែ និងអកអំបុកកន្លងទៅនេះតាមការសង្កេតឃើញភ្ញៀវទេសចរជាតិ និងអន្តរជាតិបានមកលេងកម្សាន្តនៅក្នុងតំបន់រមណីយដ្ឋានគោលដៅផ្សេងៗរបស់ខេត្តព្រះវិហារដែលក្នុងនោះរមណីយដ្ឋានសំខាន់ៗ៤កន្លែងក្នុងខេត្តព្រះវិហាររួមមាន រមណីយដ្ឋាន វប្បធម៌ប្រវត្តិសាស្ត្រ ប្រាសាទព្រះវិហារ រមណីយដ្ឋានវប្បធម៌ប្រវត្តិសាស្ត្រប្រាសាទកោះកែរ រមណីយដ្ឋានវប្បធម៌ប្រវត្តិសាស្ត្រ ប្រាសាទព្រះខ័នកំពង់ស្វាយ និងរមណីយដ្ឋានទឹកធ្លាក់ព្រះនិមិត្ត និងគោលដៅផ្សេងៗដោយគិតចាប់ពីថ្ងៃទី២១-២២-២៣-២៤ ខែវិច្ឆិកា ឆ្នាំ២០១៨នេះ មានភ្ញៀវទេសចរសរុប២១,១៤៨នាក់ កើនឡើង៤.៣៧% ក្នុងនោះភ្ញៀវជាតិមានចំនួន២០,១៨៣នាក់កើនឡើង២.៣៨% ភ្ញៀវអន្តរជាតិមានចំនួន៩៦៧នាក់កើនឡើង៧៦.៧៣% នេះបើធៀបនឹងរយៈពេលដូចគ្នានៃព្រះរាជពិធីបុណ្យអុំទូក កាលពីឆ្នាំ២០១៧កន្លងទៅ ។
ជាមួយគ្នានេះលោកឧត្តមសេនីយ៍ត្រី ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តព្រះវិហារបានឲ្យដឹងថា ក្នុងកំឡុងពេលបុណ្យអុំទូកបណ្តែតប្រទីបសំពះព្រះខែ និងអកអំបុកកន្លងទៅនេះឃើញថា សភាពការសន្តិសុខសណ្តាប់ធ្នាប់សាធារណៈនៅគ្រប់ទីកន្លែងកម្សាន្តនានាមានភាពល្អប្រសើរមិនមានភាពអសកម្មណាមួយឡើយដោយសារតែកម្លាំងការពារសន្តិសុខរបស់ខេត្តព្រះវិហារបានដាក់ប្រចាំការនៅគ្រប់គោលដៅទាំងអស់ ដើម្បីរក្សានូវសន្តិសុខ សណ្តាប់ធ្នាប់ ជូនដល់ប្រជាពលរដ្ឋក៏ដូចជា ភ្ញៀវទេសចរដែលបានមកកម្សាន្តនៅតាមតំបន់រមណីយដ្ឋាននានាក្នុងខេត្តព្រះវិហារយ៉ាងម៉ឹងម៉ាត់ ។
ចែករំលែកព័តមាននេះ