ខេត្តព្រះសីហនុ ៖ ជាប្រវត្តិសាស្ត្រម្តងទៀត បន្ទាប់ពីរដូវបុណ្យភ្ជុំបិណ្ឌដែលភ្ញៀវទេសចរធ្លាក់ចុះ គួរឱ្យកត់សម្គាល់នោះ នៅក្នុងព្រះរាជពិធីបុណ្យអុំទូកកន្លងទៅថ្មីៗនេះ អ្នកទេសចរបានធ្លាក់ចុះដល់២៥,៨៨% ស្របពេលដែលកំណើនសេដ្ឋកិច្ចនិងការអភិវឌ្ឍមានការកើនឡើងយ៉ាងគំហុក ក្នុងរយៈពេលជិត២ឆ្នាំចុងក្រោយនេះ ។…
ខេត្តព្រះសីហនុ ៖ ជាប្រវត្តិសាស្ត្រម្តងទៀត បន្ទាប់ពីរដូវបុណ្យភ្ជុំបិណ្ឌដែលភ្ញៀវទេសចរធ្លាក់ចុះ គួរឱ្យកត់សម្គាល់នោះ នៅក្នុងព្រះរាជពិធីបុណ្យអុំទូកកន្លងទៅថ្មីៗនេះ អ្នកទេសចរបានធ្លាក់ចុះដល់២៥,៨៨% ស្របពេលដែលកំណើនសេដ្ឋកិច្ចនិងការអភិវឌ្ឍមានការកើនឡើងយ៉ាងគំហុក ក្នុងរយៈពេលជិត២ឆ្នាំចុងក្រោយនេះ ។
យោងតាមស្ថិតិភ្ញៀវទេសចរ ដែលមកកម្សាន្តនៅខេត្តព្រះសីហនុ ក្នុងព្រះរាជពិធីបុណ្យអុំទូកបណ្តែតប្រទីប សំពះព្រះខែ និងអកអំបុក រយៈពេល៣ថ្ងៃ ពីថ្ងៃទី២១ ដល់ថ្ងៃទី២៣ ខែវិច្ឆិកាឆ្នាំ២០១៨ លោក វ៉េង ស៊ីសុវង្ស អនុប្រធានមន្ទីរទេសចរណ៍ខេត្ដ ប្រាប់ឲ្យដឹងថា ក្នុងរយៈពេល៣ថ្ងៃនៃព្រះរាជពិធីបុណ្យអុំទូក បណ្ដែតព្រះទីប សំពះព្រះខែ និងអកអំបុកឆ្នាំនេះ ខេត្តព្រះសីហនុទទួលភ្ញៀវទេសចរសរុបប្រមាណ៦៣.០០០នាក់ ថយចុះ២៥,៨៨% ក្នុងនោះភ្ញៀវជាតិមានប្រមាណ៥០.២៣០នាក់ ថយចុះ៣២,០៧% តែភ្ញៀវអន្តរជាតិមានប្រមាណ១២.៧៧០នាក់ កើនឡើង១៥,៥៦% ។
ភ្ញៀវទៅកម្សាន្ត តាមបណ្តាកោះមានចំនួនសរុប៦.៤៨៩នាក់(ស្រី២.៨៥៥នាក់) កើនឡើង ៨,៣៦% ក្នុងនោះភ្ញៀវជាតិចំនួន៣.០០១នាក់(ស្រី១.២៣៥នាក់) ថយចុះ៨៧,៨៩% និងភ្ញៀវអន្តរជាតិមានចំនួន៣.៤៨៨នាក់(ស្រី ១.៧០០នាក់) កើន២៧,៧០%។ ភ្ញៀវទេសចរចូលតាមអាកាសយានដ្ឋានអន្តរជាតិខេត្តព្រះសីហនុមានចំនួន៥.៤០០នាក់ ក្នុងនោះភ្ញៀវជាតិចំនួន៥០នាក់ និងភ្ញៀវបរទេស ៥.៣៥០នាក់ ។
នៅថ្ងៃទី២២ ខែវិច្ឆិកា ឆ្នាំ២០១៨ មាននាវាទេសចរណ៍ចូលចតនៅកំពង់ផែអន្តរជាតិខេត្តព្រះសីហនុចំនួន១គ្រឿង ភ្ញៀវសរុប១.៨៥៤នាក់(ស្រី៩៦១នាក់) មាននាវិកសរុប៧៩៣នាក់(ស្រី១២៧នាក់) ។ ភ្ញៀវមកកម្សាន្តតាមរមណីយដ្ឋាននានាមាន រមណីយដ្ឋានក្បាលឆាយមានប្រមាណ ៤.៧៩៥នាក់ ក្នុងនោះមានភ្ញៀវបរទេស៦០នាក់(ស្រី១៧នាក់) រមណីយដ្ឋានថ្មរូងមានប្រមាណ១.៨៨០នាក់(ស្រី៥៦៤នាក់) ក្នុងនោះភ្ញៀវបរទេស២៧០នាក់ រមណីយដ្ឋានពិចនិចមានភ្ញៀវប្រមាណ១.៨៥០នាក់ ក្នុងនោះភ្ញៀវបរទេស ៣៣០
នាក់(ស្រី១០០នាក់) ។
ចំពោះតម្លៃសេវាកម្មស្នាក់នៅ សណ្ឋាគារមួយចំនួនមានការកើនឡើងចន្លោះពី២០%ទៅ៣៥% និង ផ្ទះសំណាក់មួយចំនួន មានការកើនឡើងចន្លោះពី៣០% ទៅ៥០% ។ ចំណែកម្ហូបអាហារគ្រឿងសមុទ្រ មានការឡើងថ្លៃប្រមាណ២០% ។ អ្វីដែលត្រូវបានកត់សម្គាល់ គឺការកម្សាន្តតាមតំបន់ឆ្នេរមានការធ្លាក់ចុះយ៉ាងគំហុកតែម្តង ខុសកាលពីឆ្នាំទៅមិញ នៅតាមឆ្នេរសមុទ្រ ពិសេសចំណុចអូរឈើទាល អ្នកទៅលេងមាត់សមុទ្រមីដេរដាសចុះងូតទឹក តែពេលនេះបែរជាថយចុះយ៉ាងខ្លាំងទៅវិញ ។
ភ្ញៀវទេសចរនិងអ្នកខេត្តព្រះសីហនុជាច្រើនបានបង្ហាញអារម្មណ៍ស្រដៀងគ្នាថា ក្នុងពិធីបុណ្យជាតិដ៏ធំមួយនេះ ប្រជាពលរដ្ឋជាច្រើនបាននាំគ្នាឈប់សម្រាកជាច្រើនថ្ងៃគឺស្ទើរតែ១សប្តាហ៍ ហើយមួយចំនួនបានទៅលេងស្រុកកំណើត មួយចំនួនទៀតនាំគ្នាដើរលេងនៅតាមទីកម្សាន្តនានាដែលប្រារព្ធពិធីបុណ្យ នៅរាជធានីភ្នំពេញ និងមួយចំនួនទៀតនោះ គឺធ្វើដំណើរទៅកម្សាន្តទៅតាមខេត្តមួយចំនួន ដូចជាខេត្ត សៀមរាប និងខេត្តព្រះសីហនុជាដើម ។
ដោយឡែក ខេត្តព្រះសីហនុគឺជាតំបន់ទេសចរណ៍ឆ្នេរសមុទ្រដ៏ស្រស់ស្អាត ដែលមានទេសភាពដ៏ស្រស់ បំព្រង និងជាតំបន់សេដ្ឋកិច្ចដ៏ធំមួយរបស់ប្រទេសកម្ពុជា ។ ប៉ុន្តែក្រោយពីមានកំណើនជនជាតិចិនយ៉ាង ច្រើនបានហូរចូលយ៉ាងគំហុកមក តំបន់នេះបានប្រែក្លាយទៅជាតំបន់មួយដែលពលរដ្ឋខ្មែរលែងទៅលេងកម្សាន្តដូចមុនៗទៀត ព្រោះទាំងការស្នាក់នៅ និងហូបចុក បានកើនតម្លៃក្នុងកម្រិតមួយដែលប្រជាពលរដ្ឋមិនមានលទ្ធភាព ។ ជាក់ស្តែង បើយើងក្រឡេកមើលទៅតំបន់ឆ្នេរពិតជាមានភាពស្ងប់ស្ងាត់ខ្លាំងណាស់ ដែលខុសកាលពីមុនគឺមានមនុស្សច្រើនកុះករ ពេលមានបុណ្យទានម្តងៗ ៕
ចែករំលែកព័តមាននេះ