ខេត្តកំពង់ឆ្នាំង ៖ ប្រជាកសិករចំនួន៣៣គ្រួសារ រស់នៅភូមិសិរី ឃុំខុនរ៉ង ស្រុកបរិបូណ៌ បានចោទប្រកាន់ទៅលើអាជ្ញាធរ ឃុំ និងស្រុកថា បានរំលោភបំពានយកដីស្រែប្រាំងរបស់ពួកគាត់ឲ្យទៅអ្នកបំលាស់ទីផ្ទះបណ្តែតទឹកចូលមករស់នៅ។…
ខេត្តកំពង់ឆ្នាំង ៖ ប្រជាកសិករចំនួន៣៣គ្រួសារ រស់នៅភូមិសិរី ឃុំខុនរ៉ង ស្រុកបរិបូណ៌ បានចោទប្រកាន់ទៅលើអាជ្ញាធរ ឃុំ និងស្រុកថា បានរំលោភបំពានយកដីស្រែប្រាំងរបស់ពួកគាត់ឲ្យទៅអ្នកបំលាស់ទីផ្ទះបណ្តែតទឹកចូលមករស់នៅ។ ការតវ៉ានេះ បានធ្វើឡើងនៅចំណុចដីស្រែប្រាំងរបស់ពួកគាត់ស្ថិតក្នុងភូមិកំពុងអួរ ឃុំខុនរ៉ង ស្រុកបរិបូរណ៌ កាលពីរសៀលថ្ងៃទី២៤ ខែវិច្ឆិកា ឆ្នាំ២០១៨។ ប្រជាពលរដ្ឋទាំងនោះបានលើកឡើងថា ពួកគាត់បានប្រកប របរធ្វើស្រែប្រាំង នៅទីនេះយូរឆ្នាំណាស់មកហើយ ខ្លះថា ៣ទៅ៤ឆ្នាំ និងខ្លះថា ៥ទៅ៦ឆ្នាំ និងខ្លះទៀតបាននិយាយថា គាត់មានទាំងលិខិតពាក្យស្នើសុំកាន់កាប់ដីធ្លីទៅទៀតគឺតាំងពីសម័យរដ្ឋកម្ពុជា១៩៨៩មកម្លេះ។
ដីពួកគាត់ទាំង៣៣ គ្រួសារ មានចំនួន១៦ហិកតា១៧អា។ ប៉ុន្តែថ្មីៗនេះស្រាប់តែអាជ្ញាធរ ឃុំខុនរ៉ង និងស្រុកបរិបូរណ៌ បានដកហូតដី របស់ពួកគាត់ឲ្យទៅប្រជាពលរដ្ឋ អ្នករស់នៅភូមិកំពង់អូរ ដែលធ្វើការបំលាស់ទី ពីក្នុងទឹកមករស់នៅលើគោក ជាដីពួកគាត់ដែលអាស្រ័យផលស្រូវប្រាំងទៅវិញ។ មិនត្រឹមប៉ុណ្ណឹង អាជ្ញាធរឃុំបានដក់បង្គោលរបងដីស្រែរបស់ពួកគាត់ និងបានឃាត់យកគោយន្តរបស់ពួកគាត់មួយគ្រឿងទៅដាក់សាលាឃុំទៀតផង ខណៈពួកគាត់កំពុងរាស់ដីទៀតផង។ ហេតុនេះពួកគាត់សំណូមពរដល់ឯកឧត្តមអភិបាលខេត្ត និងពិសេសសម្តេចតេជោ ហ៊ុន សែន សូមមេត្តាជួយអន្តរាគមន៍ ជួយពួកគាត់ផង។
ទាក់ទងនឹងការចោទប្រកាន់ខាងលើនេះ លោក ឃួន សៅរុំ អភិបាលស្រុកបរិបូរណ៌ បានបញ្ជាក់ប្រាប់តាមទូរស័ព្ទថា៖ បញ្ហាដីដែលប្រជាពលរដ្ឋក្នុងភូមិសិរីខាងលើនេះ គឺជាដីស្ថិតក្នុងតំបន់៣ ជាតំបន់ហាមឃាត់ ដោយអាជ្ញាធរជាតិបឹងទន្លេសាប។ ប៉ុន្តែកន្លងទៅប្រជាពលរដ្ឋចេះតែបំពានក្បាលដីស្រែម្តងបន្តិចៗ ជារៀងរាល់ឆ្នាំពេលណាអាជ្ញាធរចុះហាមឃាត់ខ្លាំងគាត់នាំគ្នាផ្អាកទៅ ពេលស្ងាត់ពួកគាត់លួចឈូសឆាយធ្វើបន្ត។គាត់មិនចង់ប៉ះពាល់ដល់ប្រជាពលរដ្ឋ ចេះតែអប់រំខ្លះៗទៅពេលខ្លះមានធ្វើកិច្ចសន្យាទៀតផង។ ប្រជាពលរដ្ឋ បានសន្យាថា រដ្ឋត្រូវការពេលណាពួកគាត់នឹងឲ្យពេលនោះវិញ។
លុះដល់ពេលបំលាស់ទី ផ្ទះបណ្តែតទឹករបស់ អ្នកភូមិកំពង់អួរ បែរជាពួកគាត់មិនឲ្យទើបកើតរឿងបែបនេះ ហើយដីចំណុចគាត់រំលោភបំពានលួចកាប់ព្រៃតំបន់៣ ធ្វើស្រែប្រាំរាល់ឆ្នាំនោះគឺជាដីស្ថិតនៅភូមិកំពង់អួរ មិនមែនដីក្នុងភូមិសិរីនោះទេ។ ចំណែករឿងនេះនឹងដោះស្រាយ គ្នានៅព្រឹកថ្ងៃទី២៦ ខែវិច្ឆិការនេះ ដោយអាជ្ញាធរត្រៀមឯកសារ ផែនទី សម្រាប់បង្ហាញពួកគាត់ឲ្យបានយល់ ហើយឲ្យពួកគាត់ត្រូវត្រៀមឯកសារបង្ហាញដែរ ដើម្បីមានសមធម៌ទាំងអស់គ្នា៕
ចែករំលែកព័តមាននេះ