ប្រទេសអីុរ៉ង់ ៖ ប្រធានាធិបតីអីុរ៉ង់លោកហាសាន់រ៉ូហានី អះអាងកាលពីថ្ងៃទី២៤វិច្ឆិកាថា ប្រទេសរបស់លោក ជាគូប្រជែងនឹងអារ៉ាប៊ីសាអ៊ូឌីត ត្រៀមជួយការពារបណ្ដាផលប្រយោជន៍ របស់ប្រជាជនអារ៉ាប៊ីសាអ៊ូឌីត ហើយអំពាវនាវដល់ជនអ៊ិស្លាមទូទាំងពិភពលោក ឲ្យរួបរួមគ្នាប្រឆាំងសហរដ្ឋអាមេរិក។…
ប្រទេសអីុរ៉ង់ ៖ ប្រធានាធិបតីអីុរ៉ង់លោកហាសាន់រ៉ូហានី អះអាងកាលពីថ្ងៃទី២៤វិច្ឆិកាថា ប្រទេសរបស់លោក ជាគូប្រជែងនឹងអារ៉ាប៊ីសាអ៊ូឌីត ត្រៀមជួយការពារបណ្ដាផលប្រយោជន៍ របស់ប្រជាជនអារ៉ាប៊ីសាអ៊ូឌីត ហើយអំពាវនាវដល់ជនអ៊ិស្លាមទូទាំងពិភពលោក ឲ្យរួបរួមគ្នាប្រឆាំងសហរដ្ឋអាមេរិក។
អីុរ៉ង់ស៊ីអីុត និងអារ៉ាប៊ីសាអ៊ូឌីតស៊ុននីត ជាប្រទេស២ដែលមានឥទ្ធិពលខ្លាំងនៅមជ្ឈឹមបូព៌ា បានកាត់ផ្ដាច់ទំនាក់ទំនងការទូត ជាមួយគ្នាចាប់តាំងពីឆ្នាំ២០១៦មក។ ប្រទេសទាំង២មានទំនាស់ខ្លាំងជាមួយគ្នាចាប់តាំងពីច្រើនទសវត្សមកហើយ។ ពួកគេប្រឆាំងគ្នាលើសំណុំរឿងតំបន់ និងអន្តរជាតិជាច្រើន។ ក្រុងតេហេរ៉ង់ជាសត្រូវរបស់សហរដ្ឋអាមេរិក ហើយក្រុងរីយ៉ាដជាសម្ព័ន្ធមិត្តជិតដិតរបស់ក្រុងវ៉ាស៊ិនតោន។
ក្នុងសន្និសីទអន្តរជាតិមួយនាទីក្រុងតេហេរ៉ង់ស្ដីពីឯកភាពរបស់អ៊ិស្លាម លោករ៉ូហានីអះអាងថា យើងត្រៀមការពារអស់ពីកម្លាំងកាយចិត្តរបស់យើង បណ្ដាផលប្រយោជន៍របស់ប្រជាជនអារ៉ាប៊ីសាអ៊ូឌីត ប្រឈមមុខនឹងភេរវកម្ម និងពួកមហាអំណាច។ យើងមិនទាមទារប្រាក់៤៥០ពាន់លានដុល្លារសម្រាប់កិច្ចការពារនេះឡើយ ហើយយើងក៏ពុំប្រមាថអ្នកដែរ។ លោកចង់និយាយយោងដល់បណ្ដាកុងត្រាយោធារវាងក្រុងរីយ៉ាដនិងក្រុងវ៉ាស៊ិនតោន។
លោកបន្តថា បងប្អូនអារ៉ាប៊ីសាអ៊ូឌីតពុំមានអ្វីត្រូវខ្លាច ដល់ក្រុងតេហេរ៉ង់ឡើយ។ អ្វីដែលសហរដ្ឋអាមេរិកចង់បាននៅមជ្ឈឹមបូព៌ានាពេលនេះ គឺភាពជាខ្ញុំកញ្ចាស់់របស់គេ។ លោកអំពាវនាវដល់ក្រុងរីយ៉ាដឲ្យបញ្ឈប់ការចំណុះលើជំនួយយោធារបស់អាមេរិក ដែលពោរពេញដោយការអុជអាលញុះញ៉ង់។ ជំនួសការក្រាលកម្រាលព្រំក្រហមទទួលពួកឧក្រិដ្ឋជន រដ្ឋាភិបាលរបស់បណ្ដាប្រទេសអ៊ិស្លាម ត្រូវរួបរួមគ្នាប្រឆាំងសហរដ្ឋអាមេរិក និងអីុស្រាអែល ដែលចាត់ទុកដូចជាដំបៅមហារីករបស់តំបន់។
អីុរ៉ង់ពុំទទួលស្គាល់អត្ថិភាពនៃរដ្ឋអីុស្រាអែល ហើយអីុស្រាអែលបានចោទប្រកាន់អីុរ៉ង់ថា ស្វែងរកផលិតគ្រាប់បែកនុយក្លេអ៊ែរ។ រយៈពេលប៉ុន្មានខែចុងក្រោយនេះ សហរដ្ឋអាមេរិកបានស្ដារឡើងវិញបណ្ដាទណ្ឌកម្មជាឯកតោភាគីប្រឆាំងអីុរ៉ង់ ក្រោយដកខ្លួនថយនាខែឧសភាពីកិច្ចព្រមព្រៀង ស្ដីពីនុយក្លេអ៊ែរអីុរ៉ង់ដែលចុះហត្ថលេខាកាលពីឆ្នាំ២០១៥ ដោយក្រុងតេហេរ៉ង់និងបណ្ដាមហាអំណាច។ ផ្ទុយទៅវិញពួកអឺរ៉ុប ចិននិងរុស្ស៊ីនៅតែស្ថិតក្នុងកិច្ចព្រមព្រៀងនោះ៕
ចែករំលែកព័តមាននេះ