រាជធានីភ្នំពេញ៖ នាយកអង្គការតម្លាភាពកម្ពុជាបានអះអាងថា ប្រជាជនខ្មែរកំពុងតែរងគ្រោះនៃជម្លោះនយោបាយយ៉ាងអយុត្តិធម៌បំផុត ។ ការលើកឡើងនេះបន្ទាប់ពីនាយកអង្គការរូបនេះមើលឃើញថាទំនាក់ទំនងអាមេរិក និងកម្ពុជាកំពុងតែមានភាពប្រែប្រួល ។ លោក ព្រាប កុល…
រាជធានីភ្នំពេញ៖ នាយកអង្គការតម្លាភាពកម្ពុជាបានអះអាងថា ប្រជាជនខ្មែរកំពុងតែរងគ្រោះនៃជម្លោះនយោបាយយ៉ាងអយុត្តិធម៌បំផុត ។
ការលើកឡើងនេះបន្ទាប់ពីនាយកអង្គការរូបនេះមើលឃើញថាទំនាក់ទំនងអាមេរិក និងកម្ពុជាកំពុងតែមានភាពប្រែប្រួល ។ លោក ព្រាប កុល នាយកអង្គការតម្លាភាពកម្ពុជាបានលើកឡើងលើបណ្តាញសង្គមហ្វេសប៊ុកយ៉ាងដូច្នេះថា «ខ្ញុំអាណិតបងប្អូនជនជាតិខ្មែរយើងដែលក្លាយជាជនរងគ្រោះនៃជម្លោះនយោបាយ ។ ខ្ញុំបានរំលេចនូវរឿងអយុត្តិធម៌ដែលបានកើតឡើងចំពោះខ្មែររួមទាំងឧត្តមមន្ត្រីមួយចំនួនផងដែរដែលឆ្លុះបញ្ចាំងអំពីការប្រែប្រួលនៃទំនាក់ទំនងរវាងខ្មែរ និងអាមេរិក» ។ លោក ព្រាប កុល បានលើកឡើងទៀតថា បើសំណេរនោះបណ្តាលឱ្យកើតមាននូវការអាក់អន់ចិត្តដល់បងប្អូនខ្មែរណាម្នាក់វាមិនមែនជាចេតនារបស់ខ្ញុំទេ ។ ចេតនារបស់ខ្ញុំ គឺចង់ បង្ហាញបញ្ហានោះឱ្យមានការចាប់អារម្មណ៍ច្រើន ហើយសង្ឃឹមថានឹងមានកិច្ចខិតខំប្រឹងប្រែង ដើម្បីធ្វើឱ្យប្រសើរឡើងវិញនូវទំនាក់ទំនងការទូតជាមួយប្រទេសបជ្ឈិមលោក ។
មូលហេតុ គឺដោយសារខ្ញុំដឹងច្បាស់ថា ខ្មែរយើងអាចទទួលបានផលចំណេញជាច្រើនថែមទៀតទាំងផ្នែកសមត្ថភាព សេដ្ឋកិច្ច និងភូមិសាស្ត្រនយោបាយ ជាពិសេសផ្នែកលទ្ធិប្រជាធិបតេយ្យ និងសិទ្ធិមនុស្សនៅក្នុងរយៈពេលមធ្យម និងរយៈពេលវែង ។ លោកបន្ថែមថា ផ្ទុយទៅវិញបើយើងផ្តេកផ្តួលតែទៅប្រទេសលោកខាងកើតជាពិសេសប្រទេសចិនខ្លាំងពេក ដោយសារយើងមើលឃើញផលចំណេញមួយផ្នែកភ្លាមៗ យើងអាចនឹងមានបញ្ហារងឥទ្ធិពលនយោបាយហានិភ័យផ្នែកសេដ្ឋកិច្ច និងជាប់បំណុលធ្ងន់នៅពេលអនាគត ។ លោកបានបន្ថែមប្រសិនបើមានមតិស្រប ឬផ្ទុយសូមប្រើភាសាថ្លៃថ្នូរប្រកបដោយក្រមសីលធម៌ដោយគោរពសិទ្ធិសម្តែងមតិ ។ ចូរយើងជៀសវាង និងថ្កោលទោសរាល់ការប្រើពាក្យអសីលធម៌ ជាពិសេសការលាបពណ៌គ្នា ដោយគ្រាន់តែមានទស្សនៈមិនស្របគ្នា ។ ការលើកឡើងរបស់លោក ព្រាប កុល នេះដែរបន្ទាប់ពីមន្ត្រីជាន់ខ្ពស់រាជរដ្ឋាភិបាលមួយរូបបានព្យាយាមសុំទិដ្ឋការពីស្ថានទូតអាមេរិក តែមិនទទួលបាននោះទេ ។ ទាក់ទិននឹងការលើកឡើងរបស់លោក ព្រាប កុលនេះដែរលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាដែរចង់ទៅអាមេរិក ដើម្បីទៅលេងកូនបានលើកឡើងថា តើនៅឯណាទៅសិទ្ធិមនុស្សនៅសហរដ្ឋអាមេរិក ? លោកបានសរសេរលើបណ្តាញសង្គមហ្វេសប៊ុកថា គ្រាន់តែសុំវី សារ ទៅលេងកូនពន្យាពេលរហូតទៅ៣សប្តាហ៍ ។
លោកបានលើកឡើងក្នុង បណ្តាញទំនាក់ទំនងសង្គមហ្វេសប៊ុកកាល ពីថ្ងៃទី២២ ខែវិច្ឆិកា ឆ្នាំ២០១៨ថា «នឹកកូនពេករត់ទៅសុំ VISA អាមេរិក ។ ពីមុនសុំបានៗ តែពេលនេះប្លែកគេពន្យាពេល៣សប្តាហ៍ថាឲ្យ ឬមិនឲ្យ ។ ចូលជិត១០ថ្ងៃហើយនៅមិនទាន់ទទួលដំណឹង ។ នៅសល់តែ២ថ្ងៃទៀត ទោះជាឲ្យក៏ទៅមិនបានដែរ ពីព្រោះរវល់ខ្លាំង ។ សិទ្ធិមនុស្សនៅឯណា?» ។ បន្ទាប់ពីបានលើកឡើងបែបនេះមកនៅរសៀលថ្ងៃដដែលលោកបានបន្តលើកទៀតថា មានអ្នកខ្លះមួយចំនួនតូចមិនបានដឹងថា គ្រួសារលោកទៅនៅអាមេរិកដោយសារគេចពីសង្គ្រាម ក្រោយឆ្នាំ១៩៧៩ ។ លោកថា ចោទលោកជាមនុស្សពុករលួយ គឺខុស ។ កូន លោក រៀនចប់ ដោយសារខ្ចីលុយក្នុងសាលាពេលរៀនចប់ត្រូវសងគេវិញ ។ នេះក៏ជាចំណុចដែលគាត់បាន និងបន្តធ្វើការនៅអាមេរិកបន្តទៀត ។ ពេលសងអស់គាត់នឹងត្រឡប់មកខ្មែរវិញ ពីព្រោះជាប្រ ទេសកំណើត ។
លោក កែវ រ៉េមីបន្ថែមថា «នៅឆ្នាំ១៩៩៨ អាមេរិកបានផ្តល់សញ្ជាតិអាមេរិកាំងឲ្យខ្ញុំតែខ្ញុំមិនទៅទទួលនោះទេ ។ នេះជាការពិតមានសាក្សីនៅរស់មួយចំនួនដែលគេតែងតែហួសចិត្តជាមួយខ្ញុំ»។ ដោយសារឃើញនូវសារទាំងនេះលោក ប៉ាវ ស៊ីណា ដែលជាមេសហជីពមួយរូបវិញ បានលើកឡើងដែរថា «បើខ្ញុំជាពូវិញ ខ្ញុំមិនឲ្យកូន ឬបងប្អូនទៅរស់នៅអាមេរិកនោះទេ ពូ ឃើញអត់អាមេរិកមិនខ្វល់រឿងគោរពសិទ្ធិមនុស្សឡើយ មិនមែនខ្ញុំណែនាំពូទេ តែបើខ្ញុំវិញ ខ្ញុំឲ្យកូន ឬបងប្អូនទៅរស់នៅ ចិន ឬវៀតណាម វិញហើយ» ៕
ចែករំលែកព័តមាននេះ