បុណ្យអុំទូក៣ថ្ងៃ មិននឹកស្មានមានភ្ញៀវទេសចរចូលរួមច្រើនដល់ម្លឹង
- ភ្នំពេញ
រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍បានបញ្ចាក់ថា រយៈពេលបីថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ…
រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍បានបញ្ចាក់ថា រយៈពេលបីថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានភ្ញៀវទេសចរអន្តរជាតិជាង ១ម៉ឺន២ពាន់នាក់ បានចូលរួមទស្សនាការប្រណាំងទូក និងពិធីបណ្ដែតប្រទីប នៅលើវេទិកាដែលរៀបចំដោយក្រសួងទេសចរណ៍ ។ នេះជាបញ្ចាក់របស់លោក ថោង ខុន រដ្ឋមន្ត្រីក្រសួងទេសចរណ៍នាល្ងាចថ្ងៃទី២៣ ខែវិច្ឆិកា ឆ្នាំ២០១៨ ។
លោករដ្ឋមន្ត្រីបានបន្តថា អ្វីៗទាំងអស់នៅក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នាឆ្នាំ២០១៨នេះ គឺមានភាពល្អប្រសើរជាងឆ្នាំមុនច្រើនណាស់ ទាំងកំណើនភ្ញៀវទេសចរជាតិ-អន្តរជាតិ ការពង្រឹងសន្តិសុខ សណ្ដាប់ធ្នាប់សាធារណៈ និងការរៀបចំពិធីនានារបស់រដ្ឋបាលរាជធានីភ្នំពេញ ទាំងត្រើយខាងកើត និងត្រើយខាងលិច ។
លោកអំពាវនាវទៅដល់ប្រជាពលរដ្ឋ និងគ្រប់ភាគីទាំងអស់ សូមមានការចូលរួមយកចិត្តទុកដាក់ និងទទួលខុសត្រូវចំពោះបញ្ហាអនាម័យ កាកសំណល់ សំរាម ថង់ប្លាស្ទិចជាដើម ពិសេសគឺប្រកាន់នូវទម្លាប់មួយ «កុំបោះចោលសំរាមផ្ដេសផ្ដាសឱ្យសោះ ត្រូវដាក់សំរាមក្នុងធុងសំរាម» ។
លោកថា ការប្រកាន់នូវស្មារតីដ៏ប្រពៃណីនេះ ក៏ជាការចូលរួមក្នុងចលនាប្រឡងប្រណាំង «ទីក្រុងស្អាត រមណីយដ្ឋានល្អ សេវាល្អ និងបដិសណ្ឋារកិច្ចល្អ» ព្រមទាំងយុទ្ធនាការ «កម្ពុជាស្អាត កម្ពុជាបៃតង» ពីព្រោះវាជាកត្តាទាក់ទាញដ៏ធំមួយ ក្នុងការផ្សព្វផ្សាយឱ្យភ្ញៀវទេសចរមកទស្សនាកម្ពុជាឱ្យកាន់តែច្រើន ៕
ចែករំលែកព័តមាននេះ