ខេតបាត់ដំបង ៖ សមត្ថកិច្ចបានឱ្យដឹងថា បុរសម្នាក់មិនត្រឹមតែបង្កឱ្យមានគ្រោះថ្នាក់ចរាចរណ៍រងរបួសខ្លួនឯងយ៉ាងធ្ងន់ធ្ងរទេ ថែមទាំងធ្វើឲ្យរថយន្តយក្សមួយគ្រឿង ដែលដឹកបន្លែរាប់សិបតោនក្រឡាប់ផ្ងារជើងទៀត កើតឡើងកាលពីវេលម៉ោង០៦ និង៣០នាទីយប់ថ្ងៃទី២៣ វិច្ឆិកា ស្ថិតលើកំណាត់ផ្លូវជាតិលេខ៥ ត្រង់ចំណុចភូមិព្រៃព្រាល ឃំុព្រៃស្វាយ ស្រុកមោងឫស្សី ។
បុរសខាងលើ ឈ្មោះអ៊ុន កំសត់ អាយុ៣៩ឆ្នាំ រស់នៅភូមិអូរគ្រាត ឃុំគារ ស្រុកមោងឬស្សី ជិះម៉ូតូម៉ាកហុងដាឌ្រីមC១២៥ពណ៌ខ្មៅ សេរី២០០៤ ពាក់ស្លាកលេខបាត់ដំបង 1I-0249 ដែលធ្វើដំណើរពីលិចទៅកើត ។
បើតាមសមត្ថកិច្ចបានប្រាប់ថា ជនរងគ្រោះបានជិះម៉ូតូស្របទិសគ្នា ជាមួយរថយន្តមួយគ្រឿង ដែលគេមិនស្គាល់ម៉ាក ហើយគាត់បានជិះឡើងជែងរថយន្តនោះ ស្រាប់តែប៉ះដៃម៉ូតូបណ្តាលអោយដួលរងរបួសធ្ងន់ រីឯរថយន្តបានបើកគេចខ្លួនបាត់ ។
សមត្ថកិច្ចបានបញ្ជាក់ថា ពេលជនរងគ្រោះកំពុងដួលលើថ្នល់ ស្រាប់តែមានរថយន្តធុនធ្ងន់មួយគ្រឿងទៀត ពាក់ស្លាកលេខបាត់ដំបង 3A-3058ដឹកបន្លែរាប់សិបតោនផង បើកបញ្ច្រាសទិសហើយបានពើបប្រទះជនរងគ្រោះយ៉ាងប្រថុចញ៉ុចបំផុត ស្ទើរតែនឹងកិនលើជនរងគ្រោះទៅហើយ ។ ប៉ុន្តែស្ថិតក្នុងស្ថានភាពគ្រាហ៍អាសន្នបែបនេះ អ្នកបើកបរក៏បានបួងចង្កូតគេចរហូតក្រឡាប់ខ្លួនឯងធ្លាក់ពីលើថ្នល់តែម្ដង ហើយដោយសារភ័យពេក អ្នកបើកបរបានលូនចេញពីក្នុងរថយន្តរួចគេចខ្លួនបាត់ ព្រោះស្មានថាខ្លួនបុកមនុស្សស្លាប់ ។
ទោះយ៉ាងណា បើតាមសមត្ថកិច្ចបានប្រាប់ថា ឧប្បតិហេតុនេះ គឺបង្កឡើងដោយសារអ្នកជិះម៉ូតូដែលព្រហើនពេក ដែលជិះវ៉ារថយន្តប៉ះដៃចង្កូតដួលរបួសខ្លួនឯងហើយធ្វើឲ្យរថយន្តយក្សមួយគ្រឿងទៀតក្រឡាប់ផ្ងាជើងទ្រមេឃ ។ តែយ៉ាងណាក៏ដោយ ជនរងគ្រោះត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកមោងឫស្សី រីឯរថយន្តនិងម៉ូតូ ត្រូវបាននាំយកទៅរក្សាទុកបណ្ដោះអាសន្ននៅប៉ុស្តិនគរបាលឃំុព្រៃស្វាយ ដើម្បីដោះស្រាយតាមនីតិវិធី៕
ចែករំលែកព័តមាននេះ