ចិន ៖ តាមប្រភពព័ត៌មាន Shanghaiist បានឲ្យដឹងថា សិស្សរៀនថ្នាក់បឋមយ៉ាងហោចណាស់៥នាក់ ត្រូវបានស្លាប់បាត់បង់ជីវិត និង១៨នាក់ទៀតរងរបួស ដោយសារតែរថយន្ត Audi មួយបានបើកបុករះពេលដើរឆ្លងផ្លូវ នៅមុខបឋមសិក្សាក្នុងក្រុង Huludao នៃខេត្ត Liaoning ថ្ងៃព្រហស្បត្តិ៍។
ហេតុការណ៍ដ៏គួរឲ្យខ្លាចនេះ កើតឡើងនៅពេលថ្ងៃត្រង់ នៅពេលសិស្សសាលាកំពុងដើរឆ្លងផ្លូវនៅខាងមុខច្រកទ្វារសាលា។ កាមេរ៉ាសុវត្ថិភាពបានថតជាប់នូវរាល់សកម្មភាព។ គេបានឃើញរថយន្ត Audi A6 ពណ៌ខ្មៅ បើកបញ្ច្រាស់ទិស ទៅបុកសិស្សកំពុងដើរឆ្លងផ្លូវ បណ្តាលឲ្យដេកដួលរងរបួស និងស្លាប់ជាច្រើននាក់។
ក្រោយពីបានបុករួច អ្នកបើកក៏បានបើករត់ តែត្រូវបានប៉ូលិសចាប់បាននៅពេលក្រោយ។ គេនៅមិនទាន់ដឹងច្បាស់ពីមូលហេតុនៅពីក្រោយការបុកនោះទេ។ វាអាចមកពីអ្នកបើកធ្វេសប្រហែស ឬក៏គាត់មានចេតនាបើកបុកក្មេងៗ។ ប៉ូលិសកំពុងតែធ្វើការស៊ើបអង្កេតបន្តទៀត។
សូមទស្សនាវីដេអូខាងក្រោមដកស្រង់ចេញពី CGTN ៖
ចែករំលែកព័តមាននេះ