រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា សម្រាប់ព្រះរាជពិធីបុណ្យអុំទូកថ្ងៃទី២កន្លងមកនេះ សំរាមប្រមាណ៦ពាន់តោន គឺកើនឡើងទ្វេដង បើប្រៀបធៀបទៅនឹងថ្ងៃអុំទូកទី១ ដែលមានតែ៣ពាន់តោន ដែលត្រូវបានបោស កើប…
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា សម្រាប់ព្រះរាជពិធីបុណ្យអុំទូកថ្ងៃទី២កន្លងមកនេះ សំរាមប្រមាណ៦ពាន់តោន គឺកើនឡើងទ្វេដង បើប្រៀបធៀបទៅនឹងថ្ងៃអុំទូកទី១ ដែលមានតែ៣ពាន់តោន ដែលត្រូវបានបោស កើប និងប្រមូលដឹកយកទៅចាក់នៅទីលានចាក់សំរាមជាយក្រុង ។ ចំណែកបញ្ហាសន្តិសុខ សណ្តាប់ធ្នាប់ និងរបៀបរៀបមានលក្ខណៈល្អប្រសើរដូចថ្ងៃអុំទូកទី១ ខណៈមានប្រជាពលរដ្ឋប្រមាណ១លាន៥សែននាក់ បានចូលរួមសប្បាយរីករាយ និងកម្សាន្តសប្បាយ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា សម្រាប់ថ្ងៃទី២នៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក មានបងប្អូនប្រជាពលរដ្ឋ យ៉ាងច្រើនកុះករ បានចូលរួមសប្បាយរីករាយ ក្រោមបរិយាកាសស្និតស្នាល កក់ក្តៅ និងសោមនស្សរីករាយក្រៃលែង។
លោកបន្តថា ការមកកំសាន្តច្រើននេះបង្ហាញឱ្យឃើញថា ប្រជាពលរដ្ឋមានជំនឿលើសន្តិភាព មានភាពកក់ក្ដៅក្នុងចិត្ត មានជីវភាពធូរធា ទើបបងប្អូនមានលទ្ធភាពចូលរួមទទួលយកនូវភាព សប្បាយយ៉ាងច្រើនសន្ធឹកសន្ធាប់បែបនេះ ។ លោកបានបញ្ជាក់ថា ក្នុងរយៈពេល២ថ្ងៃនេះបញ្ហាសន្តិសុខ សណ្តាប់ធ្នាប់ និងរបៀបរៀបរយបានល្អ ដោយសារប្រជាពលរដ្ឋមានការចូលរួម និងយល់ដឹងខ្ពស់ ដូចជាការទុកដាក់បញ្ហាសំរាមជាដើម ។
ចំណែកលោក សំ សាមុត ប្រធានអង្គភាពសួនច្បារ និងរុក្ខជាតិរាជធានីភ្នំពេញបានឲ្យដឹងថា សម្រាប់ថ្ងៃទី២ នៃព្រះរាជពិធីបុណ្យអុំទូកនេះ អង្គភាពសួនច្បារ មានកម្មករចំនួន២៩០នាក់ ក្រោយចប់ព្រះរាជពិធីបុណ្យអុំទូក ក្រុមកម្មករបានធ្វើការបោសសំអាត និង ប្រមូលសំរាម ចាប់ពីម៉ោង១២យប់ មកដល់ម៉ោង៧ព្រឹកនេះ បានរួចរាល់ហើយ គឺនៅលើសួនច្បារ និងទីសាធារណៈនានាបានស្អាតវិញហើយ ។ លោក បញ្ជាក់ថា សម្រាប់ថ្ងៃទី២នៃព្រះរាជពិធីបុណ្យអុំទូកនេះ សំរាមបានកើនឡើងទ្វេរដង បើប្រៀបធៀបទៅនឹងថ្ងៃបុណ្យអុំទូកទី១នោះ ៕
ចែករំលែកព័តមាននេះ