រាជធានីភ្នំពេញ ៖ ភ្ញៀវទេសចរអន្តរជាតិដែលបានចូលរួមទស្សនាព្រះរាជពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ នៅលើវេទិការបស់ក្រសួងទេសចរណ៍ នាថ្ងៃទីពីរនេះ មានការកើនឡើងជាងថ្ងៃម្សិលមិញ ពោលគឺមានចំនួនដល់ទៅជាង៤,០០០នាក់។ នេះបើយោងតាមលោក ថោង ខុន រដ្ឋមន្ត្រីក្រសួងទេសចរណ៍។
លោកថោង ខុន បានបញ្ជាក់ថា ដូចជារៀងរាល់ឆ្នាំ ដោយបានការអនុញ្ញត្តិពីគណៈកម្មការរៀបចំបុណ្យជាតិ-អន្តរជាតិ ក្រសួងទេសចរណ៍បានរៀបចំវេទិការទទួលទេសចរអន្តរជាតិជារៀងរាល់ឆ្នាំ ។
ភ្ញៀវទេសចរបរទេសពិតជាមានការពេញចិត្តយ៉ាងខ្លាំងចំពោះការរៀបចំព្រឹត្តិការណ៍ដ៏ធំនេះ ហើយពួកគេបានបញ្ជាក់ថា ពួកគេនឹងពាំនាំទិដ្ឋភាពដ៏អស្ចារ្យនាឱកាសនេះ ទៅផ្សព្វផ្សាយប្រាប់សាច់ញាតិ ក៏ដូចជាមិត្តភក្តិរបស់ខ្លួន ឱ្យបានយល់ច្បាស់ពីសភាពការណ៍ពិតក្នុងប្រទេសកម្ពុជា ដែលពោរពេញទៅដោយសន្តិភាព សន្តិសុខ ស្ថិរភាព និងផលិតផលទេសចរណ៍ល្អៗជាច្រើនសម្បូរបែប។
លោក គុជ បញ្ញាសា អនុរដ្ឋលេខាធិការក្រសួងទេសចរណ៍ បានបញ្ជាក់ថា ភ្ញៀវបរទេសដែលបានចូលរួមទស្សនានៅលើវេទិការបស់ក្រសួងទេសចរណ៍ នាថ្ងៃទីពីរនេះ មានដូចជាភ្ញៀវជនជាតិបារាំង អង់គ្លេស ប៉ូឡូញ រុស្ស៊ី អេស្បាញ អាល្លឺម៉ង់ អាមេរិក ចិន កូរ៉េ ជប៉ុន ឥណ្ឌា វៀតណាម ហើយក៏មានភ្ញៀវមកពីប្រទេសក្នុងតំបន់មជ្ឈិមបូព៌ា និងមកពីតំបន់អាស៊ីអាគ្នេយ៍ផងដែរ។
ចែករំលែកព័តមាននេះ