ខេត្តបន្ទាយមានជ័យ ៖ យ៉ាងហោចណាស់ក៏មានករណីគ្រោះថ្នាក់ចរាចរណ៍២ករណីដាច់ដោយឡែកពីគ្នា ក្នុងយប់ថ្ងៃតែមួយ នៅស្រុកព្រះនេត្រព្រះ ខេត្តបន្ទាយមានជ័យ បណ្តាលឲ្យមនុស្សម្នាក់បាត់បង់ជីវិត និង២នាក់ទៀតរបួសធ្ងន់ កាលពីថ្ងៃទី២២ ខែវិច្ឆិកា ២០១៨។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ករណីទី១ នៅថ្ងៃទី២២ ខែវិច្ឆិកា ឆ្នាំ២០១៨ ម៉ោង៦និង៥០នាទីយប់ មានករណីគ្រោះថ្នាក់ចរាចរណ៍បង្កឡើងដោយម៉ូតូបុកម៉ូតូ មួយកើតឡើងនៅលើកំណាត់ផ្លូវលេខ268A ពីភូមព្រៃមាន់ ទៅស្រុកភ្នំស្រុក
ក្រៅទីប្រជុំជនត្រង់ចំណុចខាងត្បូងបង្គោលចែកព្រំប្រទល់ភូមិព្រៃមាន់ ឃុំរហាល ស្រុកព្រះនេត្រព្រះ និងភូមិគោករំចេក ឃុំស្រះជីក ស្រុកភ្នំស្រុក ចំងាយប្រហែល៧០០ម៉ែត្រ ស្ថិតក្នុងភូមិសាស្ត្រ ភូមិព្រៃមាន់ ឃុំរហាល ស្រុកព្រនេត្រព្រះ។
លោកអធិការនគរបាលស្រុកព្រះនេត្រព្រះបានបញ្ជាក់ថា មុនដំបូងមានម៉ូតូមួយគ្រឿងម៉ាក Honda Dream ធុន C១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ បន្ទាយមានជ័យ ១B.១២៦៦ អ្នកបើកឈ្មោះ អាត់ ពិដោ (ហៅ ចក់) ភេទប្រុស អាយុ៤៨ឆ្នាំ រស់នៅភូមិកណ្ដាលលិច ឃុំស្រះជីក ស្រុកភ្នំស្រុក ខេត្តបន្ទាយមានជ័យ (គ្មានពាក់មួកសុវត្ថិភាព) បានបើកពីត្បូងទៅជើង ។
ពេលមកដល់ចំណុចកើតហេតុក្នុងស្ថានភាពដីហុយមើលមិនច្បាស់ ស្រាប់តែទៅបុកនិងម៉ូតូមួយគ្រឿងទៀតម៉ាក Honda Dream ធុន C១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាលេខ ឧត្តរមានជ័យ ១B.៣៩២៩ អ្នកបើកឈ្មោះរ៉ុត ប៊ុនថង ភេទប្រុស អាយុ២២ឆ្នាំ រស់នៅភូមិស្រះឈូកកើត ឃុំស្រះជីក ស្រុកភ្នំស្រុក (គ្មានពាក់មួកសុវត្ថិភាព) ដូចគ្នា បើកពីជើងទៅត្បូងទិសដៅផ្ទុយគ្នា បណ្ដាលឲ្យម៉ូតូបុកចំកណ្ដាលទ្រូងផ្លូវពេញមួយទំហឹងតែម្តង ធ្វើរងរបួសធ្ងន់ទាំង២នាក់ ត្រូវបានដឹកទៅសង្គ្រោះនៅមន្ទីរពេទ្យ ចំណែកម៉ូតូខូចខាតស្រាល។
លោកវរសេនីយ៍ឯកមាស ប្ញទ្ធី ក៏បានបន្តថា ករណីទី២ នៅថ្ងៃទី២២ វិច្ឆិកា ម៉ោង៦និង៤០នាទីយប់ មានករណីគ្រោះថ្នាក់ចរាចរណ៍មួយកើតឡើងនៅលើកំណាត់ផ្លូវជាតិលេខ៦ក្នុងទីប្រជុំជន ត្រង់ចំណុចខាងមុខវត្តរហាល ស្ថិតក្នុងភូមិរហាល ឃុំរហាល ស្រុកព្រះនេត្រព្រះ បង្កឡើងដោយរថយន្តបុកអ្នកកង់ឆ្លងផ្លូវ។
លោកអធិការបានបញ្ជាក់ថា មុនដំបូងមានអ្នកជិះកង់ម្នាក់បានជិះឆ្លងផ្លូវម្នាក់ដែលគេស្គាល់ឈ្មោះឌុក សីហា ភេទប្រុស អាយុ៣៣ឆ្នាំ រស់នៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ(សង្ស័យថា ជាមនុស្សវិកលចរិត) បានជិះកង់ចេញពីក្នុងវត្តរហាល ក្នុងដំណើរពីត្បូងទៅជើង។
ពេលមកដលចំណុចកើតហេតុ ស្រាប់តែមានរថយន្តមួយគ្រឿងម៉ាកកាមរីបាឡែន ពណ៌ខ្មៅ ពាក់ស្លាកលេខ ភ្នំពេញ ២V.៥៤០៤ អ្នកបើកបរមិនស្គាល់អត្តសញ្ញាណ (រត់គេចខ្លួន) ទុកតែរថយន្តនៅកន្លែងកើតហេតុ។ រថយន្តបានបើកមកពីកើតទៅលិច ដោយល្បឿនលឿន មកដល់ចំណុចកើតហេតុបានបុកកង់ឆ្លងផ្លូវ បណ្ដាលឲ្យស្លាប់ភ្លាមៗនៅកន្លែងកើតហេតុ ។
ក្រោយពេលកើតហេតុ វត្ថុតាងក្នុងករណីគ្រោះថ្នាក់ចរាចរណ៍ទាំង២លើកនេះ ត្រូវបានកម្លាំងនគរបាលជំនាញចរាចរណ៍អធិការដ្ឋាននគរបាលស្រុកព្រះនេត្រព្រះ បានយកមករក្សាទុកនៅអធិការដ្ឋាន រង់ចាំធ្វើការដោះស្រាយពេលក្រោយ៕
ចែករំលែកព័តមាននេះ