ខេត្តមណ្ឌលគិរី ៖ ដោយសារអាកាសធាតុត្រជាក់ រួមផ្សំនឹងសម្រស់ធម្មជាតិដ៏សម្បូរបែប ខេត្តមណ្ឌលគិរីបានទាក់ទាញភ្ញៀវទេសចរណ៍សម្រុកទៅលេងភ្លូកទឹកភ្លូកដី រហូតមិនអាចរកកន្លែងស្នាក់អាស្រ័យបានគ្រប់គ្រាន់នោះទេ។ នេះបើគិតត្រឹមយប់ថ្ងៃទី២២ រហូតដល់ព្រឹកថ្ងៃទី២៣ នេះ ដោយគេសង្កេតឃើញថា…
ខេត្តមណ្ឌលគិរី ៖ ដោយសារអាកាសធាតុត្រជាក់ រួមផ្សំនឹងសម្រស់ធម្មជាតិដ៏សម្បូរបែប ខេត្តមណ្ឌលគិរីបានទាក់ទាញភ្ញៀវទេសចរណ៍សម្រុកទៅលេងភ្លូកទឹកភ្លូកដី រហូតមិនអាចរកកន្លែងស្នាក់អាស្រ័យបានគ្រប់គ្រាន់នោះទេ។ នេះបើគិតត្រឹមយប់ថ្ងៃទី២២ រហូតដល់ព្រឹកថ្ងៃទី២៣ នេះ ដោយគេសង្កេតឃើញថា ភ្ញៀវទេសចរមានវត្តមានកាន់តែច្រើនឡើងៗ ចំណែកនៅតាមដងផ្លូវក្នុងក្រុងសែនមនោរម្យ គឺស្ទះពេញណែន ស្ទើររកផ្លូវបើកបរទៅមុខមិនរួច។
ចំណែកនៅតាមដងផ្លូវចាប់ពីស្រុកអូរាំង ឆ្ពោះទៅក្រុងសែនមនោរម្យ គេសង្កេតឃើញរថយន្តឈប់តកន្ទុយគ្នា ដើម្បីថតរូបភ្នំ ស្មៅ និងចម្ការស្រល់ជាដើម។
បើតាមក្រុមអ្នកទេសចរបានឲ្យដឹងថា បានសម្រេចចិត្តជ្រើសរើសដំណើរកម្សាន្តទៅខេត្តមណ្ឌលគិរី តែត្រូវកក់ផ្ទះសំណាក់មុនរយៈពេល១ខែ អ្នកខ្លះកក់មុន២ខែក៏មាន ក្នុងដំណើរកម្សាន្តលក្ខណៈគ្រួសារ នាថ្ងៃបុណ្យអ៊ុំទូកឆ្នាំនេះ។ ដោយឡែកអ្នកទេសចរខ្លះមិនបានកក់កន្លែងស្នាក់មុន ត្រូវសម្រេចចិត្តសុំផ្ទះអ្នកស្រុកសម្រាក ឬបោះតង់តាមតំបន់សុវត្ថិភាពដែលមានសមត្ថកិច្ចប្រចាំការ ហើយនៅមានភ្ញៀវជាច្រើនទៀត ដែលត្រូវសម្រាកតាមរថយន្ត ឬត្រូវបង្ហួសទៅស្រុកជិតៗក្រុង ដើម្បីបានផ្ទះសំណាក់សម្រាកប៉ុណ្ណោះអាសន្ន។
លោក កាន់ ពេញ អធិការនគរបាលក្រុងសែនមនោរម្យ បានផ្តាំផ្ញើដល់បងប្អូនអ្នកទេសចរទាំងអស់ មេត្តាបង្កើនការប្រុងប្រយ័ត្នក្នុងការបើកបរ ព្រោះផ្លូវធ្វើដំណើរនៅតំបន់នេះ មានសភាពបត់បែនឡើងចុះចំណោតខ្ពស់ៗ ដែលងាយបណ្តាលឱ្យជួបគ្រោះថ្នាក់។ ចំណែកបញ្ហាសុខសុវត្ថិភាពលោកអធិការបានបញ្ជាក់ថា កម្លាំងរបស់លោកសហការជាមួយកម្លាំងស្នងការដ្ឋានខេត្ត បានដាក់ពង្រាយគ្រប់គោលដៅសំខាន់ៗ ដើម្បីការពារ ធានាដល់សុវត្ថិភាពអ្នកដំណើរ និងអ្នកលេងកម្សាន្តនៅតាមរមណីយដ្ឋានផងដែរ៕
ចែករំលែកព័តមាននេះ