រាជធានីភ្នំពេញ ៖ គណៈកម្មការរៀបចំការប្រណាំងទូកអំពាវនាវឲ្យក្រុមកីឡាករ-កីឡាករិនីទូក.ង ទូកចែវទាំងអស់ ត្រូវគោរពវិន័យឱ្យបានម៉ឹងម៉ាត់ ដើម្បីធានាឲ្យការប្រណាំងទូក.ងមាន សណ្តាប់ធ្នាប់ និងសុវត្ថិភាពទាំងអស់គ្នា។
លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈកម្មការ មេប្រយោគរៀបចំព្រះរាជពិធីបុណ្យអុំទូកបានអៈអាងថា ឆ្នាំនេះគណៈកម្មការរៀបចំការប្រណាំងទូកបានធ្វើការកំណែទម្រង់ជាច្រើន ដែលធានាឲ្យការប្រណាំងនេះ មានសណ្តាប់ធ្នាប់ មានតម្លាភាព និងមិនលួចខ្សែទឹកគ្នាបានឡើយ។
ការជំរុញឱ្យក្រុមកីឡាករគោរពវិន័យនេះ បានធ្វើឡើងដោយសារតែកន្លងមក ក្រុមកីឡាករ កីឡាការិនីទូក.ងមួយចំនួនមិនគោរពវិន័យបាន នាំឲ្យមានការលំបាកក្នុងការគ្រប់គ្រងទូក ដូចជាការអុំតែឯងគ្មានដៃគូ ការអុំបញ្ជ្រាសទិសធ្វើឲ្យប៉ះពាល់ដល់ទូកដែលកំពុងប្រកួតផ្សេងទៀត និងការមានគ្រោះថ្នាក់កើតឡើងជាយថា ហេតុនៅពេញកំពុងអុំជាដើម។
លោកបានណែនាំដល់អ្នកដឹកនាំ និងអ្នកគ្រប់គ្រងទូកទាំងអស់ត្រូវមានគំនិតទស្សនៈថា ព្រះរាជពិធីបុណ្យអុំទូក ជាព្រះរាជប្រពៃណីជាតិរបស់ខ្មែរដែលប្រជាពលរដ្ឋគ្រប់រូបចូលរួមសប្បាយរីករាយទាំងអស់គ្នា ហើយមិនត្រូវឱ្យតម្លៃខ្ពស់ពេកទៅលើលទ្ធផលឈ្នះ និងចាញ់ទេ ពីព្រោះនេះ មិនមែនជាកីឡាប្រកួតយកឈ្នះចាញ់ឡើយ តែជាបុណ្យប្រពៃណីជាតិ។
លោក ប៊ូ ជុំសេរី បានក្រើនរំលឹកដល់ក្រុមកីឡាករ កីឡាការិនីទូកទាំងអស់ត្រូវថែរក្សាសុខភាពកុំដើរលេងយប់ជ្រៅ ឬការបរិភោគគ្រឿងស្រវឹងដើម្បីធានាសុខភាពល្អនឹងដណ្តើមបានជ័យជំនះ ហើយមានសុវត្ថិភាពខ្ពស់នៅលើផ្ទៃទឹក។
ចំណែកលោកស្រស់ ម៉ៅ ជាក្រុមកីឡាករចំណុះទូក.ង «សាមីតេជោសែនជ័យបារមីចម្ប៉ាសូស្តីរស្មីអង្គរ» មកពីខេត្តព្រៃវែង បានប្តេជ្ញាគោរពវិន័យ និងការថែរក្សាសុខភាព ដើម្បីធានាបានសុវត្ថិភាពខ្លួនឯងនៅពេលប្រកួតនៅលើផ្ទៃទឹក។ លោកបានបញ្ជាក់ថា ការរៀបចំការប្រណាំងទូករបស់គណៈកម្មការប្រណាំងនាពេលនេះបានរៀបចំបានល្អ ដែលរក្សាបានតម្លាភាព ហើយគ្មានការលួចកេងខ្សែទឹកគ្នាឡើយ។
សូមបញ្ជាក់ថា នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំនេះ មានទូកចូលរួមរហូតដល់ជាង២៩០ទូក ហើយមានចំណុះទូកជិត២ម៉ឺននាក់។ ជាមួយគ្នានេះដែលគណៈកម្មការរៀបចំការប្រណាំងទូកបានគូរផ្គង់ទូកគូពិសេសមានចំនួន៤០គូ ក្រៅពីនេះគឺទូកធម្មតាមានទូកអុំ ទូកចែវ និងទូកខ្នាតអន្តរជាតិ។
ដោយឡែកសម្រាប់ការចាត់ចំណាត់ថ្នាក់វិញ ចំពោះទូកធម្មតា ឈ្នះទាំង៣ថ្ងៃ ចូលក្នុងផែនលេខ១ ឈ្នះ២ថ្ងៃ ចូលក្នុងផែនលេខ២ ឈ្នះ១ថ្ងៃចូលក្នុងផែនលេខ៣ ហើយទូកចាញ់ទាំង៣ថ្ងៃចូល ផែនលេខ៤។ រីឯទូកគូពិសេសវិញ គឺកំណត់ដោយក្រូណូម៉ែត្រ ហើយបូកសរុបទាំង៣ថ្ងៃ បើទូកណាមានថេរវេលាខ្លីជាងគេ គឺទទួលបានជ័យលាភីលេខ១ ចាត់ទុកជាទូកមានល្បឿន លឿងជាងគេងបង្អស់នៅកម្ពុជា៕
ចែករំលែកព័តមាននេះ