រាជធានីភ្នំពេញ ៖ ជនបរទេសម្នាក់ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញឃាត់ខ្លួន កាលពីថ្ងៃទី២០ វិច្ឆិកា ពាក់ព័ន្ធលើបណ្តឹងនារីខ្មែរម្នាក់ ដែលជាប្រពន្ធឥតខាន់ស្លា ដោយចោទប្រកាន់ថា ជនបរទេសរូបនោះ បានធ្វើទារុណកម្មលើផ្លូវកាយ ផ្លូវភេទ និងផ្លូវចិត្ត មិនអាចរស់នៅជាមួយគ្នាតទៅទៀតបាន។ ជនជាប់សង្ស័យឈ្មោះ CHENIMI SID ALI ហៅ SIDO អាយុ៣៧ឆ្នាំ ជាជនជាតិអាល់សេរី (Algeria) ជាភ្ញៀវទេសចរណ៍ចេញចូលមកកម្សាន្តនៅប្រទេសកម្ពុជា។ ចំណែកដើមបណ្តឹងមានឈ្មោះ ប.ឃ អាយុ៣០ឆ្នាំ ជាស្ត្រីខ្មែរ។
ពាក្យបណ្តឹងរបស់នារីរងគ្រោះ បានរៀបរាប់ឱ្យសមត្ថកិច្ចដឹងថា ដំបូងឡើយនាងស្គាល់ និងទំនាក់ទំនងស្នេហាជាមួយជនជាតិ អាល់សេរី (Algeria) នេះតាមរយៈទំនាក់ទំនងលេងបណ្តាញសង្គម Lovo (ហ្វេសប៊ុក) និងបានស្រឡាញ់គ្នា រស់នៅជាមួយគ្នា ក្នុងផ្ទះជួលដូចជាប្តីប្រពន្ធទៅហើយ។ ការស្រឡាញ់គ្នា ធ្វើជាប្តីប្រពន្ធឥតខាន់ស្លានោះ មានពេលខ្លះ បុរសជាប្តីបាននាំនាងទៅដើរលេងនៅក្រៅប្រទេស ដូចជា ប្រទេសម៉ាលេស៊ី និងវៀតណាម ថៃ។ ឆ្លៀតឱកាសក្នុងការរស់នៅជាមួយគ្នានោះ ប្តីអាល់សេរីតែងតែបង្ខំនាង ជក់ស៊ីហ្សា.ជាថ្នាំប្រភេទ Revotril និងPromitril ដែលនាងមិនអាចធ្វើតាមបាន។
ហើយមានពេលខ្លះ គេជិះម៉ូតូក្នុងល្បឿនលឿន ធ្វើឲ្យដួល មានរបួសស្នាមពេញរាងកាយ និងបង្ខំឲ្យរួមភេទទាំងឈឺផងដែរ។ លើសពីនេះទៅទៀតពេលត្រឡប់មកស្រុកខ្មែរវិញ បុរសឃោរឃៅជនជាតិ អាល់សេរី រូបនេះ ធ្លាប់បានយកខ្សែមកចងរឹតកនាង បង្ខំឲ្យទៅទារលុយពីម្តាយចំនួន១ម៉ឺនដុល្លាអាមេរិក ដើម្បីយកមកឲ្យរូបគេ ដើរស៊ីចាយ តែនាងបានកុហក់ម្ដាយថា មានផ្ទៃពោះ ត្រូវការប្រាក់ថែទាំសុខភាព និងកូន។ ពាក្យបណ្តឹងនៅសមត្ថកិច្ចបានបន្តថា ជនបរទេសរូបនោះបានប្រើអំពើហិង្សាលើរូបរាងកាយ ផ្លូវចិត្ត ផ្លូវភេទ និងបង្ខំឲ្យប្រើប្រាស់គ្រឿងញៀន ដែលធ្វើឲ្យនាងស្ទើរក្លាយជាមនុស្សមិនប្រក្រតី បាត់បង់ស្មារតី ដូចមនុស្សឆ្កួតម្តងៗទៅហើយ។
ការទ្រាំទ្រ និងអំពើហឹង្សាពីបុរសជនបរទេសជាប្តីនោះលែងបាន នៅដល់ថ្ងៃទី៦ កញ្ញា ២០១៨ នាងសម្រេចចិត្តលួចរត់ចេញ ពីក្រញុំាបីសាចតណ្ហាវិលត្រលប់ទៅផ្ទះ រស់នៅជាមួយក្រុមគ្រួសារវិញ ។ ក្រោយពេលទៅរស់នៅជាមួយក្រុមគ្រួសារនោះ នាងមានអាការៈមិនប្រក្រតី សតិមិនគ្រប់គ្រាន់ ដូច្នោះទើប ប្អូនស្រីនាង បាននាំទៅដាក់ពាក្យបណ្តឹង ប្តឹងបុរសអាល់សេរី នៅទីបញ្ជាការដ្ឋានកងរាជអាវុធហត្ថ រាជធានីភ្នំពេញ ដើម្បីឱ្យជួយរកយុត្តិធម៌មកវិញសម្រាប់នាងជាស្ត្រីខ្មែរ។
ក្រោយពីទទួលបានពាក្យបណ្តឹងនោះ សមត្ថកិច្ចជំនាញ កងរាជអាវុធហត្ថរាជធានីភ្នំពេញ បានធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យ ជាជនជាតិអាល់សេរី រូបនោះ នាំយកទៅសាកសួរ។ ហើយការសាកសួរនោះ មានការស៊ីសង្វាក់ទៅ នឹងពាក្យបណ្តឹងរបស់ជនរងគ្រោះ ទើបសមត្ថកិច្ចកសាងសំណុំរឿងបញ្ជូនជនសង្ស័យទៅកាន់សាលាដំបូង រាជធានីភ្នំពេញ តាមនីតិវិធី៕
ចែករំលែកព័តមាននេះ