រាជធានីភ្នំពេញ៖ សហភាពអឺរ៉ុបប្រចាំកម្ពុជានៅថ្ងៃទី២១ ខែវិច្ឆិកា ឆ្នាំ២០១៨នេះ បានឧបត្ថម្ភទូកចែវនារីមួយគ្រឿង ដើម្បីចូលរួមនៅក្នុងព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ដែលប្រារពធ្វើឡើងនៅក្នុងរាជធានីភ្នំពេញ ចាប់ពីថ្ងៃទី ២១-២២ និង២៣ ខែវិច្ឆិកា ឆ្នាំ២០១៨។
ការឧបត្ថម្ភនេះ មានជាសម្ភារៈ និងអាហារសម្រាប់ក្រុមកីឡាករទូកចែវនារីឈ្មោះ «ព្រះពៃស្រពណ៌» ដោយមានកីឡាករនារីចំនួន៤២នាក់ មកពីភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង។
ក្នុងពេលអុំទូកបីថ្ងៃនេះ សហភាពអឺរ៉ុបក៏បានឧបត្ថម្ភការស្នាក់នៅនិងការហាត់សមរបស់ទូកចែវនារីឈ្មោះ ព្រះពៃស្រពណ៌ មុនចូលប្រកួតផងដែរនៅ ក្នុងព្រឹត្តការណ៍ដែលមានរយៈពេលបីថ្ងៃនេះ។
លោក ឯកអគ្គរដ្ឋទូត George Edgar ប្រធានប្រតិភូសហភាពអឺរ៉ុបប្រចាំកម្ពុជាមានប្រសាសន៍ថា «ក្នុងនាមជាដៃគូអភិវឌ្ឍន៍ដ៏សំខាន់មួយរបស់រដ្ឋាភិបាលកម្ពុជា សហភាពអឺរ៉ុបមានសេចក្ដីរីករាយយ៉ាងខ្លាំងដែលបាន គាំទ្រប្រពៃណីវប្បធម៌ដ៏សំខាន់នេះ របស់កម្ពុជា ព្រមទាំងកិច្ចខិតខំប្រឹងប្រេងនានា ដើម្បីឲ្យស្ត្រីនៅមូលដ្ឋា ក្នុងប្រទេសកម្ពុជាបានចូលរូមការអភិវឌ្ឍន៍ដើម្បីភាពស្មើគ្នាក្នុងសង្គម»។
លោកឯកអគ្គរដ្ឋទូតបានបន្តថា ព្រះរាជពិធីបុណ្យអុំទូក អកអំបុក បណ្ដែតប្រទីប និង សំពះព្រះខែ ក៏ជាផ្នែកមួយយ៉ាងសំខាន់ផងដែរនៅក្នុងវប្បធម៌របស់ប្រទេសកម្ពុជា ហេតុនេះព្រះរាជពិធីបុណ្យអុំទូកនេះមានសារៈសំខាន់ជាពិសេស សម្រាប់យើងនៅឆ្នាំនេះ ពីព្រោះថា ឆ្នាំនេះត្រូវបានជ្រើសរើសជាឆ្នាំ នៃកេរ្តិ៍ដំណែលវប្បធម៌អឺរ៉ុប ។
ព្រះរាជពិធីបុណ្យអុំទូក គឺជាព្រឹត្តិការណ៍វប្បធម៌ប្រចាំឆ្នាំធំបំផុតរបស់ប្រទេសកម្ពុជា ដោយទាក់ទាញមនុស្សរាប់លាននាក់មករាជធានីភ្នំពេញ។
សហភាពអឺរ៉ុបក៏ឆ្លៀតយកឱកាសនេះ ដើម្បីជួយផ្សព្វផ្សាយសារអំពីអំពើហិង្សា លើស្ត្រីនិង កុមារី។ អាវយឺត ដែលពាក់ដោយកីឡាករនារី មានសារសរសេរថា «និយាយថា ទេ ចំពោះអំពើហិង្សាលើស្ត្រី» ។
សហភាពអឺរ៉ុបប្រចាំកម្ពុជា មានមោទនភាពគាំទ្រគម្រោងនានា ដើម្បីកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជនកម្ពុជា ។ គម្រោងនានាដែលឧប្ថម្ភដោយសហភាពអឺរ៉ុប ចាប់ពីវិស័យនេសាទ អប់រំ កសិកម្ម ការប្រែប្រួលអាកាសធាតុ ជំនួយពាក់ព័ន្ធនឹងពាណិជ្ជកម្មរហូតដល់ការលើក កម្ពស់អភិបាលកិច្ចល្អ និងសិទ្ធមនុស្ស កំពុងតែផ្ដល់ប្រយោជន៍ដល់ប្រជាជនកម្ពុជារាប់លាននាក់៕
ចែករំលែកព័តមាននេះ